Mensahe sa Unang Kapangulohan
Ang Ginoo Nagkinahanglan og mga Misyonaryo
Sa miaging Oktubre sa kinatibuk-ang komperensya mitawag ko og dugang nga mga misyonaryo. Kada takus, makahimo nga batan-ong lalaki kinahanglan moserbisyo og misyon. Ang mao nga pagserbisyo usa ka katungdanan sa priesthood—usa ka obligasyon nga gipaabut sa Ginoo kanato kinsa gihatagan og hilabihan ka daghan. Batan-ong mga lalaki, gi-awhag ko kamo sa pagpangandam alang sa pagserbisyo isip misyonaryo. Ipabilin ang inyong kaugalingon nga limpyo ug putli ug takus nga morepresentar sa Ginoo. Imintinar ang inyong kahimsug ug kalig-on. Pagtuon sa mga kasulatan. Kon kini anaa, apil sa seminary o institute. Himoa nga kamo mapamilyar sa handbook sa misyonaryo nga Isangyaw ang Akong Ebanghelyo.
“Mga sister, ingon nga kamo wala sa samang responsibilidad sa priesthood sama sa batan-ong mga lalaki sa pagserbisyo isip full-time nga mga misyonaryo, makahimo usab kamo og bililhong kontribusyon isip mga misyonaryo, ug among gihangup ang inyong pagserbisyo.
Ngadto sa mga hamtong nga mga kaigsoonan sa Simbahan, mopahinumdom ko kaninyo nga ang Ginoo nagkinahanglan og daghan, daghan pa kaninyo sa pagserbisyo isip full-time nga mga misyonaryo. Kon wala pa ang panahon sa kinabuhi nga kamo makaserbisyo og misyon isip magtiayon, gi-awhag ko kamo sa pagpangandam karon alang sa adlaw nga kamo ug ang inyong kapikas makahimo sa ingon. Adunay pipila ka mga higayon sa inyong kinabuhi nga matagamtaman ninyo ang nindot nga diwa ug katagbawan nga moabut tungod sa paghatag og full-time nga pagserbisyo nga manag-uban diha sa buhat sa Manluluwas.
Karon, ang pipila kaninyo tingali maulawon o moisip sa inyong kaugalingon nga dili angayan sa pagtubag sa tawag sa pagserbisyo. Hinumdumi nga kini buluhaton sa Ginoo, ug kon kita anaa sa sugo sa Ginoo, kita may katungod sa panabang sa Ginoo.” Ang Ginoo molig-on sa likud aron sa pag-alsa sa palas-anon nga gibutang niini.
Ang uban, bisan og takus nga moserbisyo, mobati nga adunay mas importante nga mga prayoridad. Hinoon nakahinumdom ko sa saad sa Ginoo: “Kay kanila nga nagpasidungog kanako ako magapasidungog” (1 Samuel 2:30). Walay usa nato ang makapasidungog sa atong Langitnong Amahan ug sa atong Manluluwas labaw pa kay sa pagserbisyo isip usa ka mahalaron, buotan nga misyonaryo.
Usa ka ehemplo sa mao nga serbisyo mao ang misyonaryo nga kasinatian ni Juliusz ug Dorothy Fussek, kinsa gitawag nga magmisyon sa Poland. Si Brother Fussek natawo sa Poland. Makasulti siya sa pinulongan. Gimahal niya ang mga tawo. Si Sister Fussek natawo sa England ug gamay ra og nahibaloan sa Poland ug walay nahibaloan sa mga katawhan niini. Misalig sa Ginoo, ilang gihimo ang ilang buluhaton. Ang trabaho malaay, ang ilang buluhaton hilabiham. Wala pay misyon nga natukod didto sa Poland. Ang buluhaton nga gihatag sa mga Fussek mao ang pag-andam sa paagi aron ang usa ka misyon matukod.
Nawad-an ba sa paglaum sila si Elder ug Sister Fussek tungod sa kadako sa ilang buluhaton? Wala gayud. Nasayud sila nga ilang tawag gikan sa Dios. Nag-ampo sila sa Iyang balaan nga panabang, ug ilang gihalad ang ilang tibuok kaugalingon sa ilang trabaho.
Sa mao nga higayon si Elder Russell M. Nelson sa Korum sa Napulog Duha ka mga Apostoles; Elder Hans B. Ringger, kanhi Seventy; ug ako, mikuyog ni Elder Fussek, nga makigkita sa ministro sa relihiyoso nga mga kalihokan, nga si Adam Wopatka, sa gobyerno sa Poland. Nakadungog kamo nga siya miingon, “Ang inyong simbahan welcome dinhi. Mahimong magtukod kamo og mga building: mahimong mopadala kamo og mga misyonaryo. Kining tawhana,” nagtudlo ngadto ni Juliusz Fussek, “maayo kaayong miserbisyo sa inyong simbahan. Angay kamong magpasalamat sa iyang ehemplo ug sa iyang trabaho.”
Sama sa mga Fussek, buhaton nato unsa ang angay natong buhaton sa buhat sa Ginoo. Dayon kita, uban nila ni Juliusz ug Dorothy Fussek, mopalanog sa Salmo:
“Ang akong tabang nagagikan sa Ginoo, nga nagbuhat sa langit ug yuta.
“… Siya nga nagabantay kanimo dili mahatagpilaw.
“Ania karon, siya nga nagabantay sa Israel dili mahatagpilaw ni mahikatulog” (Salmo 121:2–4).
Mga paghulagway sa litrato ni Hyun Gyu Lee, Matthew Reier, ug Craig Dimond
Mga litrato pinaagi ni Richard M. Romney ug David Newman