Unsa ang Atong Gituohan

Ang mga Kasulatan Nagtudlo ug Nagpamatuod ni Jesukristo

Ang mga kasulatan naglangkob og tambag gikan sa mga propeta, dinasig nga mga panghitabo sa pagpakigsabut sa Dios ngadto sa mga tawo, ug mga pagpadayag gikan sa Dios ngadto sa Iyang mga propeta. Ang mga kasulatan nagtudlo nga kita mga anak sa atong Langitnong Amahan, kinsa nahigugma kanato. Isip kabahin sa Iyang plano alang sa atong mahangturong kalipay, kita mianhi sa yuta. Samtang ania kita dinhi, ang mga kasulatan mao ang espirituhanong suporta [spiritual lifeline] sa atong Langitnong Amahan ug ni Jesukristo.

Ang unang katuyoan sa mga kasulatan mao ang pagpamatuod kabahin ni Kristo, pagtabang kanato sa pagduol ngadto Kaniya ug pagdawat og kinabuhing dayon (tan-awa sa Juan 5:39). Mao nga ang mga propeta sa Ulahing mga Adlaw nagtambag kanato sa pagtuon sa mga kasulatan matag adlaw, sa indibidwal ug uban sa atong pamilya. Si Presidente Thomas S. Monson miingon: “Pagbasa sa kasulatan kada adlaw. Ang pagpaspas og basa dili kaayo epektibo sama sa kada adlaw nga pagbasa ug paggamit sa mga kasulatan diha sa atong mga kinabuhi. Magmahimong pamilyar sa mga leksyon nga gipangtudlo sa mga kasulatan. … Pagtuon niini sama nga kini nakig-istorya kaninyo, kay kini mao ang kamatuoran.”¹

Pinaagi sa mga pulong diha sa mga kasulatan, kita makaila ug mahigugma sa atong Langitnong Amahan ug sa atong Manluluwas nga si Jesukristo. Kita makabasa sa Ilang mga sugo ug, isip resulta, makakat-on sa kalainan tali sa husto ug sayop. Kita makaangkon og kalig-on sa pagbuntog sa tintasyon sa sala. Kita makadugang sa atong tinguha sa pagsunod sa mga balaod sa Dios. Ang mga kasulatan makapahupay kanato ug makatudlo kanato samtang kita ania dinhi sa yuta, ug kini makapakita kanato sa dalan pabalik sa atong langitnong panimalay.

Ang mga miyembro sa Ang Simbahan ni Jesukristo sa mga Santos sa Ulahing mga Adlaw midawat sa mosunod isip mga kasulatan:

1. Ang Biblia usa ka koleksyon sa sagradong mga sinulat nga naglangkob sa mga pagpadayag sa Dios ngadto sa karaang mga propeta sa Balaan nga Yuta. Ang atong ikawalo nga artikulo sa hugot nga pagtuo nag-ingon, “Kami nagtuo sa Biblia nga pulong sa Dios kon kini tukma nga pagkahubad.”

2. Ang Basahon ni Mormon: Lain nga Tugon ni Jesukristo naglangkob sa mga pagpadayag sa Dios ngadto sa karaang mga propeta sa Amerika. Naglangkob kini sa kahingpitan sa ebanghelyo ni Jesukristo (tan-awa sa D&P 20:9).

3. Ang Doktrina ug mga Pakigsaad usa ka basahon sa mga pagpadayag kabahin sa Pagpahiuli sa ebanghelyo ni Jesukristo, gihatag ngadto sa modernong mga propeta nga nagsugod kang Joseph Smith.

4. Ang Perlas nga Labing Bililhon naglangkob og dugang nga mga pagpadayag gikan sa Dios ngadto kang Moises, Abraham, ug Joseph Smith.

5. Ang Dios nagpadayon sa pagpadayag sa kamatuoran ngadto sa buhing mga propeta pinaagi sa pagdasig sa Espiritu Santo. Kining mga kamatuoran giisip nga kasulatan (tan-awa sa D&P 68:4). Kini unang moabut kanato pinaagi sa kinatibuk-ang komperensya, ipahigayon sa unang semana sa Abril ug Oktubre, sa dihang ang mga miyembro sa tibuok kalibutan makadungog sa mga pamulong sa atong propeta ug sa ubang mga lider sa Simbahan.

Mubo nga sulat

1. Thomas S. Monson, “Himoa ang Imong Kaugalingon nga Labing Maayo,” Liahona, Mayo 2009, 68.

Alang sa dugang nga impormasyon, tan-awa sa Mga Baruganan sa Ebanghelyo (2009), 55–61; ug Matinud-anon sa Tinuhoan (2004), 97–102.

“Ang tibuok nga kasulatan gituga sa Dios, ug may kapuslanan alang sa pagpanudlo, alang sa pagpamadlong, alang sa pagpanul-id, alang sa pagmatoto sa pagkamatarung” (2 Timoteo 3:16).

“Ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo. …

“… Ang hugot nga pagtuo moabut pinaagi sa pagsaksi sa Balaang Espiritu sa atong mga kalag, Espiritu ngadto sa espiritu, samtang kita maminaw o magbasa sa pulong sa Dios. Ug ang hugot nga pagtuo mohingkod samtang magpadayon kita sa pagbusog sa pulong. …

“… Tun-i ang mga kasulatan sa mabinantayon nga paagi, nga may katuyoan. Hinuktuki ug pag-ampo niini. Ang mga kasulatan mga pagpadayag, ug kini modala og dugang nga pagpadayag.”

Elder D. Todd Christofferson sa Korum sa Napulog Duha ka mga Apotoles, “Ang Panalangin sa Kasulatan,” Liahona, Mayo 2010, 34, 35.

Padulong sa tuo gikan sa ibabaw sa wala: paghulagway sa litrato pinaagi ni Derek Israelsen © 2002; Si Kristo sa Getsemani, ni Harry Anderson © IRI; Tulo ka mga Nephite, ni Gary Kapp © 1996 IRI; Si JESUKRISTO Nagpakita ngadto nila ni Propeta Joseph Smith ug Oliver Cowdery, ni Walter Rane, sa maayong kabubut-on sa Church History Museum; Ang Unang Panan-awon, ni Del Parson © 1987 IRI; gilitratohan ni Craig Dimond © IRI; paghulagway sa litrato pinaagi ni Christina Smith © IRI