Faatinoina le Agaalofa
Mai le “Some Have Compassion, Making a Difference,” Ensign, Me 1987, 77; faalaugatasia le sipelaga.
I le faataoto i le mamoe na leiloa, na alu le leoleo mamoe ma saili le mamoe lea na leiloa seia iu ina maua. Na ia toe foi mai, ua fiafia (tagai i le Luka 15:4–7).
I le faataoto o le tupe na leiloa, na tutu e le fafine ua oti lana tane le afi, ma maua ai le malamalama, ma sa tafitafi tulimanu uma ina ia maua le tupe. Na olioli o ia ina ua maua (tagai i le Luka 15:8–10).
O nei faataoto uma e lua, o ni faataitaiga o ni faatinoga na faia mo se sailiga, faamalamalamaina o le pogisa, ma tafitafi ai seia maua ma toe faafoi mai i se aiga ua olioli, le oloa taua po o se agaga na leiloa ae ua toe maua.
O se faataitaiga lelei lava o le agaalofa ma le auauna atu ma le faia o se eseesega o le faataitaiga lea a Don ma Marian Summers. A o galulue i Egelani, sa talosagaina i laua e auauna atu i le Paranesi o Swindon i le ono masina mulimuli o le la misiona ina ia aoao atu ma fesoasoani i le faatoaagaina mai o tagata o le ekalesia. Mo le 80 tausaga na avea ai Swindon ma paranesi o ni nai tagata faamaoni ma le toatele o isi tagata lelei o le paranesi ua amata ona le toaaga mai.
Na tusia e Don ma Marian faapea: “O le ma asiasiga muamua lava i le Paranesi a Swindon sa fai sina faavaivai loto a o ma feiloai atu i le Au Paia i le potu totogi faafiafia malulu. O le aofaiga o le aulotu e 17, e aofia ai ma Peresitene ma Tuafafine Hales ma faifeautalai e toa 4. A o ofuina pea o matou ofu mafanafana, na matou faapupuu faataamilo i se tamai masini faamafanafana, e le lava, a o matou faalogologo atu i le lesona o le Aoga Sa.”
Na faaauau le tusi: “Sa sau se tagata o le paranesi ia te au i se tasi aso: ‘Elder Summers, e mafai ona ou tuuina atu ia te oe sina fautuaga? Aua lava ne’i e ta’ua le upu sefuluai i le au paia a Swindon; latou te le talitonu i ai, na pau le mea o le a e faia o le faaitaina o i latou.’”
Fai mai Brother Summers: “Na matou aoao atu i ai le sefuluai ma isi mataupu faavae uma o le talalelei. Faatasi ai ma le faataitaiga ma le faamalosiau a le peresitene o le paranesi, sa i ai se suiga o le loto, ma na amata ona faateleina le faatuatua ma le faatinoga. Na uma lelei ona faafou ia pepa faamaumau a o matou asia uma fale o tagata o le ekalesia. Ina ua amata ona popole alofa ia taitai, na amata ona tali mai tagata o le ekalesia, ma na ulufia le paranesi e se agaga fou. Na amata ona toe fiafia tagata i le talalelei ma fesoasoani le tasi i le isi. …
“Na faigata i se ulugalii talavou ona faia ni suiga ona e ese a latou aga masani, uiga, ma laei. La te le’i fiafia i le fautuaina atu o ni suiga. Na tusi faalua atu le ulugalii i le epikopo [ona sa avea ma uarota i lena taimi] ma talosagaina le aveesea o o la igoa mai pepa faamaumau a le Ekalesia. I le la tusi mulimuli na la faasaina ai ona toe asia i laua e soo se tasi o le au paia, ma o lea na [matou] o ai i le faleoloa e faatau ai fugalaau ma faatau mai se laau matagofie o le italia ma auina atu i le ulugalii talavou. Ma ni nai faaupuga faigofie: ‘Matou te alolofa ia te oulua, ua matou misia lava oulua, matou te manaomia oulua. Faamolemole toe foi mai.’ Sainia, e le Uarota a Swindon.
“O le Aso Sa na sosoo ai, o le sauniga anapogi ma molimau ma o le ma Aso Sa mulimuli lea i Swindon. Sa auai tagata e 103, e faatusa lea i le 17 na i ai i masina e ono ua mavae atu. Sa i ai iina le ulugalii talavou, ma i le tuuina atu o le molimau [a le tamaloa], na ia faafetai ai i le Uarota a Swindon i le le tuulafoaiina o i laua.”
E tofu uma lava i tatou ma ni aafiaga faapenei i totonu o o tatou uarota ma paranesi i le lotoifale e ala i le galulue ma alolofa atu ia i latou o e le toaaga mai. O se fiafiaga le tuuina atu o le “alofa, ma ia faatatau” (Iuta 1:22) ia i latou o e ua sauni ina ia mauaina i latou lava ma toe fia foi mai.