I Tala Fou

Ua Mauagofie le Tele o Punaoa i le Faleoloa i Luga o le Initoneti

E faigata i le toatele o le 14 miliona o tagata o le Ekalesia ona malaga atu i se tasi o faleoloa e 130 e aumai ai tusi ma mea e faaaoga a le Ekalesia. O lea ua liliu ai e le Auaunaga o Faletusi a le Ekalesia ia le faiga. Ua mafai nei e se faleoloa fou i luga o le initoneti ona aumai tusi ma punaoa i tagata o le Ekalesia.

Ua faafaigofie e le store.lds.org ona oka punaoa mo le suesueina o le talalelei, musika, ala o faasalalauga, ata ma faatufugaga, ofu malumalu, laei o le malumalu, punaoa mo fale ma aiga, ma isi mea e faaaoga. E lafo atu ia mea e aunoa ma se totogi i le lalolagi atoa, ae na o se totogi laitiiti e faavave ai ona tiliva atu.

E faailoa atu e tagata e asia le saite o latou atunuu. A maua i luga o le initoneti ia faleoloa e faapitoa i atunuu taitasi, o le a faaalia ai oloa o loo maua i le gagana autu a lena atunuu faapea ma o latou tau i le tupe a le atunuu lava ia. E mafai ona sii sa’o mai i le saite ia nisi o mea e leai ni totogi.

O le saite fou ua sui ai le ldscatalog.com ma ua faalauiloaina muamua i le gagana Peretania, Sipaniolo, ma le Rusia. O le a maua isi gagana i masina a sau, e aofia ai le gagana Potukale, Farani, Siamani, Italia, Sapani, Korea, ma Saina, i le faasologa lava lena.