Gikan sa Natad sa Misyon
Diha sa Presensya sa mga Anghel
Sa dihang gi-set apart ko isip usa ka misyonaryo, ang akong presidente sa stake mihatag kanako og saad nga usahay akong mabati ang presensya sa mga anghel ug sila manalipod kanako.
Pagka 2003 gitawag ko sa pagserbisyo og misyon didto sa Ivory Coast, sa kasadpang Africa. Samtang nagsiksik ko, akong nahibaloan nga ang nasud daw nahiagum sa kanunay nga gubat nga sibil, apan nahupay ko sa kasayuran nga adunay ceasefire sa dapit. Dugang nga kahupay ang miabut sa dihang gi-set apart ko. Ang presidente sa stake mihatag kanako og saad nga samtang nagserbisyo ko, usahay akong mabati ang presensya sa mga anghel ug sila manalipod kanako. Gisaaran usab ako nga kon ako magmasulundon, luwas ko nga makapauli.
Sa unang mga bulan sa akong misyon, ang presidente sa misyon mitambag kanamo sa pagpangandam. Sa among apartment sa kinapusurang siyudad sa Abidjan, nag-andam kami og tulo ka adlaw nga suplay sa pagkaon ug tubig, ug panahon sa mga miting nakadawat kami og pagbansay-bansay kabahin sa unsay buhaton kon ang kagubot moabut.
Sa gihapon, nahadlok kami sa dihang ang mga rebelde miguba sa ceasefire pagka Nobyembre 4, 2004. Ang among mga lider sa misyon mihatag kanamo og alas 6:00 sa gabii nga curfew. Atol sa among katapusang appointment sa pagtudlo pagkasunod adlaw, nakadungog kami og kalit nga pagpamomba. Diha dayon among gitapus ang pag-ampo, gibinlan ang pamilya og kapitulo gikan sa Basahon ni Mormon nga basahonon, ug nagdaling mipauli. Ang laing magkompanyon sa among apartment miabut wala madugay sunod kanamo. Ang mga assistant mitawag ug misulti kanamo nga dili mogawas sa among mga apartment ubos sa bisan unsa nga kahimtang—dili alang sa simbahan o bisan sa pagkaon. Among nahibaloan nga ang pipila ka French nga mga peacekeeper namatay sa mga air strike, busa giataki sa France ang airport sa mga sundalo, nga nakapapiang sa gamay nga Ivorian air force. Agig reaksyon, daghang mga kagubot ang nahitabo sa siyudad.
Napulo ka liboan ka mga nagprotesta ang nagbahis sa mga kadalanan, nagwara-wara og mga atsa, gipangguba ang mga tindahan sa mga French, ug gipanghasi ang mga balay diin gituohan nga gipuy-an sa mga French. Gikan sa among bintana, among makita ang hulagway sa kapintas. Nasayud kami nga anaa kami sa kakuyaw tungod sa among puti nga pamanit.
Pagka Dominggo sa hapon, Nobyembre 7, taliwala sa mga tingog sa pagsinggit, mga buto sa armas, ug mga pagpamomba, nagpahigayon kami og sakrament miting sa among apartment nga may upat lamang ka mga partisipante. Human sa pagpanalangin ug pagpasa sa pan ug sa tubig gikan sa among tulo ka adlaw nga suplay sa pagkaon, matag usa kanamo mipakigbahin og kasulatan ug mihatag sa pagpamatuod. Akong gibasa ang Doktrina ug mga Pakigsaad 84:88: “Ug kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo.” Samtang ako nagbasa, namalandong ako sa panalangin nga gihatag kanako sa akong presidente sa stake, ug ako nasayud nga ako luwas ra.
Anaa ra kami sa among apartment sulod sa usa ka semana. Ang mga lider sa ward ug mga miyembro mibisita kanamo ug gidad-an kami og pagkaon. Usa ka miyembro gani ang mikuha sa among mga mensahe og gi-e-mail sa among mga pamilya, sa pagpahibalo kanila nga luwas ra kami. Kini nga tabang sa mga miyembro talagsaon kaayo! Nianang higayuna, ang among mga pamilya ug ang mga miyembro sa Simbahan sa tibuok kalibutan nag-ampo alang sa among kaluwasan. Samtang nag-ampo ang akong pamilya, gibati nila ang kasiguroan nga OK ra ko.
Pagka Biyernes, Nobyembre 12, ang among pagbakwit nagsugod. Ang Ivorian nga mga miyembro sa Simbahan midala kanamo agi sa kadalanan sa Abidjan, ug bisan og nakadungog kami og mga balita nga ang uban nga mga refugee gipasipad-an, naabut kami nga luwas agi sa mga ali ngadto sa panimalay sa ambassador nga British. Dayon ang British nga mga kasundalohan mipabakwit kanamo gikan sa nasud, ug ang mga pag-ampo sa akong pamilya gidungog sa dihang nakita nila ang duha ka lain pa nga mga elder ug ako diha sa balita nga gipabakwit. Inig ngitngit sa kagabhion, ang mga miyembro magdala og laing dili African nga mga misyonaryo ngadto sa mission home. Gikan didto ang Italian air force midala kanila ngadto sa Ghana, diin kami gihiusa.
Bisan pa man sa daghang mga pagpangataki sa mga langyaw sa tibuok nasud, walay misyonaryo ang napasipad-an atol sa mga kagubot, ug walay mga apartment sa mga misyonaryo ang gipanglungkab. Tungod kay naminaw kami sa tambag sa presidente sa misyon, luwas kami sa panimalay sa dihang ang kagubot miabut ug aduna kami mga suplay nga gikinahanglan aron kami mabuhi. Ug gani mas labaw pa ka makapahupay kay sa proteksyon sa military mao ang pagkasayud nga anaa kanamo ang proteksyon sa Ginoo.
Sa dihang gibakwit kami, akong nahibaloan nga nianang Dominggo sa hapon human sa among sakrament miting, usa ka grupo sa mga nagprotesta nangandam aron sa pag-ataki sa among apartment. Usa sa among mga silingan misinggit, “Dili sila mga French!” apan wala sila mobiya. Sa katapusan, laing silingan ang misinggit, “Mga misyonaryo sila!” ug ang mga manggugubot namahawa. Nahinumduman nako pag-usab ang mga pulong, “Ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo,” ug akong naamgohan nga akong gisunod ang saad gikan sa panalangin sa akong presidente sa stake. Akong nakita ang panagna nga natuman.
Paghulagway pinaagi ni Richard Hull