Unsay Bag-o diha sa Personal nga Kauswagan?
Karon mao ang panahon sa pag-andam alang sa maanindot nga kaugmaon nga nagpaabut kaninyo. Ang Personal nga Kauswagan makatabang kaninyo sa pag-andam ug makatabang kaninyo sa pagsabut sa inyong kaugalingon isip anak nga babaye sa Dios.
Ang Personal nga Kauswagan dili usa ka programa nga layo sa inyong kinabuhi. Kini makatabang kaninyo nga mas maduol sa Manluluwas, makaserbisyo sa uban, makakat-on og mga kahanas sa pagpangulo, makapalambo og mga relasyon, ug makaandam alang sa mga pakigsaad sa templo. Ang Personal nga Kauswagan makatabang kaninyo sa pagpalambo og matarung nga mga buluhaton. Kon kamo mobuhat og gagmayng mga butang sa makanunayong paagi, kini mahimong kabahin kon si kinsa kamo ug kini makapausab kaninyo. Tinuod gayud nga “pinaagi sa gagmay ug yano nga mga butang ang mga dagko nga butang ipahinabo” (Alma 37:6).
Ang giusab nga booklet sa Personal nga Kauswagan adunay templo sa hapin. Ang templo mao ang rason sa tanan natong gibuhat diha sa programa sa Young Women. Kami naglaum nga sa inyong pagtan-aw sa hapin, kamo makahinumdom nga ang pag-apil sa Personal nga Kauswagan makatabang kaninyo sa pagpangandam sa paghimo ug paghupot sa mga pakigsaad sa templo sa umaabot nga adlaw.
Pink ang bag-ong booklet sa Personal nga Kauswagan! Kining humok nga babayen-on og kolor maoy usa ka pahinumdom nga kamo anak nga babaye sa atong Langitnong Amahan nga walay samang babayen-on nga mga kinaiya, gasa, ug tahas.
Sa bag-ong booklet, ang pipila sa mga kasinatian ug mga proyekto kabahin sa mithi giusab og gamay aron mahimong mas bag-o ug mas makapunting ngadto sa mga pakigsaad sa templo nga inyong pagahimoon ug pagahuptan sa umaabut nga adlaw. Karon pipila ka mga tubag sa inyong mga pangutana.
Unsaon nako sa pagsugod sa Personal nga Kauswagan? Ang pagsugod sayon ra! Pagsugod og usa sa bisan unsa nga mithi nga kamo interesado. Dili kinahanglan nga inyong buhaton ang mga mithi nga magsunod. Ang pagbuhat sa gikinahanglang mga kasinatian makatabang kaninyo sa pagsabut sa mithi ug nganong kini importante sa inyong kinabuhi.
Kinsa ang makaapil? Si bisan kinsa nga may tinguha mahimong moapil. Mahimo ninyong dapiton ang inyong mga higala kinsa dili miyembro sa Simbahan sa pagbuhat sa Personal nga Kauswagan uban kaninyo. Ang inyong mga inahan o ubang mga babaye mahimo usab nga moapil.
Kanus-a dayon ko magsugod? Sa inyong pag-abli sa libro sa Personal nga Kauswagan, kamo makakita og pipila ka mga butang nga inyoha nang gibuhat sa eskwelahan o sa panimalay. Hatagi ang inyong kaugalingon og credit alang niining mga butanga ug pagplano og una aron kamo makahimo niini nga may katuyoan. Makahimo kamo sa inyong kaugalingong gipas-pason. Kon kamo 12 anyos ug mohimo og usa ka kasinatian matag bulan ug duha ka proyekto matag tuig, kamo makakompleto na sa panahon nga kamo usa na ka Laurel. Dayon kamo adunay oportunidad sa pagtudlo og laing batan-on nga babaye kinsa nagtrabaho sa ilang Personal nga Kauswagan. Kon inyo kining buhaton, kamo makaangkon og Honor Bee, nga nagsimbolo sa paghimo og dugang nga paningkamot sa pagserbisyo sa uban.
Makahimo ba ako sa Personal nga Kauswagan sa Mutual? Makahimo kamo og pipila sa inyong Personal nga Kauswagan sa Mutual. Ang proyekto mahimong inyong kalihokan sa Mutual. Makatrabaho usab kamo sa Personal nga Kauswagan sa inyong klase sa Young Women samtang kamo nagkat-on kabahin sa mga mithi ug pagtuon sa mga kasulatan.
Unsa nga matang sa mga oportunidad sa pagpangulo ang mahatag niini kanako? Samtang kamo nangandam sa paghuman sa 10 ka oras nga proyekto, mahimo ninyong dapiton ang ubang batan-ong mga babaye sa pagtabang kaninyo. Ang pagbuhat niini makatabang kaninyo sa pagkat-on sa mga kahanas sa pagpangulo alang sa inyong mga tahas sa umaabot isip usa ka asawa, inahan, ug homemaker. Kini usab makatabang kaninyo sa pagkat-on unsaon sa pag-organisar, pakig-istorya, ug pagkompleto og lisud nga buluhaton.
Nganong gisugo ako sa pagtipig og journal? Kini nga journal mahimong bililhong rekord kaninyo sa inyong mga adlaw sa organisasyon sa Young Women ug sa mga pasalig nga inyong gihimo. Ang pagsulat sa inyong journal makadapit usab sa pagpakig-uban sa Espiritu Santo.
