Baptaes blong Bubuwoman
Marilena Kretli Pretel Busto, Sao Paulo, Brasil
Long 30 Jun 2001, mi stap mekem wan betdei kek blong gel blong mi taem telefon i ring. Sista blong mi long Brasil, i bin ring blong talem long mi se bubuwoman blong mifala i bin ded.
Nius ia i nogud tumas, be mi no harem nogud. Afta long evri samting, gudfala bubuwoman blong mi i bin laef kolosap blong 102 yia. Mi bin hapi se hem i jes fri, long olfala bodi blong wol ia mo i bin go long spirit wol.
Mi stat blong tingbaot olsem wanem nao ded blong hem i foldaon stret long betdei blong gel blong mi mo mi stap tingting sapos taem i impoten. Taem ol dei oli pas, mi faenemaot from wanem bae i olsem: bae hem i isi long mi blong tingbaot blong mi baptaes long bihaf blong bubuwoman blong mi wan yia afta long ded blong hem. Mi andastanem responsabiliti ia, wetem save se mi mas wet kasem nekis betdei blong gel blong mi nekis yia.
Yia i pas hariap. Mi no bin gat janis blong go long tempol long wan yia aniveseri blong ded blong bubuwoman blong mi, from mi stap long Potugal mo mi atendem Madrid Spen Tempol. Be mi neva fogetem responsabiliti blong mi ia blong baptaes blong Bubuwoman Josefina.
Long Oktoba 2002 nomo mifala i bin save go long tempol. Hasban blong mi mo mi i bin go wetem boe blong mitufala, Matiu, we bae i kasem endaomen blong hemwan blong hem i rere blong go long misin blong hem. Mi bin glad blong go long tempol, mo mi ting se bae mi filim wan spesel samting taem bae mi baptaes long bihaf blong bubuwoman blong mi.
Hasban blong mi i bin mekem baptaes ia, be mi no filim eni samting. Boe blong mi i bin mekem konfemesen, be bakegen, i no gat samting. Wari blong mi blong no filim eni samting i bin pas, mo mi jes glad se oli bin mekem ol odinens blong bubuwoman blong mi.
Afta long endaomen, mifala i bin go long rum blong sil blong mekem bubuwoman blong mi i sil long papa mo mama blong hem. Taem mifala i nildaon long olta blong mekem odinens ia mo man we bae i silim mifala i stat blong toktok, mi filim wan samting i jokem mi stat long hed blong mi mo i pas tru long bodi blong mi. Hem i had blong talem, be long taem ia, mi sua se Bubuwoman Josefina i bin glad blong hem i sil long papa mo mama blong hem.