Faaaliga O Lea Mataua ma lea Mataua

Sa tilotilo ma le totoa Luis Andres Varela a o faaputuputu ni mataua i le siusiu o se faaputuga vai ua malo ma laumiumi na tautau ifo i totonu o Ana o Taulape i Honotura. O mataua taitasi ua tupu ai le faaputuga vai malo, o sia mataua ma sia mataua.

Ae e tele atu se mea na vaaia e Luis nai lo na o se faaputuga vai ua malo ma laumiumi—na ia vaaia ai se lesona ia te ia lava.

“O faaputuga vai ua malo e tupu i lea mataua ma lea mataua,” o lana tala lea. “E faapena foi ona tupu a tatou molimau. E aoao mai i tatou e le Agaga Paia i sia mea itiiti ma sia mea itiiti. E fesoasoani mataua taitasi e tele ai lo tatou malamalama i le talalelei.” (Tagai 2 Nifae 28:30.)

E manatua e Luis se mea faapena na tupu i lona olaga. I se tasi aso a o faitau tusitusiga paia a lona aiga, sa ia maua se lagona malū, ma le mautinoa e moni mea sa ia faitauina.

“E na o le 14 ou tausaga, ae ou te iloa ua ou maua se faaaliga ona sa ou lagonaina na ta’u mai e le Agaga Paia ia te au e moni le Ekalesia ma o Iosefa Samita o se perofeta,” o lana tala lea. “Atonu e le tele se mea ua ou mauaina—o loo avea lava a’u ma se mataua itiiti ua malo—ae afai ou te faia le mea e tatau ona ou faia ina ia mafai ona ou maua ai faaaliga, o le a tuputupu ae lo’u iloa ma la’u molimau.”

Fai mai Luis o le alu i le lotu, auai i le seminare, suesue i tusitusiga paia, ma le anapogi ma le tatalo o ia mea uma o le a saunia ai i tatou e maua “lea faaaliga ma lea faaaliga” (MFF 42:61).

“Afai ou te faia nei mea,” na ia fai mai ai, “o le a mafai ona faalauteleina lo’u faatuatua, e pei lava o na mataua ua malo ma feilafi, mai iinei e oo i le lagi.”