O Fea o Le a Ave I Ai Oe e Au Uo?
Pe na tupu lenei mea ia te oe? O loo e saofai i le lotu ma faalogologo i le failauga ae faafuasei lava ona e faalogoina ni pisapisao leotetele mai luga o le taualuga. Na e te’i, ina ua matala le taualuga, ae iloa atu ai le lagi lanumoana, ma iloa atu ai foliga o ni tamaloloa se toa fa o loo tilotilo mai i lalo i le aulotu. O le isi mea na e iloa na sosoo ai, o loo latou tuuina mai i lalo se isi tamaloa i se fata i luga o le fola o le falesa.
Pe na tupu ea sea mea ia te oe? Atonu e leai. Ae na tupu le mea faapea i le taimi o le galuega talai a le Faaola.
O Se Faamalologa Faavavega
“O tagata o loo fata mai i le moega le tagata ua ma’i i le supa” o le amataga lea o le tala i le Luka 5:18, “ua latou mananao ina ia au mai ia te ia, ma tuu ifo i ona luma [Iesu].” Pau lava le faafitauli o le le mafai lea ona latou aumaia o la latou uo ma’i i totonu ona o le tumu o le fale! E oo lava i le faitotoa na poloka i le motu o tagata, ma e leai se auala e sao atu ai i totonu.
Semanu e mafai lava ona faavaivai ma toe foi i le fale nei uo. Ae latou te le’i fo’i. Atonu e mafai ona e mafaufau i le talanoaga: “O le a se mea a faia?” o le tala lea a le tasi. “E i ai sa’u aitia,” o le tala lea a le isi. “Tatou o i luga o le fale, tatala le taualuga, ma tuutuu ifo ai o ia i lalo i le fola!” E mafai foi ona e mafaufau i le tagata mai i lena taimi o loo faalogo atu i nei fuafuaga e le masani ai ma faapea atu, “O le a lau toe mea lena o le a fai?”
Na faaauau pea le tala:
Ona o ae lea o i latou i luga o le fale, ua tuutuu ifo ia te ia ma lona moega i maa omea o le fale i totonu i luma o Iesu.
“Ua silafia e ia lo latou faatuatua, ona fetalai atu lea o ia ia te ia, Sole, ua faamagaloina au agasala” (Luka 5:19–20).
Na manatu le au tusiupu ma le au Faresaio o se upuleaga i le Atua lea mea, o lea na tali atu ai Iesu:
“Po o le fea e faigofie, po o le fai atu, Ua faamagaloina au agasala; po o le fai atu, Tulai ia, ina savali?
“Ae peitai ina ia iloa ai e outou o i le Atalii o le tagata le pule i le lalolagi e faamagalo ai agasala, (ua fetalai atu ia i le supa,) Ou te fai atu ia te oe, Tulai ia, ina ave lou moega, ma e alu i lou fale” (Luka 5:23–24).
E matagofie le iuga o le tala:
“Ona tulai loa lea o ia i o latou luma, ua ave le mea na taoto ai o ia, ona alu ai lea i lona fale, ua vivii atu i le Atua.
“Ua matua ofo i latou uma, ma vivii atu i le Atua, ua latou matua fefefe foi, ua faapea ane, Ua fāi ese na mea ua tatou iloa i le aso nei” (Luka 5:25–26).
Afai E te Lagona le Vaivai Faaleagaga
Masalo e te le’i molimauina sea ituaiga o mea na tupu, ae e tele lava auala eseese e faaaoga ai lenei tala i lou olaga. E mafai ona e tuuina oe lava i le tulaga o le tamaloa ma’i. Faapea la sa e vaivai—e le o le faaletino ae faaleagaga. O fea o le a ave i ai oe e au uo? Atonu e i ai se pati po o se ata tifaga po o se isi gaoioiga, ma e le tele sa’u faamatalaga i lea tulaga—o fea o le a latou aveina i ai oe? E aoao mai e lenei tala se lesona matagofie: Atonu o le a i ai se aso o le a e le malosi ai e pei ona tatau ai. O le a taua i lena tulaga le filifiliga o au uo. Filifili ni uo o le a aveina oe ia Keriso.O le i ai o ni uo o e o le a aveina pea oe i nofoaga maualuluga o se faamanuiaga lea e le lau maua.
O Le a le Ituaiga Uo e I Ai Oe?
Ae e i ai le isi auala e tilotilo ai i le mau lenei. Tuu oe lava i tulaga o uo. O le a le ituaiga uo e i ai oe? E ui o le Faaola na faamaloloina ma faamagalo i le tamaloa, ae e taua foi le ta’uina o uo. Na latou alolofa i la latou uo ma mananao e fesoasoani ia te ia. Latou te faavaivai ma o i le fale ina ua faigata le tulaga. Mafaufau i le fiafia na latou lagonaina ina ua tilotilo mai i lalo mai le taualuga ma iloa mai la latou uo ua tu i luga ma ave lona moega ma savali! O le isi na lesona: Ia avea ma se uo e aveina tagata ia Keriso. O nei uo na lototetele, faatauanau, e oo lava i le sogasoga o le mafaufau. I soo se upu, i soo se gaoioiga, i soo se filifiliga, e mafai ona e taitaiina tagata i le Faaola, o le na te mafai ona faamaloloina i tatou e le na o le faaletino ae faapea foi le faaleagaga.
O Se Tagata e maua i le Ma’i Supa na Tuuina ifo i lalo mai le Taualuga ia Iesu, saunia e Frank Adams, faaaloaloga a le Falemataaga o Talafaasolopito o le Ekalesia