Olsem Wanem Tempol I Help
Evri papa mo mama i save se blong resemap ol pikinini i karem ol jalenj mo blesing we yumi no save luk i kam. Mi mo hasban blong mi i bin faenemaot se taem yumi tingting hevi long lukluk we i no save finis long rol blong wan papa mo mama, yumi filim responsabiliti i hevi tumas be i kam wetem bigfala hop.
I tru, Lod i bin givim long yumi ol riwod long saed blong spirit blong i mekem ol hevi samting blong yumi i nomo hevi. Blong famle blong mifala, bigfala riwod long saed blong spirit we i moa bigwan hem i blong go insaed long haos blong Lod blong kasem help blong Hem taem ol pikinini blong mitufala oli bigwan mo laef i kam moa had. Mitufala i bin faenemaot se yumi save tekem sam spesel problem i go long Lod insaed long tempol blong Hem.
Taem ol pikinini blong mitufala oli kam yangfala, mitufala i luksave se i posibol blong oli mekem ol bigfala mistek. Ating save ia we yumi stap fraet long hem se, yumi bin mekem evri samting we yumi save olsem wanem blong mekem, be yet yumi save luk se bae i posibol blong ol problem i hapen.
Afta, mitufala i faenemaot se tempol wosip i save kam wan impoten pat blong ol hadwok blong mitufala blong helpem ol pikinini blong mitufala blong jusum raet. Mitufala i bin faenem bigfala paoa mo blesing we i kam taem mitufala i stap go insaed long tempol wetem spirit blong livim kakae mo prea from ol pikinini blong mitufala. Mitufala i prea from wan filing blong stap rere, from ol stret tingting mo fasin bifo mitufala i go insaed long tempol. Taem i stret, ol tingting blong miutfala taem mitufala i stap insaed long tempol i abaot rol blong mitufala olsem papa mo mama mo abaot ol nid blong pikinini ia.
Samtaem ol ansa oli kam hariap mo klia. Fas taem we samting ia i bin hapen, mitufala i luk olsem wan laki. Be i no longtaem, hem i kam klia long mitufala se i tru, mituala i stap tekempat long wan proses we i stap karem ol blesing blong heven i kam daon.
Samtaem ol ansa oli kam tru long ol pipol we oli bin lidim laef blong ol pikinini blong mitufala, olsem wan gudfala bisop we i bin helpem gel blong mitufala we i stap rere blong go long kolej tru long wan hadtaem. Ol narafala pikinini oli bin kasem semfala blesing olsem ia. Wanwan man i gat fridom blong jusum blong hem, mo bae oli save jus blong no mekem folem wei we yumi hop from, be mifala i filim se seves blong mitufala long tempol i bin karem help blong heven i kam daon long ol laef blong ol pikinini blong mitufala.
Ol gudfala samting we mitufala i bin kasem long tempol wosip i bin go bitim blong blesem ol pikinini blong mitufala. Long wan taem, hasban blong mi i bin fesem wan had problem long saed blong wok, mekem se hem i wantem blong tekem problem ia i go long tempol. Long sem dei ia, Lod i bin blesem hem wetem wan filing se wan skripja hem i ansa long kwestin blong hem.
Taem mifala i kambak long hom, hem i go hariap mo openem olgeta skripja blong hem mo, long glad blong hem, i faenem help long problem blong hem. Eksperiens ia i bin openem wan niu fasin blong yusum olgeta skripja. Lod i save toktok long ol pikinini blong Hem taem Hem i mekem yumi tingbaot ol skripja we oli gat ol ansa long ol jalenj blong yumi. Mitufala i glad from prinsipol ia we mitufala i bin lanem insaed long tempol.
Long wan wol we ol rabis samting oli fulap long hem mo ples we Setan i letem ol paoa blong hem oli spolem gud ol hom, hem i gud blong save se yumi save go long haos blong Lod mo lukaotem rod. Nomata wanem jalenj yumi fesem taem yumi kea from ol famle blong yumi, yumi faenem glad taem yumi lukaotem wan ples we i sef mo i leftemap tingting blong yumi long tempol.