Leftemap Ol Narawan mo Miwan

Kati Witaka Masel, Wasington, YSA

Hem i bin dei blong Thanksgiving (talem ol tankgyu) blong yia 1990. Mi jes go tru long wan had divos, mo mi bin wan loa studen blong wan yia nomo long wan siti we mi no save gud. Ol pikinini blong mi bae oli go stap long haos blong hasban blong mi blong holidei ia, mo blong fas taem long laef blong mi, bae mi stap miwan long Thanksgiving.

Long fas taem mi wantem blong filim sore long miwan mo go mekem wan bigfala krae. Be afta mi stat blong kaontem ol blesing blong mi. Mi bin gat tu naesfala pikinini, wan naes haos, wan janis blong kasem save, mo gospel blong Jisas Kraes blong gaedem laef blong mi. Tru, oli bin blesem mi wetem plante samting.

Taem Thanksgiving i stap kam kolosap, mi bin faenemaot se wan grup blong ol loa studen oli bin plan blong go long wan lokol jos blong help blong kasem kaekae long wan eli dina blong Thanksgiving long olgeta pipol we oli no gat haos. Mi tekem tingting se blong help long misin ia bae i moa gud yet bitim sapos mi go stap long hom miwan mo harem nogud, mekem se mi joenem ol studen ia.

Sam dei afta mi faenem miwan mi stap putum hot poteto we oli graonem long ol plet blong olgeta ia we oli hanggri, oli glad, mo we plante rabis samting i bin happen long ol laef blong olgeta. Ol wota oli fulumap ol ae blong mi, i no from mi harem nogud long miwan; be, from lav blong God long evri pikinini blong Hem, nomata long wanem situesen oli stap long hem.

Thanksgiving bae i no save kam olsem wan dei blong talem tangkyu long mi sapos i no gat teki long oven. Be wan 6 kilo teki bae i bigwan tumas long mi, mekem se mi bin invaetem sam studen blong ol defren kantri mo olgeta we oli kam long ol stet (provins) we i stap longwe blong oli joenem mi. Mi wantem blong mifala i serem wan kastom dina blong Thanksgiving blong ol man Amerika, be mi invaetem olgeta blong karem wan samting i kam. Mi bin askem wanwan long olgeta blong karem wanwan kaekae we oli stap kakae long hom blong olgeta i kam. Thangksgiving dina blong mifala i kamaot olsem wan gudfala kakae we bae mifala i stap tingbaot—iven wetem ol eg rol mo evri samting.

King Benjamin i bin talem, “Mo luk, mi talem ol samting ia long yufala blong yufala i save lanem waes tingting, blong yufala i save lanem se taem we yufala i stap wok blong ol narafala man, yufala i stap mekem wok blong God blong yufala nomo” (Mosaea 2:17).

Mi bin lanem waes long Thanksgiving Dei ia. Bae hem i isi blong mi stap long hom miwan mo harem nogud, be mi bin givim seves mo mi bin faenem glad. Seves hem i ki blong hapines, i no long ol holidei nomo, be hem i isi blong stap tingting nomo long wanem i bin lus long ol laef blong yumi, be tu long eni taem long sisen. Nomata wanem situesen blong yumi, oltaem yumi save faenem wan man blong helpem. Taem yumi leftemap ol brata mo sista blong yumi, yumi stap leftemap yumiwan tu.

Mi tekem tingting se blong help long misin ia bae i moa gud yet bitim sapos mi go stap long hom miwan mo harem nogud. Sam dei afta, mi faenem miwan mi stap putum hot poteto we oli graonem long ol plet blong olgeta ia we oli hanggri.