Pag-apil sa Buhat sa Family History

Tingali kamo lang ang miyembro sa Simbahan sa inyong pamilya ug bag-o lang sa buhat sa family history. O tingali ang uban diha sa inyong pamilya nakahimo na og daghan sa buhat sa family history ug templo alang sa inyong katigulangan. Bisan unsa pa man ang inyong sitwasyon, adunay daghan pang mga pamaagi nga kamo makatampo niining importante nga buhat.

Kon kamo dili sigurado kon asa magsugod, pagsugod diha sa inyong nahibaloan nga labing maayo: inyong kaugalingon. Hinoon, ang family history dili lamang kabahin sa inyong mga hinigugma kinsa nangamatay na. Kini kabahin usab sa pag-angkon sa inyong personal nga kasaysayan samtang kamo mopuyo niini. Ania ang pipila ka mga pamaagi nga mahimo ninyong sugdan:

• Pangita og kahon nga dili madugta [archival-safe box] ug isulod ang inyong importante nga mga rekord: inyong birth certificate, mga diploma, mga ganti, mga journal, mga litrato—bisan unsa nga nagrepresentar sa inyong kinabuhi.

• Kon kamo adunay magamit nga scanner, ikonsiderar ang pag-scan sa karaang mga litrato aron sa paghimo og digital nga mga kopya sa importanting mga litrato.

• Paghupot og usa ka journal nga makapadasig sa hunahuna, mga pagbati, ug mga panghitabo sa inyong kinabuhi.

• Pag-interbyu sa inyong mga sakop sa pamilya aron sa pagrekord sa ilang mga kasaysayan sa kinabuhi. Pagsugod diha sa inyong kinatigulangan nga buhing paryente. Pangutana og sama niini: Diin man ninyo nakuha ang inyong ngalan? Unsa ang mga tradisyon sa inyong pamilya sa dihang bata pa kamo ug sa kaulahian sa inyong kinabuhi? Unsa ang inyong masulti kanako kabahin sa espesyal nga mga talento o mga kinaiya sa inyong pamilya? Ang pagtipon og mga kasaysayan sa uban mahimong bahandi sa pamilya alang sa umaabot nga mga henerasyon.

• Pagparehistro og account sa www.New.FamilySearch.org ug i-type ang genealogical nga impormasyon nga inyong napundok kabahin sa inyong kaugalingon ug mga sakop sa pamilya. Ang online nga mga pagtudlo makatabang kaninyo sa matag lakang.

• Kon mahimo, tambong sa templo aron sa pagpahigayon sa mga ordinansa alang sa inyong mga katigulangan.

Kon kamo adunay mga pangutana kabahin sa buhat sa family history, ang consultant sa family history sa inyong ward o branch makatabang.

Mga Bahandi sa Langit

“Kon kita mosiksik sa atong kaugalingong mga katigulangan kita mainteresado og labaw pa kay sa mga ngalan lamang o sa gidaghanon sa mga ngalan nga ipahigayon sa templo. Ang atong pagkainterasado makapabalik sa atong mga kasingkasing ngadto sa atong mga amahan—kita magtinguha sa pagpangita kanila ug sa pag-ila kanila ug sa pagserbisyo kanila.

“Sa pagbuhat sa ingon kita nagtipig og bahandi sa langit.”

Presidente Boyd K. Packer, Presidente sa Korum sa Napulog Duha ka mga Apostoles, “Your Family History: Getting Started,” Liahona, Ago. 2003, 17.