O se Toefuataiga o Mea Uma

Suesue i mea nei, ma pe a talafeagai ai, ia talanoaina faatasi ai ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.

Faatuatua • Aiga • Toomaga

Na faatulagaina e le Perofeta o Iosefa Samita le Aualofa e avea ma se vaega taua o le Ekalesia. I le avea ai ma au peresitene, matou te faamoemoe o le a mafai ona matou fesoasoani ia te oe ia malamalama pe aisea e manaomia ai le Aualofa i lou olaga.

Matou te iloa na faaalia e tamaitai i le Feagaiga Fou le faatuatua ia Iesu Keriso ma auai i Lana galuega. O loo faamatala mai i le Luka 10:39 ia Maria, o lē, na “nofo i tafatafa o vae o Iesu, ma faalogo i lana fetalaiga.” I le Ioane 11:27 o loo molimau mai ai Mareta ia Keriso: “Ua faapea mai o ia ia te ia, Ioe le Alii e: ua ou talitonu lava o oe o le Keriso, le Alo o le Atua, o lē maliu mai i le lalolagi.” I le Galuega 9:36, 39 o loo talanoa mai e uiga i “le tasi soo fafine o Tapita le igoa, … ua tele ana galuega lelei. … Ua tutu mai foi fafine uma lava ua oti a latou tane … ma faaali mai ofu tino ma ofu tetele sa faia e [ia].” O Fipe, i le Roma 16:1–2, o “se auauna o le ekalesia” ma “e toatele ua ia fesoasoani i ai.”

O nei mamanu o le faatuatua, molimau, ma auaunaga na faaauauina i le Ekalesia o aso e gata ai ma na aloaiaina ma faatulagaina o le Aualofa. Na aoao mai Julie B. Beck, le peresitene aoao o le Aualofa: “E pei lava ona valaaulia e le Faaola Maria ma Mareta i le taimi o le Feagaiga Fou e auai i le faatinoina o Lana galuega, ua i ai foi i tamaitai o lenei tisipenisione se tofiga aloaia ina ia auai i le faatinoina o le galuega a le Alii. … O le faatulagaina o le Aualofa i le 1842 na tuufaatasia ai le mana o tamaitai ma o latou valaauga faapitoa ina ia fausia le malo o le Atua.”¹

Tatou te faataunuuina a tatou galuega a o tatou tulimatai atu i faamoemoega o le Aualofa: ia faateleina le faatuatua ma le amiotonu patino, faamalolosia auaiga ma aiga, ma saili ma fesoasoani atu i ē le tagolima.

Ou te molimau atu na faatulagaina ma le paia le Aualofa ina ia fesoasoani i le galuega o le faaolataga. E tofu uma tamaitai taitoatasi o le Aualofa ma se matafaioi taua e faatino i le faataunuuina o lenei galuega paia.

Silvia H. Allred, fesoasoani muamua i le au peresitene aoao o le Aualofa.

Mai Tusitusiga Paia

Ioelu 2:28–29; Luka 10:38–42; Efeso 1:10

Mai lo Tatou Talafaasolopito

Na aoao mai Sister Julie B. Beck “ua tatou iloa e ala mai i le Perofeta o Iosefa Samita o le Aualofa o se vaega aloaia o le Toefuataiga.”² O le faagasologa o le toefuataiga na amata mai i le Uluai Faaaliga i le 1820 ma faaauau ai “o lea fuaiupu ma lea fuaiupu, o lea mataupu ma lea mataupu” (MFF 98:12). Ina ua faatulaga aloaia le Aualofa i le aso 17 o Mati, 1842, na aoao e le Perofeta ia tamaitai e uiga i o latou tulaga taua i le Ekalesia toefuataiina. Na ia faapea atu, “E lei atoatoa lava ona faatulagaina le Ekalesia seia tusa ai ona faatulagaina tamaitai.”³

O Iesu i le Fale o Maria ma Mareta, saunia e Minerva K. Teichert, faaaloaloga a le Falemataaga o Faatufugaga a le Iunivesite a Polika Iaga