Ang mga panalangin sa Personal nga Kauswagan molungtad og lapas pa sa mga katuigan sa Young Women. Ang inyong hugot nga pagtuo ug pagpamatuod sa Manluluwas ug sa Iyang gipahiuli nga ebanghelyo molig-on. Kamo makaandam sa inyong balaanong misyon ug mga tahas dinhi sa yuta. Kamo makatilaw sa katam-is sa pagserbisyo ug ang hingpit nga kalipay sa matarung nga mga binuhatan. Kamo makabati sa mga aghat sa Espiritu Santo, kinsa mogiya ug motudlo kaninyo. Kamo makapalambo og usa ka sumbanan sa pagpuyo nga makapanalangin sa inyong kinabuhi, karon ug hangtud sa kahangturan. Kini usa ka sumbanan sa paglambo ug sa paghimo og paghupot sa mga pakigsaad sa templo. Unta kamo mapanalanginan samtang kamo magsugod niining sumbanan sa kauswagan. Kami naghigugma kaninyo! Ang Ginoo naghigugma kaninyo! Kamo Iyang bililhong mga anak nga babaye.
Ang simbolo sa Beehive mao ang beehive, nga usa ka pahinumdom sa panag-uyon, kooperasyon, ug trabaho.
Ang simbolo sa Mia Maid mao ang rosas, nga usa ka pahinumdom sa gugma, hugot nga pagtuo, ug kaputli.
Ang simbolo sa Laurel mao ang laurel wreath, nga nagbarug sa kadungganan ug katumanan.
Kwentas nga adunay logo sa Sulo
Sa inyong pagsulod sa organisasyon sa Young Women, ang inyong mga lider mohatag kaninyo og usa ka kwentas nga adunay logo sa sulo. Kini nga kwentas nagsimbolo sa inyong pasalig sa pagbarug sa kamatuoran ug pagkamatarung sa tanan nga mga panahon ug diha sa tanan nga mga butang ug diha sa tanan nga mga dapit. Ang simbolo sa kalayo makapahinumdom usab kaninyo sa “pagtindog ug pagpakita, aron ang inyong kahayag mao ang usa ka sukaranan alang sa tanan nga mga nasud” (D&P 115:5). Isul-ob kining kwentas nga mapagarbuhon ug hinumdumi ang inyong pasalig.
Booklet sa Personal nga Kauswagan
Kon inyong makompleto ang mga kasinatian ug mga proyekto alang sa usa ka mithi, kamo makadawat og usa ka sticker nga gold nga ibutang sa luyo sa inyong booklet sa Personal nga Kauswagan. Idugang ang petsa kanus-a ninyo nakompleto kini nga mithi. Ang inyong booklet ug journal mahimo ninyong personal nga rekord sa tanang maayong mga butang nga inyong nahimo.
Mga Sertipiko sa Pagbalhin [Advancement Certificate]
Samtang kamo mobalhin gikan sa usa ka grupo sa kaedad ngadto sa lain, kamo pagasidunggan sa inyong bishop o presidente sa branch og usa ka sertipiko sa pag-ila ug paghuman. Ibutang kini sa usa ka espesyal nga lugar aron sa pagpahinumdom kaninyo sa mga butang nga inyong nakat-unan ug nahuman sa inyong katuigan sa Beehive, Mia Maid, ug Laurel.
Mga Laso sa Kasulatan
Sa inyong pagkompleto sa mga kasinatian ug proyekto alang sa usa ka mithi, kamo makadawat og usa ka laso sa pagtimaan sa inyong paborito nga kasulatan kabahin sa mga mithi. Ang mga laso mao ang kolor sa mga mithi: puti alang sa hugot nga pagtuo, gold alang sa hiyas, ug uban pa. Ang inyong lider mopresentar niining laso diha kaninyo sa miting sa Young Women.
Pahalipay sa Batan-ong Pagkababaye
Sa inyong pagkompleto sa Personal nga Kauswagan, inyong irekord ang inyong pagpamatuod diha sa inyong journal ug magpainterbyu sa bishop o presidente sa branch. Kamo dayon mahimong makadawat sa inyong Pahalipay sa Batan-ong Pagkababaye. Ang medalyon giilisan aron sa paglakip sa mga simbolo sa grupo sa kaedad og ingon man ang templo. Kini usab adunay gamay nga ruby sa tunga sa rosas sa Mia Maid. Kini nga ruby nagsimbolo nga kamo nakakompleto sa inyong Personal nga Kauswagan ug sa bag-ong mithi sa hiyas. Ang ruby makapahinumdom kaninyo nga ang usa ka mahiyason nga batan-ong babaye bililhon ug ang “iyang bili labaw pa kay sa mahal nga mga bato [rubies]” (Mga Proverbio 31:10).
Honor Bee
Human sa pag-angkon sa inyong medalyon, mahimo kamong magpadayon sa pag-angkon sa Honor Bee pinaagi sa pagbasa og usab sa Basahon ni Mormon ug pagbuhat og dugang nga serbisyo, lakip ang pagtabang sa lain nga batan-ong babaye sa Personal nga Kauswagan.
Litrato ni Sister Dalton pinaagi sa © Busath Photography; mga drowing sa linya pinaagi sa © Dover Publications; putot sa rosas pinaagi ni Traci O’very Covey; gilitratohan ni Robert Casey
Paghulagway sa litrato pinaagi ni John Luke © IRI