O Le Talalelei E mo Tagata Uma
Sa masani lava ona ou mafaufau po o fea e sau ai le fiafia moni. Ona ou mauaina lea i totonu “o se pusa lapo’a”.
A o 16 o’u tausaga ma nofo ai i Porto Alegre, Pasila, sa i ai se uo a lo’u uso matua e masani ona asiasi mai i lo matou aiga. I se tasi aso na ta’u mai ai e lenei uo ia i matou ua ia mauaina se lotu ma e fiafia o ia i le auala e ola ai ona tagata.
Na ia ta’u mai ia i matou sina mea itiiti e uiga i sona aafiaga i le auai i Le Ekalesia a Iesu Keriso o le Au Paia o Aso e Gata Ai, ae na te le o mautinoa po o ma’ua ma lo’u uso o ni “meatotino faalelotu.” Na ia manatu o tulaga faatonuina o le Ekalesia o le a faigata tele mo maua ma lo’u uso ona taliaina.
Peitai, o lo ma tuafafine, o se teine lelei ma agaalofa. Ona o nei uiga, na manatu ai le ma uo atonu e fiafia o ia i tulaga o le Au Paia o Aso e Gata Ai, o lea na ia fesili ai i lo matou tina pe mafai ona la o ma lo’u tuafafine i se gaoioiga a le Ekalesia.
Na ioe i ai lo matou tina ae pe a faapea la e alu lo’u uso po o a’u foi. Na vave atu le oso atu o lo’u uso nai lo a’u ma faapea atu, “Leai a’u!” O lea na tofi ai a’u e o i le gaoioiga ma lo’u tuafafine.
Ou te le’i popole tele i ai. Sa ou fia iloa lava sina mea e uiga i le Ekalesia talu ona ou vaai i le falesa tele, ma faatafafa e faafesagai ma la’u aoga. Sa ou vaai soo i tagata o o mai ma o i le lotu, ma na ou iloaina e ofutino papae ma fusiua ia alii. Ou te fia iloa lava po o le a se mea o tupu i totonu “o le pusa lapo’a,” o lo’u mafaufau lena i na vaitaimi e uiga i le falesa.
O La’u Gaoioiga Muamua
Na matou taunuu i le falesa ma lo’u tuafafine ma la matou uo. I totonu, i le ogatotonu o le fale faafiafia tele na i ai se vaega toalaiti o tagata: faifeautalai tamaitai e toalua ma e masalo e toaono isi. Na latou taaalo i se taaloga faigofie ma ‘ai a latou popukoni ma le vaiinu. Sa talitalie ma fiafia tagata uma.
“O ai nei tagata,” o lo’u mafaufau lea, “aisea ua matua fiafia ai?” Ou te iloa e lē ona o le taaloga lea latou te taaalo ai po o le siosiomaga faaletino po o le auala latou te fefaasoaai ai. E matua faigofie uma na mea. Na foliga mai o le fiafia na sau mai i totonu ia i latou.
Sa masani lava ona ou mafaufau po o fea e sau ai le fiafia moni ma o le a se mea ou te faia e maua ai. Na ou manatu atonu e sau mai gaoioiga faagaeetia po o le faia o ni tafaoga e le masani ai, po o le saili i mea uma o loo ofoina mai e le lalolagi. Ona ou alu lea i lena falelotu, lea na i ai nei tagata na matua fiafia e aunoa ma nisi o na mea. Na tēlē se aafiaga ia te au.
Ina ua uma le gaoioiga sa tutu faifeautalai i le faitotoa ma faatalofa ma tagata uma. Ina ua oo lo’u tuafafine i le faitotoa, sa la fesili ia te ia pe na te fia malamalama atili i le Ekalesia. Fai mai o ia, “Leai, faafetai.” Peitai sa ou popole pea. Sa ou lagona se “naunau ina ia talitonu” (Alema 32:27), o lea la ina ua la valaauliaina a’u e aoao atili e uiga i le talalelei, na ou tali atu ioe.
