Ua Lava Lona Alofa Tunoa

Saunia e Kimberlee B. Garrett

E pei o le tele o tagata, sa ou tauivi mo le tele lava o mea i lo’u olaga ina ia iloa ai lo’u taua patino. Na ou tau ma ni faafitauli e uiga i lo’u mamafa i le tele o tausaga, lena ua saofaga i o’u lagona le lelei. E ui lava ua tele ni o’u pauna ua pau, ma ua ola nei i se olaga soifua maloloina, ae e i ai lava taimi ou te tauivi ai a au ia ina ia tetee ese na mafaufauga ma lagona le lelei.

I se tasi taeao na faapitoa lava lo’u lagonaina o le faatauvaa ma na ou tau mafaufau pe faapefea ona faaleleia lea tulaga. Na amata ona ou tatalo ma aioi atu i le Tama Faalelagi mo se fesoasoani ina ia faatoilalo ai nei lagona o le lotovaivai. A o ou tatalo, na oo mai i lo’u mafaufau lenei mau: “Afai foi e le ia te outou le faamoemoe, ua faatoilaloina o outou manatu; e oo mai le faatoilaloina o le manatu ona o le amioletonu” (Moronae 10:22).

O le amioletonu na foliga mai o se upu mamafa tele, sa matua mamafa lava na ou le amanaia ai i le taimi muamua lea manatu, ona ou te le manatua se mea sese matuia na ou faia. Ae peitai, na faaauau pea ona i ai lea mafaufauga, o lea na ou tatalo ai, e pei foi ona faatonuina mai e Moronae, ina ia faailoa mai e le Tama Faalelagi lo’u vaivaiga ina ia faamalosia ai a’u (tagai i le Eteru 12:27).

Na ou manatuaina e au lava ia ni mea se tolu i aso e lua ua tuanai ina ua le mafai ona ou faaalia le onosai i la’u fanau. Na ou faamuamuaina o’u lava lagona ma manaoga na i lo o latou manaoga ma ou te lei nofouta foi i o latou lagona. Sa ou lagona le ta’usalaina ma tonu ai o le a faia le mea e sili atu. Na ou faatoese i la’u fanau ma tatalo mo se faamagaloga. O le taimi lava na ou tatalo ai, na aveese atu ai o’u lagona o le le agavaa ae ou lagonaina le filemu lena na tuua au.

E pei lava o se ki o se moli ua kiina i lo’u mafaufau, ma na faatoa ou malamalama ai lava i se mataupu faigofie lea na ou misia i nei mau tausaga. Pe a i ai sa’u agasala e lei foiaina i lo’u olaga, e tusa lava pe laitiiti, ua ou tuuina ia Satani le mana e faatosinaina ai au. Ua ia iloa o’u vaivaiga, ma ua ia iloa upu e “faaosooso ai au” ma “taitaia au i le malaia” (tagai i le MFF 10:22). O le mea moni lava, ou te le ita ia te au lava ia, ae o Satani e ita ia te au ma o le a ia faaaogaina soo se mailei o i ai e liliuese ai au mai le malamalama.

Ae peitai, pe a ou salamo, ou te faalagolago i le mana o Iesu Keriso. Aua e Na te silafia lelei lava le auala e fesoasoani ai ia te au i o’u vaivaiga (tagai i le Alema 7:11–12), o Lona mana e siitiaina au i luga ma faamalosiau ia te au i ala e le mafai ona ou faia na o au.

E oo lava i le Aposetolo o Paulo, sa matua toa lava i le talaiga o le talalelei, ae na puapuagatia i vaivaiga ma na pagatia ai i aafiaga. Ae ui i lea, ina ua ia tatalo e aveesea ia vaivaiga, na tali mai le Alii, “O lo’u nei alofa tunoa e lava lea e fesoasoani ia te oe: aua o le vaivai e faaatoaina ai lo’u mana.” Ona faaauau lea ona faamalamalama mai Paulo, “O lea ua tele ai lava lo’u fiafia i le mitamita i mea ua ou vaivai ai, ina ia tumau i o’u luga le mana o Keriso” (2 Korinito 12:9).

E faapena foi, o le a ou faia le mea sili ina ia ou salamo ma tausi poloaiga ina ia “tumau i ou luga le mana o Keriso” ma mafai ai ona faatumuina au i le filemu ma le alofa.

E pei foi o le Aposetolo o Paulo, o le a ou faia le mea sili ina ia ou salamo ma tausi poloaiga ina ia “tumau i o’u luga le mana o Keriso.”

Ata na tusia e Dilleen Marsh