Elder Carl B. Cook

Sa Seventy

Isip usa ka batan-ong misyonaryo sa Language Training Mission (ang nag-una sa Missionary Training Center) nangandam sa pag-adto sa Hamburg, Germany, si Carl Bert Cook naningkamot sa pagkat-on pinulongang German. Samtang siya naningkamot sa pagkat-on sa sukaranang mga bokabularyo, ang mga miyembro sa iyang district mipadayon ngadto sa pagtudlo og mas komplikado nga mga konsepto.

Naguol sa iyang kakulang sa kalamboan, ang batan-ong Elder Cook nangayo og balaan nga tabang pinaagi sa panalangin ug pag-ampo sa priesthood. Human sa usa ka kinasingkasing nga pag-ampo, si Elder Cook nahinumdom nga nakadawat og klaro nga tubag. Ang Ginoo wala motawag kaniya aron mabansay ang pinulongan nga German apan sa pagserbisyo uban sa iyang tibuok kasingkasing, hunahuna ug kusog.

“Nakahunahuna dayon ko, ‘Makahimo ko niana.’” miingon si Elder Cook, bag-ong gitawag nga usa ka miyembro sa Unang Korum sa Seventy. “ ‘Ako makaserbisyo uban sa akong tibuok kasingkasing, hunahuna, ug kusog.’ Mibarug ko ug mibati nga nahuwasan. Sa kalit lang, ang akong sukdanan nausab gikan kon sa unsay gibuhat sa akong kompanyon ug mga miyembro sa district ngadto kon unsay gibati sa Ginoo sa akong gibuhat.”

Bisan og si Elder Cook miingon nga dili siya dali nga makat-on sa pinulongan human niana nga kasinatian, wala niya batia ang iyang kabalaka kaniadto tungod kay siya nasayud nga siya nagbuhat sa unsay gusto sa Ginoo nga iyang buhaton. Kana nga leksyon, siya miingon, importante sa tanan nga mga calling nga iyang nahuptan sukad, lakip ang pagkabishop, magtatambag sa stake presidency, stake president, presidente sa New Zealand Auckland Mission, Area Seventy, ug karon niining bag-on buluhaton.

Si Elder Cook nakahuman og bachelor’s degree sa business marketing gikan sa Weber State College ug master’s degree sa business administration gikan sa Utah State University. Iyang gigahin ang iyang propesyon sa pagtrabaho sa real estate development.

Si Elder Cook natawo didto sa Ogden, Utah, USA, niadtong Oktubre 1957 ngadto ni Ramona Cook Barker ug kanhi Bert E. Cook. Naminyo siya ni Lynette Hansen niadtong Disyembre 14, 1979, saTemplo sa Ogden Utah. Mga ginikanan sila sa lima mga anak.