Ang akong igsoong lalaki naglisud sa paghukom kon ang Simbahan tinuod ba. Unsaon man nako sa pagtabang kaniya?

Suportahi siya; gikinahanglan niya nga mobati og gugma—dili pagpamugos—gikan sa iyang pamilya. Ikonsiderar ang pagpangutana kaniya kon unsa ang iyang mga problema ug mga pagduhaduha. Pahumana siya og sulti nganha kanimo sa tanan niya nga mga problema sa dili pa ikaw motubag. Basin kon ang iyang mga problema sosyal o personal, imbis nga pagtuo. Tingali dili nimo mahatag ang tanang mga tubag nga iyang gipangita, apan ikaw makapasalig kaniya nga ang mga solusyon makit-an ra.

Hangyoa siya sa pag-ampo uban kanimo mahitungod sa iyang mga kabalaka ug awhaga usab siya sa pag-ampo nga siya ra mahitungod niini. Magmahimong sensitibo sa kamatuoran nga ang ubang tawo nagkinahanglan og mas taas nga panahon sa pagdawat og mga tubag kay sa uban, ilabi na kon kinahanglan nila nga mosuta sa mga butang nga sila mismo. Mahimo kang mobasa uban kaniya mahitungod sa pag-ampo ug sa pag-angkon og pagpamatuod gikan sa Alma 32, 3 Nephi 17, o Moroni 10. Usab, mahimo ka nga moawhag kaniya sa pagpakig-istorya sa inyong mga ginikanan, sa inyong bishop o presidente sa branch, o sa uban nga matinud-anon nga mga miyembro sa Simbahan nga nakaagi sa susama nga mga problema.

Kon giaghat, ihatag ang imong pagpamatuod ngadto kaniya. Pahibaloa siya kon unsay imong gibati mahitungod sa ebanghelyo.

Katapusan apan dili kinaminusan, hinumdumi nga ang Espiritu mao ang mohatag og pagsaksi sa kamatuoran. Aron maangkon ang pagpamatuod o makaamgo nga aduna na siya niini, ang imong igsoong lalaki kinahanglang makat-on kon unsaon sa pag-ila ang Espiritu Santo. Mahimong nagkinahanglan kini og panahon, ug dili mahimong ipugos. Mahimo ka nga mosulti kaniya og mga kamatuoran sa tibuok adlaw, apan pinaagi lamang sa usa ka makahuluganon nga koneksyon uban sa Espiritu nga siya makaangkon og pagpamatuod.

Pag-ampo alang kaniya ug awhaga siya, suportahi siya ug paminawa siya, apan hinumdumi nga gawasnon siya sa pagpili. Makapili siya sa labing maalamon nga paagi pinaagi sa pagsunod sa giya sa Espiritu.

Tabangi ang mga minahal sa kinabuhi nga makaangkon og pagpamatuod pinaagi sa pagbasa gikan sa mga kasulatan ug sa pagtudlo kanila kon unsaon sa pag-ila sa pagsaksi sa Espiritu Santo.