Autalavou
Siaki le Pa’u
Ina ua 15 o’u tausaga, sa o ai le matou aiga i se tafaoga mai lo matou aiga i Arisona e agai atu i le Iunaite Setete Tutotonu. E tele setete sa matou ui atu ai, e aofia ai ma Kansas, Texas, Arkansas, Misuri, ma Ilinoi.
Sa lelei lava le aluga o le matou tafaoga. Sa matou aoao e fiafia i le fegalegaleai o le tasi ma le isi i le taimi umi e alu ai le veni mai le tasi nofoaga i le isi.
A o matou afe atu i se faleaiga i se tasi afiafi, sa matou naunau lava e maua sina meaai. A o matou feosofi ese mai le veni, sa faafuasei ona ou maua se musumusuga filemu ae malosi na faapea mai ai ou te tilotilo i le pa’u pito i tua o le matou veni. Sa amata ona ou savali atu i le faleaiga, ae sa le mafai ona ou aveesea le lagona. Sa ou tepa mai i tua ona ou tu lea. Sa oo mai le musumusuga i lo’u mafaufau: “Siaki le pa’u pito i tua.” Sa matuai malosi lava na faapea ona le mafai ai ona ou le amanaiaina.
Sa ou alu atu i le itu i tua o le veni ma faalogoina ai se leo pasī. E sa’o lava, sa liki le matou pa’u o le itu taumatau pito i tua, ma sa vave lava ona vaivai. Sa ou tamoe e aumai lo’u tama, le la ua oo i totonu o le faleaiga faatasi ma le matou aiga atoa.
Sa ave e lo’u tama le veni i le pamu penisini e le mamao ese atu, a o lei papaioa le pa’u. Talu ai ona sa le’i leaga le pa’u, o lea sa le taugata ai ma sa vave foi ona lipea. Ma sa mafai ona matou toe faaleleia le pa i ni nai minute a o lei tapunia le pamu mo le po. Ou te le iloa se mea e ono tupu pe ana faapea ou te le amanaiaina le musumusuga. Ae ou te iloa ona sa ou tali atu i ai, sa mafai ai ona faaauau la matou faigamalaga ma le saogalemu ma le faigofie.
Talu mai lena mea na tupu, o taimi uma lava ou te lagona ai le toafilemu i le mana o le Agaga Paia ma le faamanuiaina moni o i tatou o ni tagata o le Ekalesia e maua lena laina faapitoa o fesootaiga. Ou te faafetai mo lena aafiaga, aua o le a ou manatuaina pea, e faavavau ona faamanatu mai ai ia te au e alofa, popole, ma tausia e lo tatou Tama oi le Lagi ia Ana fanau uma.