Holem Strong Ol Strong Rus
Melsida Hakobian, Amenia
Taem mi bin wan skul gel long Rasia, mi bin ridim wan stori we i stap mekem mi fraet abaot tu boe we tufala i mitim wan bea long tik bus. Sam yia afta, afta we mi bin kam wan tija, sam fren oli askem mi blong joenem olgeta long wan trip blong pikimap ol masrum. Tik bus i stil mekem mi fraet, be mi agri blong go wetem olgeta.
Taem mi go insaed long tik bus ia, mi karem wan stik blong mi save difendem miwan sapos mi kamaot long wan bea. I no longtaem ol fren blong mi oli faenem ol braon masrum we oli stap lukaotem. Mi, long narasaed, mi stap lukaotem ol masrum wetem ol red top we oli saen, mekem se mi stat blong wokbaot i go long wan defren daereksen. Bifo mi save, mi bin stap miwan finis.
Taem mi stap lukaotem masrum ia, mi bin glis mo foldaon. Basket blong ol masrum blong mi i flae i go antap long ea, be mi holemtaet stik blong mi. Taem mi traem blong stanap, mi luksave se graon i sopsop mo i stiki. Mi fraet, mo mi jes luksave se mi bin wokbaot i go long wan swam (ples we graon i wetwet oltaem long hem)! Ol wota but blong mi oli fulap kwik taem nomo wetem wota, mo mi stat blong draon. Mi traem blong muvum ol leg blong mi, be mi jes stap mekem mi draon moa. Taem sofmad i stap kasem bel blong mi, bigfala fraet i kavremap mi.
Mi singaot i go long ol fren blong mi, be ansa we mi kasem hem i wan noes nomo blong ol dragon flae mo ol frog oli stap krae. Taem mi stat blong krae, mi tingbaot mama blong mi. Taem hem i stap long wan rabis situesen, hem i prea. Oltaem hem i stap invaetem mi blong prea, be oltaem mi no wantem, mo mi stap ansa se, “I no gat God.”
Be long graon we i sopsop ia we i no longtaem bae i kam gref blong mi, i no gat samting we mi save mekem be blong prea mo singaotem God from help. Mi krae mo talem “Sapos yu laef, plis helpem mi!”
Kwiktaem nomo, mi harem wan kaen voes i talem long mi, “Biliv mo no fraet. Holem strong ol strong rus blong tri.”
Taem mi lukluk raon, mi luk wan bigfala tri biaen long mi. Wetem stik blong mi we mi stap holem ia, mi bin save yusum blong stikim i go long tri ia blong pulumaot mi. Wan samting i givim mi paoa blong mi pulumaot miwan long swam ia.
Wetem sofmad olbaot long mi, mi foldaon i go long graon mo talem tangkyu i go long God blong ansarem prea blong mi. Naoia mi biliv se Hem i laef. Mi bin filim paoa blong Hem mo mi bin harem voes blong Hem, mo Hem i bin givim paoa blong mi pulumaot miwan fri.
Wan sot taem afta, taem ol fultaem misinari oli bin tijim mi se Profet Josef Smit i bin kasem wan ansa long prea blong hem long Tabu Bus, mi bilivim olgeta. I tru, God i bin ansarem prea blong mi long bus. Mi hang long ol strong rus blong gospel, mi bin baptaes i no longtaem afta, mo sev tedei long Giumri Branj long Amenia.
Mi save se Papa long Heven i lavem evri pikinini blong Hem, mo mi glad tumas blong kam wan memba blong Jos blong Jisas Kraes blong Ol Lata-dei Sent. Mi glad tu long ol narafala blesing we mi bin kasem long Papa long Heven, speseli from ansa blong Hem long wan prea long bus blong wan man we i no biliv long God plante yia i pas finis.
Taem sofmad i stap kasem bel blong mi, bigfala fraet i kavremap mi. Mi singaot i go long ol fren blong mi, be ansa we mi kasem hem i noes nomo blong ol dragon flae mo ol frog oli stap krae.