Taui o le Toefausia
A o ou vaai i toega mai le mafuie, sa ou faanoanoa. Ae peitai na ou toe iloaina, e alofa le Atua i e na maliliu e faapena foi i e na sao mai.
Ona ou te nofo i Shanghai, i Saina, na ou mauaina se avanoa e malaga faatasi ai ma se vaega o le aoga i le itumalo o Sichuan i sautesisifo o Saina ina ia fesoasoani e fausia fale mo e na mafatia i le mafuie lea na faataumaoia lena eria i nai tausaga ua mavae. Sa matou galulue malosi e faataatitia piliki, asu le palu, tulei uili paelo e tumu i piliki, ma tuulima atu piliki i lalo i “laina ua faatulagaina” o tagata. E oo atu i le aso lona lua ua tiga lou tua, ma ua masaesae uma ou totigi lima. Ae ui i lea, sa avea le malaga ma se aafiaga le mafaagaloina mo au ma na faamalosia ai lau molimau i lou taua faaletagata lava ia faapea ai foi ma tagata taitoatasi, o se tasi o tulaga faatauaina a Tamaitai Talavou.
Ao ou galue malosi i aso taitasi, na ou iloaina le tuputupu ae o lou talitonuga i lou lava taua. Na ou maua se faalogoga lelei ia te au lava ia aua na ou faia ni mea e faaleleia ai le tulaga o loo soifua ai i latou o e le tagolima.
Sa matou maua foi se avanoa e asia ai se aoga i le eria. Ina ua matou taunuu, sa tamomoe mai e agai mai ia i matou se vaega o tamaiti aulelei lava. Ina ua ou vaai i nei tamaiti laiti matagofie, na ou iloaina lo latou foi taua faaletagata lava ia. O i latou uma foi o ni fanau lalelei a le Atua, ma na malosi lou lagona e alofa ma silafia e Ia i latou taitoatasi.
Ina ua taufaaiuiu lau malaga na matou maua le avanoa e o ai i se mataaga, lea o le a fai ai la matou aiga o le aoauli. Ae ina ua matou taunuu atu iina, na matou iloa ai ua faatafunaina e le mafuie. O se faatafunaga sili lea ona leaga. Na oo mai ia te au le fia tagi. O tumutumu ma puipui o fale na to ifo i lalo, na palalasi laau i tafatafa, ma na gasu mea uma. Na taavale mai se ala tele mai luga o le mauga ma pasasa i autafa o se tasi fale, ma na mafua ai ona to ifo i lalo le taualuga ma le puipui. Sa i ai se seevae e tasi na taatia i luga o se tasi faasitepu.
A o ou mafaufau e uiga i lenei mea ma le faamatalaga na maliliu tagata i lenei faalavelave, sa ou tauivi ina ia ou malamalama pe faapefea ona faataga e le Tama Faalelagi lenei mea e tupu. Pe le alofa o Ia ia i latou? Ona ou toe mafaufau lea i tua i la matou talanoaga i le vasega a Tamaitai Talavou ma iloa ai e sao lava, e alofa o Ia ia i latou. Na Ia silafia ma alofa ia i latou taitoatasi. O i latou na maliliu i lena aso o ni fanau uma lava a le Atua. I le amataga, na sili atu ona ou faanoanoa pe a mafaufau e uiga i ai. Ona ou iloaina lea o nei tagata ua i ai i le lalolagi o agaga ma e mafai ona latou toe foi atu i le Tama Faalelagi. O lenei manatu na aumaia ai ia te au le mafanafana ma le lagona toafilemu.
Ou te iloa o au o se afafine o le Atua, ma se taua maoae faaletagata lava ia. O i tatou uma lava o fanau a lo tatou Tama Faalelagi, o lē silafia i tatou taitoatasi. E sili atu le loloto ma le malosi o Lona alofa ia i tatou nai lo soo se mea tatou te mafaufauina. Na loloto le totoina o lenei malamalamaaga i totonu o lou loto ao ou galue ma auauna atu i tagata na matua mafatia i le mafuie i Sichuan.
Na fesoasoani Ashley Dyer (taumatau) e toe fausia fale mo tagata o le lotoifale ina ua maea le mafuie i le 2008 i Sichuan, Saina.
Ata pue o le faaaloaloga a Ashley Dyer