E Tatau ona Fefaasoaai ia Uso
E pei o le tele o au uso o e e na o le 18 masina e va ai, o Marilia ma Nicole P. o Cuzco, Peru, e tele mea e tutusa ai. E la te fiafia uma i le ceviche, o se meaai faaleatunuu a Peru e faia i le i’a ua uma ona sokaina i le sua o le tipolo. La te fai mai foi o le miti a Liae o le la tala faaletusipaia lea e sili ona la fiafia ai. Ma pe ana faapea o le pese “Ua Sili Oe” ua na o le pau lea o le pese i le tusi pese, la te fiafia uma e usuina pea lava pea.
O Le Faasoaina atu o se Molimau i le Tatalo
O le isi mea la te tutusa ai o se molimau malosi lea e taliina e le Tama Faalelagi ia tatalo.
“Ou te iloa e moni le Ekalesia aua pe a ou tatalo, e Na te taliina mai,” o le tala lea a Nicole, lea e 10 tausaga. “Pe a ou fesili atu ia te Ia mo se fesoasoani, e Na te fesoasoani mai ia te a’u.”
Na faamatala e Nicole se taimi na ma’i tigaina ai sana uo ma fuafua ai e fomai e ave o ia i Lima o le laumua o Peru, ona latou te le iloa se togafiti mo ia. “Ou te le’i manao e alu o ia ona o ia o la’u uo mamae,” o le tala lea a Nicole. “Sa ou aioi atu i le Tama Faalelagi ina ia faamanuia o ia. Na Ia faafofoga i la’u tatalo, ma faamalolo ia te ia.”
O Marilia, e 11 tausaga, na fai mai o le mafuaaga e fiafia ai o ia i le tala i le miti a Liae ona ua i ai na o ia lava i le pogisa, na ia tatalo “ma na tali mai e le Alii”.
“Ou te iloa e moni le Ekalesia ona ou te lagonaina i totonu o lo’u loto pe a ou tatalo,” o lana tala lea. “E faafofogaina a’u e le Atua ma e pe a ou aioi atu i se mea, e Na te tali mai.”
O le isi mafuaaga la te fiafia uma ai i lena tala faatusi paia ona sa usiusitai ia Nifae ma Sama.
O Le Fetufaai o Eseesega e Fesoasoani ai i le Aiga
E ui o mea uma e tutusa ai i laua, e i ai foi i lenei auuso ni eseesega. I le aoga, e fiafia ia Marilia i le saeinisi, a o Nicole e fiafia i le numera. E fiafia Marilia e siva, pese, ma tietie i lana uila. O Nicole e fiafia e taalo volipolo ma fiafia i meaola.
E matua fiafia lava Marilia i le kuka. E fiafia o ia e matamata i ata kuka i le televise. O Nicole e faaaogaina le taimi e auauna atu ai i isi, ma e vave foi lona loto faamagalo.
E faaaoga e teneiti o la’ua lava uiga ma taleni e fesoasoani ai i lo la aiga.
E nonofo Marilia ma Nicole i luga o Mauga o Andes ma o la matua, o la uso laiti e toalua, ma lo la tuagane laitiiti. O le alofa mo lo la aiga o se tasi lea o mea e sili ona taua e fefaasoaai ai le auuso e toalua. Ma e faapei ona fefaasoaai Nifae ma Sama i se naunauga ina ia usiusitai ma fesoasoani i lo la aiga, e faamoemoe foi Marilia ma Nicole o la uiga tutusa ma o la eseesega o le a faamanuiaina ai lo la aiga.
O Mea e Sili ona Fiafia i ai Marilia
-
O le meaai e sili ona fiafia i ai: Ceviche
-
Mau e sili ona fiafia i ai: Miti a Liae (tagai i le1 Nifae 8)
-
Pese e sili ona fiafia i ai: “Ua Sili Oe” (Viiga, nu. 46, 47)
-
Mataupu e sili ona fiafia ai i le aoga: Saeinisi
-
Mea sili e faapasi ai le taimi: Pese, siva, ma le tietie uila
Mea e sili ona fiafia i ai Nicole
-
Meaai e sili ona fiafia i ai: Ceviche
-
Mau e sili ona fiafia i ai: Miti a Liae (tagai i le1 Nifae 8)
-
Pese e sili ona fiafia i ai: “Ua Sili Oe” (Viiga, no. 46, 47)
-
Mataupu e sili ona fiafia ai i le aoga: Numera
-
Mea sili e faapasi ai le taimi: Volipolo
Pe a ma le 11,000 futu (3.4 km) e maualuga ai mai le sami, o Cuzco o se tasi o nuu pito i maualuga i le lalolagi. O le nuu e pe a ma le 900 tausaga le matua, ma e avea ai ma se tasi o nuu e sili ona matua i Amerika.
Ata na tusia e Denise Kirby; ata na pueina e Adam C. Olson