E le’i fiafia o’u matua i lesona a faifeautalai po o le faia i lo matou fale, o lea na ou faatulagaina ai e fai lesona i le falelotu. I le faagasologa o le masina na sosoo ai sa ou aoao e uiga i le talalelei toefuataiina a Iesu Keriso—e uiga i mea na matua fiafia ai na tagata i lena fale faafiafia. Na ou iloa o le fiafia e oo mai i le faia o le finagalo o le Alii mo a’u, lea e sau mai totonu, ma e mafai ona ou fiafia e tusa lava po o a mea o loo siomia ai a’u. O lena aoaoga faavae e “suamalie ia te a’u” (Alema 32:28). Sa ou manao i ai i lo’u olaga.
Ua mavae le masina talu lena gaoioiga muamua, na ou fuafua ai e auai i le Ekalesia. I tausaga na mulimuli mai, na auai ai foi ma o’u matua i le Ekalesia.
Tofotofoga ina ua mavae le Papatisoga
Sa ou feagai ma le tele o luitau ina ua uma ona ou papatiso. O suiga na manaomia ou te faia i lo’u olaga na taua. E ese mai lena mea, o nisi taimi sa ou lagona le leai o ni a’u uo i le Ekalesia, ma sa faaosoosoina a’u ou te toe foi i a’u uo tuai. Ae o lo’u naunau ina ia lagona le fiafia—ma lo’u malamalama e mafai lava ona tatou maua le fiafia e ui i tulaga faaletino—na fesoasoani lea ou te toe sau ai pea i le lotu. Na ou iloa e le mafai ona “tuu ese [lo’u] faatuatua” (Alema 32:36). I le aluga o le taimi na ou faia ai ni uo i totonu o le Ekalesia o e na fesoasoani ia te au i le taimi o le suiga. Ma a o faaauau pea ona ou ola ai i le talalelei, na tuputupu ae la’u molimau ma lo’u fiafia (tagai i leAlema 32:37).
O lo’u aafiaga i le liuaina—o a’u lava faatasi ai ma isi—ua aoaoina ai au e mafai ona pa’i mai le Agaga i soo se tasi, i soo se nofoaga ma e leai lava se mamanu talafeagai mo se tagata ua faamoemoeina e avea ma se tasi o le Ekalesia. Tatou te manaomia uma lava le talalelei a Iesu Keriso. O loo tatou i ai uma lava i le faagasologa o le avea atili faapei o Ia.
Na fesoasoani lena malamalama ia te au i le avea ai ma se faifeautalai i São Paulo, Pasila; i le avea ai ma se peresitene o le misiona i Belem, Pasila; ma i le avea ai ma se tagata o le Ekalesia. Na fesoasoani lena ia te au a o ma tapenaina ma lo’u toalua le ma fanau mo le galuega faafaifeautalai. E toalua le ma fanau ua uma ona auauna atu faafaifeautalai, ma a o le’i o ese atu i laua, na ou toe faamanatu atu ia i laua e aua ne’i faamasinoina tagata i o latou foliga po o auala o ola ai. “Aua ne’i tuulafoaiina nisi ona e te faapea e ese lava i latou,” na ou ta’u atu ia i laua. “Taumafai e vaai i totonu. Atonu o loo i ai se isi Carlos iina.”
Ou te faafetai i le iloaina o i tatou uma o fanau a le Atua, ma ua ou iloa o tagata uma—e le na o ni nai tagata—o se sui mo le mauaina o le fiafia lea e oo mai i le ola ai i le talalelei a Iesu Keriso.
Sa le’i mautinoa e le uo a lo’u uso po o ma’ua ma lo’u uso (luga) o ni “meatotino faalelotu”. Ae na ou fia iloa.
O Elder Godoy a o faifeautalai i Pasila, i le 1982.
Ata na tusia e Bryan Beach; ata pu’e, faaaloaloga a Elder Carlos A. Godoy