Stap Serem Testemoni

Maria Kaneva, Blagoevgrad, Bulgaria

“Bae mi go faswan,” Irinka i talem long evri fas Sandei blong manis. Wetem ol han we oli holemtaet jea mo ol ae we i fulap long glad, hem i gat strong tingting. Irinka i gat naen yia nomo, be hem i wan long olgeta we i gat moa strong tingting aot long ol eit memba we oli kam long jos oltaem long branj blong hem long Bulgaria.

Bifo hem i stanap, oltaem Irinka i mas wet blong luk sapos wan man i wantem blong serem testemoni blong hem fastaem. Evriwan bae oli givim wan lukluk long hem mo oli wet blong luk hem i go antap long fored. Long en, wetem wan bigfala smael, hem i wokbaot i go antap long pulpit. Branj presiden bae i givim long hem wan stul blong hem i stanap long hem blong hem i save luk ol memba. Irinka, wan pikinini ia nomo long Praemeri, i lukluk i go long smol kongregesen mo i stat blong toktok.

Hem i no fraet se evriwan oli stap luk hem. Ol memba oli lisin long swit voes blong hem. Taem hem i tokbaot Kraes, ol skripja, mo ol tru samting blong Jos, hem i stap helpem testemoni blong evriwan.

Taem hem i sidaon, evri samting i kwaet mo i luk olsem Spirit i bin tajem ol hat blong ol narafalawan. Afta, wan long ol memba bae i stanap blong serem testemoni blong hem, mo afta wan narawan mo narawan …