Nganong kinahanglan pa man ko nga mag-ampo nga nag-ampo na man ko uban sa akong pamilya?
Hunahunaa nga nanlimbasug ka sa usa ka personal nga problema. Komportable ka ba nga mopakigbahin sa imong panlimbasug diha sa grupo, o mas pilion ba nimo nga isulti sa pribado ngadto sa usa ka tawo?
Si Presidente Spencer W. Kimball (1895–1985) mitudlo: “Ang uban nga mga butang labing mapahayag sa pribado nga pag-ampo, diin kita dili kinahanglang maghunahuna mahitungod sa oras o sa pagkakumpidensyal sa atong mga pag-ampo. Ang pag-ampo nga mag-inusara bililhon kaayo ug makahatag og kaayohan. Ang pag-ampo nga mag-inusara makatabang kanato sa paglikay sa kaulaw o pagpakaaron-ingnon, bisan unsa nga nagpabiling pagpanglingla; makatabang kini kanato sa pag-abli sa atong mga kasingkasing ug hingpit nga matinuoron ug madungganon sa pagpahayag sa tanan natong mga pangandoy ug mga kinaiya.”1 Kanang butang nga kita dili komportable nga i-ampo diha sa atong pamilya nga mga pag-ampo mahimo—ug sa kanunay kinahanglan—nga ipahayag diha sa pribado nga pag-ampo.
Ang atong personal nga mga pag-ampo nagtugot kanato nga mahimong labing madayganon sa atong mahigugmaon nga Langitnong Amahan ug hisgutan ang mga labing gikahadlokan ug mga gitinguha sa atong mga kasingkasing. Diha sa pag-ampo ni Joseph Smith sa pribadong paagi nga iyang nadawat ang pagpadayag nga mao ang sinugdanan sa Pagpahiuli sa ebanghelyo ni Jesukristo. Ang pagpakig-istorya ngadto sa atong Langitnong Amahan sa personal nga paagi nagtugot kanato nga mahimong mas madawaton sa mga pag-aghat sa Espiritu nga gitumong alang sa atong kaayohan.
Hinoon, ang pamilya nga pag-ampo hilabihan usab ka bililhon—kini nagtugot kanato nga mas mapaduol ngadto sa atong Amahan sa Langit ug makabaton og espirituhanon nga mga kasinatian uban sa atong pamilya. Sama sa gitudlo ni Presidente Kimball, “Ang Simbahan nag-awhag nga kinahanglang adunay pamilya nga pag-ampo matag gabii ug matag buntag.”2
“Ikaw kinahanglan mag-ampo sa makusog nga tingog ingon usab diha sa imong kasingkasing; oo, sa atubangan sa kalibutan ingon usab sa tago, sa dayag ug ingon usab sa inusara” (D&P 19:28).