Sayo sa Buntag nga Seminary Nagsaulog sa 60 ka Tuig

Ang sayo sa buntag nga seminary mahagiton, apan sulod sa nanglabay nga 60 ka tuig labaw pa sa usa ka milyon nga mga teenager nga miyembro sa Simbahan nakakat-on nga ang pagbangon sa dili pa mosubang ang adlaw ug mosulay sa pag-focus dili lang sa ilang mga mata kondili sa ilang mga hunahuna diha sa mga kasulatan usa ka angay nga paningkamot.

“Ang paggahin og pipila ka minuto diha sa mga kasulatan matag adlaw, paghatag og pagpamatuod, ug ang pagbati sa Espiritu dili lang makahatag og makapalig-ong epekto samtang ang mga estudyante moeskwela, kondili kini may makapaayo nga epekto samtang ang Pag-ula ni Jesukristo maglihok diha sa ilang mga kinabuhi,” miingon si Kelly Haws, ang assistant sa tigdumala sa mga seminary ug institute of religion. “Usa kini ka talagsaong kahigayunan alang sa mga batan-on.”

Ang Sinugdanan sa Sayo sa Buntag nga Seminary

Ang unang mga klase sa seminary gihimo atol sa regular nga tingklase niadtong 1912 sa usa ka seminary tupad sa Granite High School sa Siyudad sa Salt Lake, Utah, USA. Apan, sa paglabay sa katuigan, nagkadaghan ang mga batan-on sa Simbahan nagpa-enroll sa nagtubo nga sistema sa pangpubliko nga eskwelahan apan dili makatambong sa mga klase sa seminary sama sa gihimo sa mga estudyante sa Granite High.

Samtang ang gidaghanon sa mga miyembro sa Simbahan paspas nga nagtubo sa Habagatang California sa naghinapos nga 1940, ang panginahanglan sa pag-edukar sa mga batan-on diha sa ebanghelyo nakapadasig sa usa ka grupo sa mga presidente sa stake sa paghangyo sa pagtukod og programa sa seminary sa Simbahan didto sa Habagatang California.

Atol sa 1948–49 nga tuig sa tingklase, si Marion D. Hanks, kinsa sa wala madugay miserbisyo sa Kapangulohan sa Seventy, adunay kalampusan sa pagtudlo sa sayo sa buntag nga klase sa seminary sa West High School sa Siyudad sa Salt Lake. Ang pagpahigayon og sama nga mga klase daw usa ka makatarunganon nga solusyon alang sa mga Santos sa California, ug ang 11 ka mga stake gitugotan sa pagporma og 13 ka sayo sa buntag nga mga klase.

Pagpahiangay sa Nagkalain-laing mga Panginahanglan

Gikan sa opisyal nga pagsugod sa programa atol sa 1950–51 nga tuig sa tingklase, ang sayo sa buntag nga seminary mikatap sa tibuok Estados Unidos ug sa tibuok kalibutan, nagtabang sa mga batan-on sa bisan asang dapit sa pagkat-on sa mga kasulatan ug sa paggamit sa mga baruganan sa ebanghelyo. Ang opisyal nga ngalan niini bag-ohay lang nga giilisan ngadto sa “matag adlaw nga seminary,” tungod kay dili tanang mga klase gipahigayon sa sayo sa buntag.

Apil sa nakapahimo sa matag adlaw nga seminary nga nagmalampuson pag-ayo mao ang pagka-flexible niini. Ang mga programa giorganisar diha sa lebel sa stake ug district, ug ang mga klase mahimong i-organisar sa usa lang ka ward o branch o uban sa daghang mga ward o mga branch nga maghiusa og miting sumala sa mga panginahanglan ug mga kahimtang sa mga batan-on, mga ginikanan, ug mga priesthood lider.

Samtang gibana-bana nga 115,000 ka mga estudyante ang makapahimulos gihapon matag tuig gikan sa released-time seminary nga ipahigayon atol sa oras sa tingklase sa mga dapit nga may dagkong pundok sa mga miyembro sa Simbahan, hapit 217,000 nga mga estudyante sa seminary sa tibuok kalibutan ang miapil sa matag adlaw nga seminary.

Tungod kay pipila sa mga batan-on sa Simbahan nagpuyo og layo sa ubang mga miyembro sa Simbahan aron sa pagtambong bisan sa released-time o sa matag adlaw nga mga klase sa seminary, ang programa sa home-study sa seminary giestablisar. Ang mga estudyante sa home-study mogahin og upat ka adlaw matag semana sa pagtuon sa gi-assign nila nga materyal sa kinaugalingon nga paagi, dayon magpundok sa ubang mga estudyante sa home-study kausa matag semana aron sa paghisgot kon unsa ang ilang nakat-unan.

Usa ka Bato Gisapsap nga walay mga Kamot

Karon, ang mga klase sa seminary gipahigayon sa matag estado sa Estados Unidos ug sa 140 ka mga nasud sa tibuok kalibutan. Niadtong 1948 ang Canada nahimong unang nasud gawas sa Estados Unidos nga nagklase og seminary. Uban sa pagkatap sa sayo sa buntag nga seminary, ang Mexico misunod niadtong 1958, ang Finland ug Germany niadtong 1962, ang Japan niadtong 1963, ug ang Panama niadtong 1964, ug daghan pang mga nasud sa paglabay sa mga tuig. Sa labing bag-o ang mga klase sa seminary giestablisar sa miaging 2008 sa mga nasud sa Benin, Georgia, ug sa Morocco.

Samtang ang seminary mikatap sa tibuok kalibutan, usa ka komunidad sa tibuok kalibutan sa mga estudyante sa seminary nagmalambuon. Bisan asa magpuyo ang mga estudyante sa seminary, ilang nasag-ulo ang sama nga mga bersikulo sa pagkahanas sa kasulatan, nagtuon sa sama nga mga tudling sa kasulatan, mobati sa sama nga Espiritu samtang ang ilang mga pagpamatuod motubo, ug mobuhat aron sa pagtukod sa sama nga gingharian.

Mga Panalangin gikan sa Sakripisyo

Ang mga estudyante sa seminary, bisan kon nagtambong sila sa released-time, matag adlaw, o home-study nga seminary, naghimo og mga sakripisyo nga makapadala kanila nga mas maduol sa Langitnong Amahan.

“Kon ang 15-anyos modesisyon, nga ‘ako’ mobangon sa 5:00 sa buntag alang sa seminary,’ dili lamang kana usa ka sakripisyo, kondili kanang paggamit sa kabubut-on mao ang pagpahayag ngadto sa Langitnong Amahan nga pagabalosan og usa ka panalangin,” miingon si Brother Haws.

Kadtong mga panalangin sama ka tinuod karon ingon man niadtong 60 ka tuig na ang milabay, ug ang seminary diha sa tanang mga matang niini nagpadayon sa pagpanalangin sa mga kinabuhi sa mga batan-on sa tibuok kalibutan.

Labaw pa sa usa ka milyon ka batan-ong mga Santos sa Ulahing mga adlaw ang nakabenepisyo gikan sa sayo sa buntag nga seminary sukad pa sa pagsugod niini 60 ka tuig na nga milabay.