O Tatou Aiga, O Tatou Auaiga
Fesoasoani i Tamaiti ia Lagona le Saogalemu
O le malamalama i le ala e tali atu ai tamaiti i tulaga o mea matautia e tutupu, e mafai ai e matua ona fesoasoani i a latou fanau i taimi o faigata.
Ua tatou ola i se vaitaimi ua lamatia ai e faafitauli faigata—e pei o le tatala o faaipoipoga, ma’i, maliu, faalavelave faafuasei, faalavelave faalenatura, taua, leai o ni galuega—le lagona o le saogalemu i totonu o le aiga. Ae peitai, e tele mea e mafai e matua ona fai e fesoasoani ai i tamaiti ia maua se lagona mautu, sulufaiga, ma le saogalemu e ui lava i nei uunaiga le manuia.
Auala e Tali Atu ai Tamaiti
Ina ia mafai ona fesoasoani i tamaiti ia taulimaina ia tulaga faaletonu, o le mea muamua e tatau ona tatou malamalama i le auala latou te tali atu ai. O nei tali e mafua mai i le tulaga mautu o le aiga ma le matua o le tamaitiiti ma le matua o ona lagona.
Mai le Faatoa Fanau mai e oo i le Ono Tausaga le Matua
E mafai e se alualutoto ona faaalia le le mautonu i ni mea faaletonu e tutupu e ala i le faiaso, tagi, ma le manao e sii o ia. O le tele o taimi, e pau lava le mea e manaomia e pepe o le sii lea o i latou e se matua po o le fafaga o i latou. E sili atu le matutua o mafaufau o tamaiti laiti nai lo pepe. E ui i lea, o le motusia o se amioga masani a se tamaitiiti e ono lagonaina ai e se tamaitiiti e ono tausaga le matua le leai o se mea e mafai ona ia faia. Mo se faataitaiga, atonu na te lagonaina le matuai atuatuvale ona o le valavala mai matua i le taimi o se faalavelave faalenatura po o ni masina e sosoo ai ma le tatalaina o se faaipoipoga. E mafai e matua ona fesoasoani i tamaiti laiti i tulaga faapena e ala i le faia o ni aga masani se tele e mafai ona fai. E mafai ona faaauau pea ona fai tatalo faaleaiga, aai faatasi o se aiga, ma isi faiga sa masani ona latou faia a o lei tulai mai lenei suiga ogaoga. O lenei faaauauina pea o faiga masani, e tuuina atu ai i tamaiti se lagona o le mafanafana, to’a, ma le mautu.
Fitu i le Sefulu Tausaga le Matua
O tamaiti e matutua atu e mafai ona malamalama pe afai ua i ai se mea po o se isi foi ua aveese mai mo se taimi tumau, a lē o le aluese mai se aiga po o le taulimaina foi o le maliu o se tasi o matua. O le taunuuga, latou te ono popole ai ona o le faalavelave ua tupu. Ua matuai le mautonu ai lava lo latou iloa e uiga i le olaga. Atonu latou te talanoa soo i le mea matautia ua tupu a o latou taumafai ia malamalama i le ala e taulima ai le faafitauli. Atonu foi latou te manaomia le fesoasoani i le faamalamalamaina po o le faaalia foi o o latou lagona e uiga i le aafiaga. Ia manatua, o o latou tomai e faamatala ai se mea e le tutusa ma tomai o se tagata matua. Mo se faataitaiga, e le o se mea e le masani ai ona mafaufau tamaiti o i latou e tuuaia i le tetea o o latou matua. E mafai e matua ona fesoasoani atu i ai e ala i le iloa o mafaufauga ma lagona o tamaiti ona faasa’o lea o se manatu sese o nonofo ma i latou.
Sefulutasi i le Sefuluvalu Tausaga le Matua
O tamaiti o le vaitausaga e 11 i le 18 e ono popole i mea e tutupu i le lotoifale, faaleatunuu, po o atunuu i fafo. O le tupulaga matutua atu e amata ona latou iloa ua latou uia se suiga mai le nonofo i le aiga i le feagai o i latou lava ma le lalolagi faigata. Atonu latou te lagonaina le lofituina i faalogoga loloto ma lē iloa ai pe faapefea ona talanoa e uiga i ai.
E mafai e matua ona fesoasoani i a latou fanau matutua i le faia faatasi ma i latou o gaoioiga e fiafia i ai a latou fanau, e pei o le gaseseina o se taumafataga o le afiafi, taaalo i le mu, po o ni taaloga. E mafai foi e matua ona talanoaina ni aafiaga luitauina sa latou oo i ai a o talavou i latou. A o faasoa atu e matua o latou manatu ma lagona, o le a lagona e fanau le sili atu ona mafanafana e faasoa atu mea o latou manatu i ai ma o latou lagona. O le faiga lea e atiina ae ai le vavalalata faalelagona. E tusa lava pe le iloa gofie le faaalia e le tamaitiiti matua o lona fiafia, ae o le a faalogo lava.
O Mea e Mafai Ona Fai e Matua
O le mea muamua e ao ona iloa e matua, o loo atuatuvale a latou fanau.1 Atonu e faaalia e tamaiti ni faafitauli o amioga sa le masani ai, e pei o le faaumiumi o le faanoanoa po o le ita, faateleina po o le faaitiitia o le fiaai, o le lē lelei o se moe, o le lē mafai ona gauai atoa atu i se mea, po o se suiga lē lelei sa le masani ai i le aoga. O tamaiti e matutua atu e ono amata ona faia amioga le taupulea e pei o le ola soonafai, faaaoga o fualaau faasaina, amata ona aafia i feusuaiga, po o le o ese mai le aiga, uo, ma tulaga faaagafesootai.
