Faaaliga Liligi ifo mai le Lagi
O le malosi o le pisi e susū pala ai i latou e latalata tele atu i le Afu o Pulapanasako i Honotura. Ae e le afaina lea ia José Santiago Castillo. Fai mai José, o le vai e liligi ifo e tusa ia ma se folafolaga sa taua ia te ia talu ona mua’i tali mai le Tama Faalelagi i ana talosaga e uiga i le talalelei.
“Afai tatou te fia maua le poto, e mafai ona tatou ole atu,” na fai mai ai José (tagai Iakopo 1:5). “E pei foi ona le mafai e se tagata ona taofi lenei vai, na folafola mai e le Alii o le a Ia liligi mai le malamalama i luga o le Au Paia.” (Tagai MFF 121:33.)
O le aafiaga o José i le Ekalesia ua aoaoina ai o ia, o se molimau e tuputupu ae i lea mataupu ma lea mataupu, ae e le faapea ai e tatau ona faifai lemu. O loo i ai le anoanoai o faaaliga o loo avanoa.
Na aoao mai le Perofeta o Iosefa Samita, “O le Atua e na te le faaalia se mea ia Iosefa, ae o mea o le a Ia faailoa atu i le Toasefululua, ma e oo lava i se aupito itiiti o le Au Paia e mafai ona ia iloa mea uma i le vave na te mafai ai ona talia ia mea.”1
“Ae ou te le’i papatiso, sa ou ole atu i le Tama Faalelagi e faamautinoa mai e moni mea sa Ia faaalia mai ia te au: o le Tusi a Mamona, o le Upu o le Poto, ma le sefuluai,” o le tala lea a José, o loo avea nei ma se peresitene o le korama a le au toeaina. “O le ole atu ia te Ia o le auala lena tatou te maua ai tali.” (Tagai Mose 1:18.)
Ae peitai, e ao ona saunia i tatou lava ia maua faaaliga. “Afai tatou te fia susū, e tatau ona tatou o i totonu o le vai,” o le tala lea a José. “Afai tatou te mananao i ni faaaliga, e tatau ona tatou o i le mea o le a maua mai ai faaaliga. E tatau ona tatou i ai i le nofoaga e tatau ona tatou i ai, fai le mea e tatau ona tatou faia. E tele mea tatou te aoaoina pe afai tatou te maelega.” (Tagai 1 Nifae 15:8–11.)
Ata na pueina e Adam C. Olson