O La Tatou Itulau
I se tasi aso a o matou agai atu i le fale mai le lotu, na ou lagonaina se mea i lo’u loto na ou matua lagona ai lava le fiafia. Sa lagona le faatasi mai o le Agaga Paia, ma na ou manao e tala’i atu le talalelei i tagata uma lava o e le’i iloa lenei galuega matagofie lea ua suia ai lo’u olaga ma lo’u aiga. Ina ua matou taunuu i le fale, sa ou alu i lo’u potu ma faitau le Tusi a Mamona. O la’u mau ou te fiafia lava i ai o le Mosaea 2:17, lea e ta’u mai ai pe a ou auauna atu i isi, ua ou auauna atu i le Tama Faalelagi.
Roberto C., 10 tausaga, Bolivia
O le a le galo lava ia te au le lagona fiafia na ou faalogoina a o papatisoina a’u. Na papatiso a’u e lo’u tama, ma na usu le pese a nai o’u tei mo au. Na fesili mai lo’u tina pe ou te fia molimau, ae na ou fai atu ou te fia usuina se pese Peraimeri na aoaoina e faaalia ai lo’u lagona. Na ou usuina le pese, “Ou te fiafia i nuanua pe a timu mai. Ma mafaufau i le manaia o le lalolagi toe mama” (“Pe A Ou Papatiso,” Tusipese a Tamaiti, 53). Ao ou usuina le pese, sa ou lagona e pei o le a oso mai i fafo lo’u fatu! O le a le galo lava ia te au foliga o lo’u aiga ma le lagona na ou maua i lena aso. O le aso sili lea ona taua o lo’u olaga.
Esther F., 8 tausaga, Costa Rica
Elena Z., 9 tausaga, Belarus
O Marcelo B., e 9 ona tausaga, e nofo i Pasila. Ua ia faasoaina mai se molimau i le Faaola. Ua ia iloa o loo soifua Iesu, ma e na te iloa e mafai ona ia toe foi i le afioaga o le Tama Faalelagi pe afai e usitai o ia i poloaiga. E fiafia o ia e faitau i itulau a tamaiti i le Liahona.
O loo auina atu e tamaiti o le Peraimeri a le Uarota a Cabudare i le siteki a Barquisimeto Venezuela o latou alofaaga i tamaiti uma o le Peraimeri i le lalolagi. Latou te fiafia e usuina pese, ma e latou te tatalo mo a latou uo Peraimeri ma le perofeta o Peresitene Thomas S. Monson, ma Sister Monson.
Joshua A., 12 tausaga, Filipaina
Na papatiso ou matua ae ou te lei fanau mai, o lea la sa ou i ai i le Ekalesia i lo’u olaga atoa. Na faaigoa a’u e lo’u tama ia Iosefa ona o le tele o mea maoae na faia e le Perofeta o Iosefa Samita ma e faapea foi ma Iosefa lea na faatauina i Aikupito. Na faasaoina e Iosefa i Aikupito le toatele mai le oge, ae na toefuatai mai e le Perofeta o Iosefa Samita le Ekalesia moni i le lalolagi. E uunaia au e nei Iosefa maoae e toalua ina ia ou ola ai i le talalelei.
Ou te fiafia i le Peraimeri, ma e ou te fiafia i tala o le Tusi a Mamona. O le tala ou te fiafia ai lava o loo i le Alema e 8, lea e usitai ai Alema i le Alii ma toe foi e aoao atu le talalelei i tagata o Amonaea faatasi ma Amoleka. Ou te fia avea ma se faifeautalai ma se loto mausali faapei o Alema.
Joseph O., 11 tausaga, Kana
Ata o le papatisoga na tusia e James Johnson