Mai le Laveaiina i le Avea ma Tagata Laveai

Saunia e Betsy Doane

Sa pei lo’u olaga o se tavi’ovi’oga agai i lalo pe ana ou le feiloai atu i se alii o lē na faailoa mai o loo i ai le vaifofo mo o’u faafitauli.

I se tasi afiafi i le 1978, sa ou i ai i le Malae Vaalele o Logan i Boston, Massachusetts, ISA, e faatali a’u uo e taunuu mai. Sa amata talanoa mai se alii ia te au, ona ma talatalanoa teisi ai lea e uiga i o ma olaga. Na ou ta’u atu ia te ia e tolu masina na vave ai ona ou toe foi mai mai se malaga i Amerika Tutotonu.

Sa ou ta’u atu ia te ia, na ou alu e solaese mai mafatiaga moni o lo’u olaga. O le iva tausaga talu ai na oti ai lo’u tuagane. O le tausaga na sosoo ai na maliliu ai o’u matua i se faalavelave tau taavale. Na atoa i lena aso le tausaga, talu ona maliu lo’u tina matua. I se vaitaimi puupuu lava, na maliliu ai le tele o tagata e sili ona taua i lo’u olaga. Sa ou matuai faavauvau lava.

Na ou mauaina se tinoitupe tele lava na tuufaasolo mai ona o le maliliu o o’u matua, ma na ou faaaogaina e taumafai ai e solaese mai lo’u faanoanoa. Na ou faaaluina i ofu taugata, taavale, fualaau faasaina, ma malaga i nofoaga mamao.

I la’u malaga talu ai nei lava na ou aea ai se nofoaga tafatolu maualuga i Tikal, Kuatemala. O iina, e ui lava na ou i ai faaletino i se nofoaga maualugā, ae sa ou lagonaina lava le tulaga maualalo lea sa ou lagonaina mo se taimi umi lava. Na le mafai ona ou toe ola i le auala sa ou ola ai. Na ou faapea atu, “Le Atua e, afai o E i ai iina, ou te manaomia Oe e suia lo’u olaga.” Na ou tu ai iina mo se taimi umi, ma augani lē leoa atu mo se fesoasoani mai se tasi ou te lei mautinoa e moni. Ina ua ou alu ifo i lalo mai le tafatolu, na ou lagona le filemu. E le’i i ai se mea na suia i lo’u olaga, ae peitai na ou lagonaina o le a lelei mea uma.

Ma o lea la i le tolu masina mulimuli ane o loo ou faamatalaina lenei mea i se alii i le malae vaalele. Na ia faalogo ma le onosai ona fesili mai lea pe ou te iloa na asiasi mai Iesu Keriso i Amerika.

I lena taimi ou te lei mafaufau tele e uiga i le Atua. O le a lea ituaiga Atua e aveesea lo’u aiga? Na ou faamatala atu i le alii le tele o na mea, ma na ia tali mai o le Atua e na te talitonu i ai ua uma ona faia se auala ou te toe faatasi ai ma lo’u aiga. O le taimi lea ua alu atu i ai lo’u mafaufau.

“O le a le uiga o lau tala?”o la’u fesili lea.

“Na e faalogo i Mamona?” E le tele so’u iloa e uiga ia i latou, ae na faaauau ona faamatala mai e le alii le ata o le faaolataga ia te au. Ma e ui ou te le’i talitonu muamua, ae sa i ai se mea na ia faasoa mai sa tatagi mai e moni.

Na ma faafesuiai ma la’u uo fou numera o a ma telefoni, ma i le aluga o masina na sosoo ai, na ma tafafao faamasani ai. Na ma talatalanoa foi e uiga i le talalelei. Na ia tuu mai ia te au se kopi o le Tusi a Mamona, ma sa ma talatalanoa e uiga i ai faatasi ai ma isi tusitusiga paia mo le tele o itula i luga le telefoni. Na ia ta’u mai ia te au e uiga ia Iosefa Samita lea na toefuataiina le Ekalesia a Iesu Keriso. O se taimi ofoofogia o le faamoemoe ma le tuputupu ae.

Na faasolo ina mou atu le ma faigauo, ae ina ua mavae le tele o vaiaso, na fai mai la’u uo e na te fia auina mai nisi o ana uo matou te talatalanoa. O uo na ia auina mai, ioe, o faifeautalai. Ma na o mai faatasi faifeautalai ma Bruce Doane, le faifeautalai o le siteki lea na avea mulimuli ane ma o’u toalua.

Ina ua mavae ni nai vaiaso o talanoaga aloaia, na fesili mai faifeautalai pe ua ou lotomalie e papatiso. Na ou tali atu ioe. Ona latou fai mai lea ia te au e tatau ona ou tausia le Upu o le Poto, ae ou te le’i papatiso.

Ou te lei toe inu pe faaaogaina tele fualaau faasaina e pei o le taimi ua tuanai. Ua i ai nai suiga i lo’u olaga; na ou lagona le i ai o se faamoemoega sili atu nai lo le tele o tausaga—ae peitai e moni lava o na mausa o le a faigata ona taofia atoatoa. Ae maise foi, ua uma ona ou lafoaia le tele o mea i le taliaina o le talalelei—e aofia ai ni nai uo o e na manatu ua ou valea i le faaalia o le naunau i le Ekalesia Mamona. Sa ou finau ona sa ou lagona e moni le talalelei. Ae pe mafai ona ou lafoaia atoatoa ni mea ua leva ona fai ma vaisu?

Na ofo mai faifeautalai e tuuina mai ia te au se faamanuiaga faaleperisitua e fesoasoani ia te au. O le taimi lava na mae’a ai, na ou tia’ieseina uma ai fualaau faasaina ma meainu malolosi sa ia te au. Ma o lena po, na aluese ai mai ia te au le manao e tagofia soo se mea e faasagatau i le Upu o le Poto. O se vavega moni lava.

Na ou papatiso ia Iuni 1978. E sili laitiiti atu ma le tausaga mulimuli ane, na ma faaipoipo ai ma Bruce i le Malumalu o Uosigitone D. C.

Na laveaiina moni lava au e le talalelei mai le faavauvau. O le taimi muamua, sa ou le iloaina le uiga moni lava o le upu. Na leai o’u matua ma lo’u tuagane ma lo’u tina matua, ae na ou lagona e pei ua leai foi ma au ia. Ina ua maliliu i latou na ou le toe iloa po o ai au. O lea ua ou maua lo’u faasinomaga. Ou te iloa o au o se afafine o le Atua ma e Na te silafia au ma alofa ia te au. Ina ua faamauina au i ou matua, tina matua ma lo’u tuagane, na liua lo’u faanoanoa i le fiafia faatasi ai ma le mautinoa e mafai ona matou faatasi faavavau. 

Na laveaiina foi au e le talalelei a Iesu Keriso mai mea sa fai ma vaisu. Ua mavae nei ni nai tausaga talu ona ma auauna atu ma lo’u toalua o ni faifeautalai i le Tautua a le AAG mo Aiga mo le faaleleia o le tagofia o masaniga, e galulue ai ma tagata o la matou siteki o loo tauivi ma ituaiga o mea eseese ua fai ma vaisu. Ou te matua faafetai ua mafai ona ou fesoasoani atu i nei tuagane ma uso. Ou te lagona le faamanuiaina o au i le mafai ona ou faasoa atu o la’u tala ia i latou ina ia fesoasoani ia i latou e malamalama ai pe mafai faapefea ona laveaiina i tatou uma e le talalelei.

Ata na tusia e Roger Motzkus