O Le Auala Na Ou Iloa Ai
Sa Manaia le Tofo o le Savali
Ou te le’i saili lava mo le Atua, ae ina ua fesili mai ni alii talavou se toalua pe mafai ona la faasoa mai ia te au se savali, na ou filifili loa e faalogo.
E ui ina sa ou papatiso a o pepe i se tasi o lotu ae auai i se isi mai lea taimi i lea taimi i lo’u laitiiti, sa le’i avea lava tulaga faalelotu ma se vaega tele o lo’u olaga. A o o’u tuputupu ae ma avea ma tagata matua, sa fesiita’i soo lo’u aiga, ma na matou le toe auai ai i sauniga tapuai. Na ou talitonu i le Atua, ae ou te le’i matua mafaufau tele ia te Ia po o se lotu.
Na suia uma na mea i le 2006, a o 14 o’u tausaga. Na maliu Pili le tuagane o lo’u tina; o se mea o le 30 ma ona tupu ona tausaga. O le maliu o ia a’o le’i taitai, na ou iloa ai lo’u alofa tele ia te ia ma mafua ai ona ou tuufesili ia te au lava. O fea na ia alu i ai ina ua maliu? Pe na faaauau ona ia ola pea ma maua se lumanai? O le a se tulaga e oo i lana fanau ma isi tagata o le aiga na ia tuua? O le a se uiga o lona olaga? O le a se uiga o lo’u olaga?
Na feoai solo nei manatu i lo’u mafaufau mo le tele o masina na sosoo ai. I se tasi afiafi ia Setema 2007, na matou tuua ai ma lo’u tina, ma nai o’u tei laiti e toatolu se tamai faleaiga i lo matou nuu o Haverhill, Massachusetts, ISA, ma tutu e saofafai i se nofoa laupapa. Na o mai ni alii talavou se toalua e suti uli, ofutino papae, ma fusiua ma faafeiloai i matou. Na fai mai se tasi o i laua, “Ou te iloa e foliga faigata le talanoa i ni tagata se toalua tou te le iloa, ae e mafai ona ma faasoa atu se savali ia te outou?”
Na matou ioeina. Na ou iloa o le a la talanoa mai ia i matou e uiga i le lotu, ma na faagaeetia au i lo la tuu faamalosi mai o se kata po o se tamaitusi ia i matou ma savavali ese atu. Nai lo lena, na foliga mai na faamaoni lava lo la fiafia mai ia i matou ma naunau mai e uiga i le la savali. I le faaiuga o le la savali, na la fesili mai ai pe mafai ona la asiasi mai i lo matou aiga. Na ioe i ai lo’u tina ma faatulagaina loa se taimi, ma o lea ou te faafetai ai ia te ia mo lena tulaga ua avea ma se suiga maoae mo le lelei i lo’u olaga.
Na amata ona matou aoaoina le talalelei. Ina ua mavae sina taimi na amata ona pisi ia Tina i le tele o isi mea ma sa le toe faaauau ai ona feiloai ma faifeautalai, ae na ou faia pea.
Sa faigofie lava ona matou fesootai ma Elder Kelsey ma Elder Hancock. Masalo o se isi vaega o le mafuaaga ona e matutua teisi atu lava nai lo a’u. Sa ou lagona le alofa maoae mai ia i laua ma mo i laua. E le’i leva ae ou lagonaina lena lava alofa mai tagata o le uarota ma mai isi talavou i la’u siteki.
Na aoaoina a’u e faifeautalai i le ata o le faaolataga, lea na taliina a’u fesili e uiga i le tuagane o lo’u tina ma e uiga i lo’u lava faamoemoega i le olaga. Na faailoa mai foi ia te au e faifeautalai le Tusi a Mamona. Na ou manatua le faitauina o le Alema 32 e uiga i le atiina ae o le fatu o le faatuatua ma lona tofo lelei (tagai i le fuaiupu e 28). O lena faamalamalamaga o le tulaga tonu lava lea na foliga mai ai le Tusi a Mamona ia te a’u. O mea na ou faitauina ma mea na aoaoina mai e faifeautalai ia te au na logo lelei, lagona lelei, ma na tofo lelei.
Na ula lo’u tina ia te au ma fai mai o lo’u “taimi o se uga” ona ou te sola i lo’u potu ma faaalu le tele o itula i le faitauina o le Tusi a Mamona. E ui ou te le’i iloaina o’u lagona o le Agaga Paia i lena taimi, ae na ou lagona o le ala sa’o lea.
Ina ua fesiligia au e faifeautalai ina ia papatiso, sa la fautuaina a’u e tatalo e uiga i la’u faaiuga. Ina ua ou tatalo ia iloa pe o le auai i Le Ekalesia a Iesu Keriso o Aso e Gata Ai o se mea lea e tatau ona ou faia, sa ou mauaina se tali tuusa’o mai lava, ma na faateia ai a’u. Sa manino le faatonuga: fai lou papatisoga.
Ou te manatuaina lelei lava le aso na ou papatiso ai—aso 15 o Tesema, 2007. A o ma tutu i le vai malulu ma Elder Kelsey ma siiina lona lima i le sikuea, sa faatumulia a’u e le Agaga; ma sa foliga mai o le a pulea lo’u tagata atoa. E mafai ona ou faapea atu sa ou ataata mai le isi taliga i le isi taliga, ae e le taitai latalata lena faamatalaga i le tulaga na ou lagonaina.
Ina ua uma lo’u papatisoga sa faaauau pea ona ou lagonaina le Agaga. Sa ou lagona le mama. Na ou iloa ua magalo a’u agasala. Sa ou lagona le faamaoniga mai a le Tama Faalelagi, e moni lava, o le ala lava lea na tatau ona ou ui ai.
I nisi o taimi, pe a oso ae ni nai faaletonu, ou te toe foi i tua i lena aafiaga ma manatua ou lagona i lena aso. O le manatuaina o lena lagona na ou maua o le a tafiesea ai soo se masalosalo atonu ma te fetaia’i.
E ui lava e leai se tasi o i tatou e mafai ona toe uia le vai o le papatisoga ina ia toe maua ai ni lagona mamana, ae mafai ona tatou manatua lena lagona pe a faafou a tatou feagaiga e ala i le salamo ma le faamanatuga. O taimi taitasi ou te salamo ai, ou te toe mauaina ai lena lagona—o le faamamaina ma le alofagia.
O le lagonaina o lena alofa e fesoasoani lea ia te au ia iloa le mea na aoaoina mai e Iosefa Samita: “O se tagata e faatumulia i le alofa o le Atua, e le faamalieina i le faamanuiaina na o lona lava aiga, a e ia faasalalau atu i le lalolagi atoa, na naunautai e faamanuia tagata uma lava.”1 E fesoasoani ia te au le iloaina o le taua o le agaga ina ia fiafia ai i avanoa matou te o ai ma faifeautalai ma aoao atu i la’u eria. Ou te tulimatai atu foi i le aso o le a mafai ai ona ou auauna atu i se misiona faafaifeautalai ma faasoa atu le auala fiafia na faia mo au e le talalelei a Iesu Keriso.
Ata na tusia e Rob Wilson
Atalii Faamaumau Oa, saunia e Liz Lemon Swindle, Foundation Arts, e le mafai ona kopiina