E mafai ona e fesoasoani atu i le iloa lea o le auala e faafailele ai lau lava fanau. Mo se faataitaiga, e mafai ona e aoaoina lau fanau, aemaise lava a o laiti, i upu faamatala e faailoa ai lagona latou te lagonaina. O nisi o nei upu e aofia ai le faanoanoa, ita, le fiafia, fefe, popole, ma le atuatuvale.
Afai e amata ona faaalia ni uiga le mafaufau o lau tama talavou ina ua mavae se tulaga faaletonu, ia e faalogo totoa i ana tala ma lagona. E pei foi o lau fanau laiti ifo, ia e fesoasoani i lau tama talavou e faailoa sa’o atu ona lagona. Ma ia e maua le loto malamalama, ma iloa atonu ua afua nei amioga faalēmafaufau ona o le faaletonu ua tupu.
A o e amataina nei talanoaga ma lau fanau, ia e taumafai e aloese mai le taumafai e ta’u atu o oe e sa’o ma faaali atu le ita, faitio, po o upu faatiga. Ia e iloa le manua po o le tiga o loo lagona e lau tama ma ia faaali atu le agaga malamalama. E mafai ona amata lau faamatalaga i le faapea atu, “Ou te iloa o loo e faanoanoa ona ua oti lau uo. Ou te iloa lelei lava le faigata o lena mea. Ua ou popole ona ua amata ona e inu pia ona o le taunuuga o lena tiga.” O le amataina o se talanoaga i se faiga inainā e seāseā oo atu i ni taunuuga lelei.
Faalogo ma se Agaga Malamalama
O nisi taimi atonu e faaosoosoina ai oe e aloese mai se talanoaga ma se tamaitiiti ua le fiafia. Ae peitai, o le tele o tulaga faapea, o le a le mafai e se tamaitiiti ona taulima ona lagona popole e aunoa ma se fesoasoani. A o e faalogo atu ma se agaga malamalama a o faamatala e lau fanau o latou popolega, o le a latou lagona le alofaina ma le faamafanafanaina.
O se tasi auala aoga o le faalogo ma se agaga malamalama e aofia ai lou toe ta’ua o lagona o se tamaitiiti, e mautinoa ai ua e malamalama ia i latou. Atonu e manaomia lou fesoasoani ia latou iloa o latou lagona. Atonu e te faapea atu, “E pei e te faanoanoa ma atuatuvale pe a ou fesili atu e uiga i lau uo lea ua tetea ona matua.” Faatalitali mo se tali; ona tuu lea i lau tama e faaauau le talanoaga. O tamaiti e matele lava ina talanoa pe a latou manatu o loo latou taulamua i le faiga o se talanoaga.
Fesoasoani i Tamaiti e Faailoa Mai Lagona
E mafai ona faateleina le lagona o le taulamua o se tamaitiiti e ala i le fesoasoani i le tamaitiiti e faailoa mai ni lagona le lelei. E masani lava, a e faalogo ma le agaga malamalama, o le a mafai e oulua ma lau tama ona iloa le pogai o na lagona. E te ono fesili atu, “Aisea e te manatu ai o ou lagona na?” Faatali mo tali ma faalogo lelei i tali. Atonu e le fai atu i le taimi lava lena.
O nisi taimi e te manaomia ai le manatu palepalealuga i ni tali e ese mai. E mafai ona e fesili pe o a ni auala o le a aafia ai isi tagata o loo ta’ua ai i le tali o loo mafaufau i ai lau tama. Pe mata o le a faaaloalogia ai lou aiga po o uo i le tali o loo faamoemoeina? Mata e talafeagai? O le a se lagona o le a oo i le tamaitiiti? Atonu o le a le vave ona maua e le tamaitiiti se tali i le taimi lena. Ia faamautinoa atu i lau tama e te alofa ia te ia ma e le afaina le le maua o sana tali i le taimi lea.
Tali Atu ma le Faatuatua
A e iloaina mamanu o amioga e le masani ai lau fanau, ona fesoasoani lea ia i latou e faaali atu ma malamalama i o latou manatu ma lagona i totonu o se siosiomaga o le alofa, o le a faapea ona maua e lau fanau se lagona o le malupuipuia ma le saogalemu.
O le mea aupito sili ona taua e mafai ona e faia e atiina ae ai lenei lagona o le malupuipuia ma le saogalemu i totonu o le aiga, o le atiina ae lea i luga o mataupu faavae o le talalelei a Iesu Keriso. E mafai ona e sailia musumusuga mo auala e fesoasoani ai i lau fanau e ala i le anapogi, tatalo, suesue i tusitusiga paia, ma le auai atu i le malumalu. E mafai ona e talanoa i ou taitai perisitua. E mafai foi ona e mafaufau ia maua atu se fesoasoani a tagata tomai faapitoa, e faalagolago lea i le ogaoga o faafitauli.
A e galue ma le faatuatua i le Tama Faalelagi ma Lona Alo, o le a e maua faamanuiaga o le mafanafana ma le lagolagosua. O le a maua e le fanau se fuataga faaopoopo o le mafanafana ma le mausali a o outou ola faatasi i aoaoga a perofeta ma faaauau ai ona ola i tu ma aga e aumai ai le filemu i totonu o le aiga, e pei o tatalo faaleaiga ma tatalo faaletagata lava ia, suesueina o tusitusiga paia, ma le tapuai i malumalu.
Ata na pueina e Robert Casey vagana ua ta’u atu
Ata na pueina e Adam C. Olson