Ou Te Le Fia Iloaina Oulua!

Irvin Fager, Iuta, ISA

Faatasi ai ma se tatalo faamaoni i lo’u loto ma la’u soa e 14 tausaga le matua i o’u autafa, na ou tuitui ai i le faitotoa o Andy. O le ma asiasiga muamua lea i lona aiga i le avea ai ma ona faiaoga o aiga. Na ma taliaina talu ai nei lava le tiutetauave o le asia o ia e ui i lona tulaga o le avea ma se tagata faigata. Na matala le faitotoa, ma tu ai iina, o ofu i se kimona faa-Iapani.

“Ioe?”

“Talofa, o a’u o Irvin, ma o la’u soa lea. O i maua o au faiaoga o aiga ma e ma te fia asiasi atu ia te oe.”

Sa saofai mai lona toalua i le laulau i tua atu o ia, i le ituaiga ofu lava lea. O loo faia se la tausamiga faa-Iapani.

“Ou te manatu ua oulua iloa o lea e fai le ma meaai ma e leai se taimi mo oulua,” o lana tala mai lea.

“E mafai ona ma toe o mai i se isi taimi?” o la’u fesili lea.

“Aisea?”

“Ina ia mafai ona tatou faamasani,” o la’u tali lea.

“Aisea lua te fia iloa ai a’u?” na ia fesili mai ai. “Ou te le fia iloaina oulua!”

Ou te iloa na mafai lava ona ma faamavae i le avea ai ma ana faiaoga o aiga i lena lava taimi, ae ma te le’i faia. Ina ua ma toe foi atu i le masina na sosoo ai, na faataga moni lava i maua e Andy i totonu. Na ma nonofo faasaga i se puipui o loo laina ai ni atigifagu pia sa faatulagaina i foliga o taavale anamua. Na puupuu la matou feiloaiga ma Andy, ae na ma iloaina mai ai o ia o se taitai ua litaea mai le ea fosi. O a ma asiasiga na sosoo ai na pupuu foi ma itiiti lava ni taunuuga na maua mai ai.

I se tasi o po a o ou alu ese mai se fonotaga a le Ekalesia, sa ou lagonaina se leo i totonu o fai mai ou te alu e asi Andy. “Leai, faafetai,” o lo’u mafaufau lea. “E le o le po nei.”

Ina ua ou tu i le moli mumu, na toe oo mai le musumusuga e asi ia Andy. Na ou mafaufau, “Faamolemole, e le o i ai so’u lagona mo Andy i lenei po.”

Peitai, a o faia le mimiloga mulimuli e agai atu ai i le fale, na toe oo mai i le taimi lona tolu le musumusuga lava lea e tasi, ma faamautinoa mai ai ia te au le mea e tatau ona fai.

Sa ou tietie atu i lona fale ma paka la’u taavale ma tatalo mo se taitaiga. Ona ou agai atu lea i le faitotoa ma tuitui. Ina ua avatu a’u e Andy i totonu, sa ou iloa atu i luga o le laulau se Tusi a Mamona ma se tusi o gafa. Sa ou lagona se agaga ese i lona fale; na i ai foi se mea e ese e uiga ia Andy. Na ia talanoa lemu mai i lona alofa mo lona tina ma lona tuafafine, o ē na tuufaatasia le gafa.

O se taimi muamua lea, ua tatala mai ai lana talanoa. Na ia ta’u maia se tiga o loo ia lagonaina i lona tua, ma fai mai ai o le a alu i le falemai a le March Air Force Base e lata ane i Riverside, Kalefonia, i le aso e sosoo ai. Sa ou fesili pe na te fia manao i se faamanuiaga faaleperisitua. Na ia tali mai i se leo lemu e aunoa ma se toe faatali, “Ou te manao ai.” Sa ou valaau i lo matou peresitene o le korama a toeaina, o lē na sau e fesoasoani e tuuina atu le faamanuiaga.

O le aso na sosoo ai na ta’u atu ai e fomai ia Andy e maua o ia i le kanesa o le mama ma e le toe foi i se lelei. Ina ua uma ona maua le tala, sa alu o ia e vaai le epikopo. I totonu o ni nai masina, na faataotolia o ia i lona moega.

I se tasi o afiafi ina ua ou taunuu i lona aiga mo se isi asiasiga, na taitai atu a’u e lona toalua i lona potumoe, lea na ia taoto ai ua vaivai lava. Na ou tootuli i talaane o lona moega ma opoina o ia i o’u lima. Na ou musumusu atu, “Ou te alofa ia te oe, Andy.” I lona malosi atoa, na tuu mai ai lona lima i lo’u tauau ma, i se taumafaiga tele, na ia ta’u mai ai e alofa foi ia te a’u. E lua aso na sosoo ai ae maliu loa o ia.

Na valaaulia a’u e lona toalua i le maliu. E ese mai tagata e toafa o lona aiga, e na o a’u lava le tagata e toatasi na auai.

Ou te matuai faafetai na ou faalogo i musumusuga a le Agaga e asiasi ia Andy.