Faatiga e La’u Uo

Natal’ya Fyodorovna Frolova, Netherlands

Sa i ai sa’u uo i la’u paranesi i le Ekalesia i Rusia o le sa ma faifai mea faatasi i gaoioiga uma a le Ekalesia. E tele mea na ma tutusa ai, sa tele ni mea fiafia na ma faia faatasi, ma e sa ou fiafia e maua sea ituaiga uo lelei.

Peitai na tupu se mea uiga ese. Ma, i le leai o se mafuaaga na mafai ona ou mafaufauina, na matua faatiga lava o ia te au. E na te le’i talosaga mai mo se faamagaloga, ma na ou le toe fesootai atu ia te ia. Ou te le faatalofa lava ia te ia i Aso Sa. Na alualu pea faapena mo le lua masina. Sa ou tiga ma lē fiafia, ae leai ma sana tala na fai mai.

Ona ou iloaina lea o le a ia tuua lo matou nuu. Ou te le’i manatu e tatau ona tumau ai pea faapea le ma faigauo; sa ou mafaufau e tatau ona ma faalelei. I lena lava taimi sa ou manatua ai se mau mai le Tusi a Mamona: “Ina alu ia oe i lou uso, ia muai faalelei ma lou uso, i le e sau ai ia te au ma lou loto atoa, ona ou talia ai lea o oe” (3 Nifae 12:24).

Sa faigata ona ou lotomaulalo ma faia le laasaga muamua, ae na ou tatalo ona ou valaau atu lea ia te ia. Ou te le iloa po o le a sana tali, ae na ou sauni lava. O le mea na ou faalogo i ai na ou te’i ai.

Na ia aioi mai ia te a’u ma le faamaoni mo se faamagaloga, ma na ou iloa mai lona leo na sili atu lona mafatia sa i ai ona o lana amio—e pei foi na ou i ai. Ae o le mea sili lava, na ou manatuaina i se fuaiupu e tasi na ia fai maia faatolu: “Natal’ya, faafetai mo le valaau mai!”

Sa ou matua fiafia lava! Na ia siitia ese atu i se taimi puupuu mulimuli ane, peitai na ma valavala o ni uo sili atu.

O le aoao e alofa ma faamagalo le tasi i le isi, o se tasi lea o a tatou galuega e sili ona faigata. O le faamagalo atu—aemaise lava pe a fai e le o i tatou lea e sese—e manaomia ai lo tatou loto maualalo ma faatoilalo le faamaualuga. Sa ou iloa o le faia o le laasaga muamua ina ia faamagalo atu ma toe faaleleia e aoga tele.