Savali a le Au Peresitene Sili
Faauta i le Tele O Lo Outou Olioli
E itiiti lava ni nai fiafiaga i le olaga e sili atu le suamalie ma umi ona tumau nai lo le iloaina, na e fesoasoani i isi e tuuina atu le talalelei toefuataiina a Iesu Keriso i o latou loto. O le mauaina o lena olioli o le avanoa lea mo tagata uma o le Ekalesia. Ina ua tatou papatiso, sa tatou faia se folafolaga o le a tatou “laulaututu e fai ma molimau a le Atua i aso uma ma mea uma, atoa ma nuu uma [tatou] te i ai e oo lava i le oti, ina ia togiolaina i [tatou] e le Atua, ma faitauina faatasi ma i latou i le uluai toe tu, ina ia [tatou] maua le ola faavavau” (Mosaea 18:9).
Ua taliaina e tagata uma o le ekalesia se vaega o le tiute ua tuuina atu i le Ekalesia ina ia avatu le talalelei a Iesu Keriso i le lalolagi, i soo se nofoaga ma e po o le a lava le umi o lo latou soifua. Na manino lava le fetalaiga a le Alii: “Faauta, na ou auina atu outou e molimau ma lapatai atu i tagata, e tatau foi i tagata uma ua uma ona lapataiina, ona lapatai i lona tua’oi” (MFF 88:81). E tatau ona i ai i faifeautalai le mana e aoao atu ai i latou e le’i auai i le Ekalesia. E tatau i tagata o le Ekalesia ona i ai le mana e saili ai i latou ua saunia e le Alii e aoao atu e faifeautalai.
E tatau ona faaaoga lo tatou faatuatua faapea ua saunia e le Alii tagata o loo siomia i tatou ina ia aoaoina. E silafia e Ia po o ai i latou ma po o afea e saunia ai i latou, ma e mafai ona Ia taitaiina i tatou ia i latou e ala mai i le mana o le Agaga Paia ma tuuina mai ia i tatou upu e valaaulia ai i latou ina ia aoaoina. O le folafolaga na tuuina atu e le Alii i se faifeautalai i le 1832 o le folafolaga foi lena ua Ia tuuina mai ia i tatou i lo tatou tiute ina ia saili tagata ua saunia mo le aoaoina e faifeautalai: “Ou te auina atu foi ia te ia le Fesoasoani, o lē aoao atu ia te ia le upu moni ma le ala na te alu atu ai; afai foi e faamaoni o ia, ou te toe faaee atu ia te ia fusi saito” (MFF 79:2–3).
Ma o le folafolaga o le olioli sili mo le faifeautalai faamaoni o le folafolaga foi lena mo i tatou o tagata faamaoni o le ekalesia o e ua tuuina atu o tatou loto i le galuega faafaifeautalai:
“Ma o lenei, afai o le a tele lo outou olioli faatasi ma se agaga e toatasi ua oulua aumaia ia te au i le malo o lo’u Tama, faauta i le sili atu o lo outou olioli pe afai lua te aumaia ni agaga e toatele ia te au!
“Faauta, ua i o oulua luma la’u talalelei, ma la’u papa, ma la’u faaolataga.
“Ia ole atu i le Tama i lo’u igoa, i le faatuatua ma le talitonu lua te maua, ma o le a oulua maua le Agaga Paia o lē faaalia mea uma e tatau mo le fanau a tagata” (MFF 18:16–18).
I se faaopoopoga i le fesoasoani mai a le Agaga Paia ina ia tatou iloa ma valaaulia i latou ua saunia e aoaoina, ua valaauina ai e le Alii ma aoaoina taitai e taialaina i tatou. I se tusi na tusia i le aso 28 o Fepuari, 2002, na tuuina atu ai e le Au Peresitene Sili se faaopoopoga i tiutetauave mo le galuega faafaifeautalai i epikopo ma uarota.1 Faatasi ai ma le fesoasoani a le aufono a le uarota po o le paranesi, o le a atiina ae e le komiti faafoe a le perisitua se fuafuaga faafaifeautalai mo le iunite. Ua i ai i lena fuafuaga fautuaga i le auala e mafai ai e tagata o le au paia ona saili i latou ua saunia e aoao e faifeautalai. E i ai se tagata ua tofia e avea ma se taitai misiona a le uarota po o le paranesi. E galulue vavalalata lena taitai misiona ma faifeautalai ma a latou tagata sailiili.
O le tele ia o auala e mafai ai ona e faataunuuina lelei ou lava tiute ma fesoasoani ai i le sailiga o tagata e aoaoina e faifeautalai. O le auala e sili ona faigofie, o le ala sili lea.
Tatalo ina ia taialaina e le Agaga Paia. Talanoa i taitai o le lotoifale ma faifeautalai, ma fesili atu mo sa latou fautuaga ma folafola atu lau fesoasoani ia i latou. Faamalosiau atu ia i latou o loo outou galulue faatasi i lenei galuega. Ma ia avea ma se molimau i taimi uma i au upu ma mea e fai, o Iesu o le Keriso ma e tali mai le Atua i tatalo.
Ou te molimau atu o le a taitaia oe e le Agaga Paia ia i latou o loo saili le upu moni ao e tatalo ma galue mo lena taitaiga. Ma ua ou iloa mai aafiaga o le a faavavau ai pea lou olioli ma i latou o e filifili e talia le talalelei i totonu o o latou loto ma tumau ai i le faatuatua.
Ata na tusia e Welden C. Andersen
Agavale mamao: ata na tusia e Steve Kropp; agavale: ata na tusia e Dilleen Marsh