Mensahe sa Visiting Teaching
Ang Kasaysayan ug Panulundon sa Relief Society
Tun-i kini nga materyal ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.
Hugot nga Pagtuo • Pamilya • Kahupayan
Si Eliza R. Snow nakahinumdom ni Propeta Joseph Smith nga nagtudlo nga “bisan tuod ang ngalan [Relief Society] mahimong moderno, apan ang institusyon karaan og sinugdanan.”1
Ang Langitnong Amahan ug Iyang Anak, si Jesukristo, mibisita kang Joseph Smith ug, pinaagi kaniya, mipahiuli sa kahingpitan sa ebanghelyo dinhi sa yuta. Ang Relief Society kabahin niana nga pagpahiuli. Ang pag-organisar sa Simbahan wala gayud mahingpit hangtud ang mga kababayen-an na-organisar.2
Sa mosunod nga mga bulan, ang matag Mensahe sa Visiting Teaching mohatag kanato og oportunidad sa pagkat-on og mas daghan kabahin sa kasaysayan sa Relief Society ug ang bahin niini sa gipahiuli nga ebanghelyo. Alang sa daghang mga rason, ang pagsabut sa atong kasaysayan dili lamang importante apan kinahanglanon.
Una, ang pagsabut sa atong kasaysayan nagdasig kanato nga mahimong Diosnong mga babaye nga kita angay nga mamahimo. Pinaagi sa pagsunod sa mga ehemplo sa dungganong mga babaye nga Santos sa Ulahing mga Adlaw, kita makakat-on gikan sa nangagi unsaon pag-atubang sa umaabut.3
Ikaduha, ang atong kasaysayan nagtudlo nga ang susamang mga baruganan nga anaa sa unang panahon sa Simbahan mao ang atong mga baruganang pundasyon [foundational principles] karon. Kini nga kahibalo ug ang atong mga katuyoan—makapalig-on sa pagtuo ug personal nga katarung, makapalig-on sa mga pamilya ug mga panimalay, ug makatabang niadtong nanginahanglan—makahimo og koneksyon tali sa atong nangagi ug sa karon.
Ikatulo, samtang atong gihatagan og bili ang atong kasaysayan, kita mas makapakigbahin sa atong espirituhanong panulundon. Si Presidente Henry B. Eyring, Unang Magtatambag sa Unang Kapangulohan, miingon: “Gipasa ninyo ang panulundon samtang gitabangan ninyo ang uban sa pagdawat sa gasa sa gugmang putli. … Ang kasaysayan sa Relief Society narekord pinaagi sa mga pulong ug mga numero, apan ang panulundon gipasa kini gikan sa kasingkasing ngadto sa kasingkasing.”4
Sa katapusan, ang pagsabut sa atong kasaysayan makatabang kanato nga mahimong epektibo nga bahin sa kaugmaon sa Relief Society. Si Presidente Spencer W. Kimball (1895–1985) mipasabut, “Kita nasayud nga ang mga babaye kinsa adunay dakong pasalamat sa nangagi mabalaka kabahin sa paghulma og usa ka matarung nga kaugmaon.”5
Julie B. Beck, kinatibuk-ang presidente sa Relief Society.
Gikan sa mga Kasulatan
Ester 9:28–29; Mga Taga-Roma 16:1–2; Alma 37:8; Moroni 7:45–47
Gikan sa Atong Kasaysayan
“Ang Relief Society mao ang organisasyon sa Ginoo alang sa mga kababayen-an.”6 Sa iyang kapasidad isip usa ka propeta, si Joseph Smith miorganisar sa Relief Society niadtong Marso 17, 1842. Ang gamay, lain-lain nga grupo niadtong unang miting mao ang mapahinunguron nga mga babaye, susama sa mga sister sa Relief Society karon. “Ang kinabataan mao ang tulo ka mga teenager, ug ang kinatigulangan, usa ka babaye nga singkwentahon na. Napulog usa sa mga babaye minyo, duha ka biyuda, unom ka dili minyo, ug ang status sa usa wala mahibaloi. Ang ilang mga edukasyon ug background managlahi gayud, ingon man sa ilang ekonomikanhong mga kahimtang. Ang ilang pagkamanaglahi makita sa makadaghan samtang ang gidaghanon sa mga sakop sa organisasyon nagpadayon sa pagtubo, apan sila ingon niana ug nagpadayon nga mahimong usa.”7
Ang Relief Society sa Nauvoo, ni Walter Rane, sa maayong kabubut-on sa Church History Museum