Ang akong pamilya motan-aw og mga salida nga alang lamang sa mga hingkod. Ang paggahin og panahon uban kanila importante, busa unsaon man nako sa pagpasabut kon nganong dili ko motan-aw niadtong mga salidaha?

Ang pagpili sa matarung kauban sa imong pamilya mahimong ingon usab ka lisud kauban sa imong mga higala—usahay gani mas lisud pa. Maayo nga dili nimo gustong ipaubos ang imong mga hiyas. Bisan kon kini dili mabati nga ingon niini karon, ang pagbutang og una sa Dios sa imong kinabuhi mopanalangin sa imong pamilya ug motugot kanimo nga mahimong ehemplo ngadto kanila. Apan sila imo pa gihapon nga pamilya, ug importante nga mogahin og panahon uban kanila. Makasugyot ka og laing mga salida nga imong nahibaloan nga makapadasig o mga kalihokan sama sa mga dula o pag-hike.

Mahinungdanon nga pahibaloon ang imong pamilya sa imong mga sumbanan sa sinsero, mapaubsanon nga paagi. Sulti sa tinuod ngadto kanila kon nganong imong gipili nga dili motan-aw sa pihong matang sa mga salida. Pag-ampo nga ikaw adunay kalig-on sa pagsulti niini ngadto kanila ug adunay diwa sa pagsinabtanay. Unta, ang imong pamilya motahud kanimo tungod niini, ug ikaw motabang nga mapabilin ang Espiritu diha sa imong kasingkasing samtang imong gisalikway ang bati nga salida.