Mga Istorya kabahin ni Jesus

Si Jesus isip usa ka Bata

Ni Diane L. Mangum

Kini nga asoy nagagikan sa Mateo 2; Marcos 6:3; Lucas 2:21–52.

Gikugos ni Maria ang gamayng bata nga si Jesus samtang naglakaw siya sa busy nga templo sa Jerusalem. Siya ug si Jose miadto sa Betlehem aron sa paghalad og usa ka sakripisyo nga duha ka mga pati didto sa templo. Si Jesus hapit na mounom ka semana ang pangedaron.

Diha sa templo may usa ka tigulang nga lalaki nga ginganlan og Simeon. Gisaaran siya nga makakita siya sa Manluluwas sa umaabut nga panahon. “Gipadayag kaniya sa Espiritu Santo, nga siya dili una mamatay, samtang dili pa niya makita ang Kristo sa Ginoo” (Lucas 2:26). Sa dihang nakita niya ang gamayng bata nga si Jesus, si Simeon nagmaya tungod kay nasayud siya nga ang saad natuman. Dayon ang usa ka babaye nga ginganlan og Ana kinsa nagserbisyo didto sa templo malipayon nga mipamatuod nga si Jesus mao ang Manluluwas.

Apan dili tanan ang nalipay mahitungod sa pagkatawo sa Manluluwas. Si Haring Herodes nakadungog nga ang usa ka bata natawo kinsa maoy mahimong hari sa mga Judeo. Si Herodes dili gusto nga adunay laing mga hari sa iyang yuta. Siya mimando nga ang tanang mga bata nga natawo duol sa Betlehem sulod sa miaging duha ka tuig pagapatyon!

Ang usa ka anghel mipakita ni Jose sa usa ka damgo aron sa pagpasidaan kaniya mahitungod sa plano ni Herodes. Sila si Jose ug Maria mikagiw sa kagabhion. Ilang gidala si Jesus aron mopuyo sa yuta sa Ehipto, diin Siya mahimong luwas.

Human sa kamatayon ni Haring Herodes, ang pamilya ni Jesus mibalhin ngadto sa lungsod sa Nazaret. Si Jose nagtrabaho isip usa ka panday. Si Maria ang nag-atiman sa panimalay.

Si Jesus nakat-on sa pagtrabaho sa kiliran ni Jose. Sama sa tanan nga mga batang lalaki nga Judeo, nagtuon Siya sa mga kasulatan ug sa mga balaod sa Judeo. Sila si Jose ug Maria mituman sa mga sugo, ug si Jesus nakat-on gikan sa Iyang yutan-ong mga ginikanan. Si Jesus “midako, ug nahimong kusgan, puno sa kaalam: ug ang grasya sa Dios diha kaniya” (Lucas 2:40).

Sa dihang si Jesus nag-edad og 12, sila si Maria ug Jose midala Kaniya ngadto sa Jerusalem aron sa pagsaulog sa Pagpalabay. Mibiyahe sila uban sa daghang mga tawo. Ang mga babaye ug mga lalaki nanglakaw diha sa nagkalain-laing mga grupo, ug ang mga pamilya nagpundok matag gabii alang sa panihapon samtang mipahulay sila diha sa agianan.

Human sa kasaulogan sila si Jose ug Maria misugod sa pagpauli sa panimalay. Nianang gabhiona ilang namatngonan nga si Jesus wala sa bisan asa nga mga grupo nga kauban nila sa pagbiyahe. Nagdali sila nga mibalik sa Jerusalem aron sa pagpangita Kaniya. Human sa tulo ka adlaw ilang nakit-an si Jesus didto sa templo. Nakig-istorya siya sa mga magtutudlo ug mitubag sa ilang mga pangutana. Ang mga kalalakin-an didto sa templo nahingangha.

Gisultihan ni Maria si Jesus nga siya ug si Jose nabalaka kaayo. Si Jesus mipahinumdom kaniya nga gikinahanglan Niya nga buhaton ang buhat sa Iyang Langitnong Amahan. Bisan kon batan-on pa Siya, si Jesus nasayud nga Siya adunay importante nga buhat nga angayng buhaton isip kabahin sa plano sa Iyang Langitnong Amahan.

Templo sa Jerusalem—Kini nga templo lahi sa mga templo karon. Dako kaayo kini, may mga nataran ug mga balkon nga puno sa mga tawo. Ang mga tawo nagdala og mga hayop ngadto sa templo aron isakripisyo sa mga pari.

Sakripisyo—Sa dihang ang mga pari misakripisyo sa mga hayop ibabaw sa altar, gitudloan niini ang mga tawo nga sa umaabut nga adlaw ang Langitnong Amahan mosakripisyo sa Iyang Anak, si Jesukristo, kinsa mamatay alang sa atong mga sala.

Pagpalabay—Kining importante nga kalihokan misaulog sa panahon sa dihang gitabangan ni Jehova ang mga Judeo sa paglingkawas gikan sa pagkaulipon didto sa Ehipto, mga 1,400 ka tuig sa wala pa natawo si Jesus.

Itaas sa wala: detalye gikan sa Christ and the Rich Young Ruler [Si Kristo ug ang Adunahan nga Batan-ong Magmamando], ni Heinrich Hofmann, sa maayong kabubut-on sa C. Harrison Conroy Co.; ibabaw: paghulagway pinaagi ni Dan Burr; uban nga mga paghulagway pinaagi ni Casey Nelson