Pagpamatuod
Ang mga sukaranan sa pag-angkon ug pagpatunhay sa pagpamatuod sa ebanghelyo ni Jesukristo mao ang walay liko-liko, klaro, ug madala ra sa kapasidad sa matag tawo.
Usa sa dakong mga panalangin sa akong kinabuhi sulod sa daghang katuigan mao ang oportunidad nga mapalibutan ug makatrabaho ang mga kabatan-onan sa Simbahan. Akong gikonsiderar kini nga mga panag-uban ug mga panaghigalaay nga nalakip sa pinakanindot ug pinakabililhon sa akong kinabuhi. Kini usab ang kadaghanan nga gibasihan sa akong pagkamalaumon alang sa kaugmaon sa Simbahan, sa katilingban ug sa kalibutan.
Atol niini nga mga pakig-uban nakahigayon usab ako sa pagpakigsulti ngadto sa uban nga adunay mga pagduha-duha o mga hagit sa ilang mga pagpamatuod. Samtang ang mga detalye managlahi ug usahay talagsaon, kadaghanan sa mga pangutana ug mga hinungdan sa kalibug ingon og managsama ra. Sa samang paagi, mga isyu kini ug mga kabalaka nga dili lamang kutob sa usa ka pundok sa katawhan o kaedad. Mahimo kining mohasol niadtong kinsa mga miyembro sa Simbahan ang mga kagikan, ingon man sa bag-ong mga miyembro sa Simbahan, ug usab sa nagpamilyar pa lamang sa Ang Simbahan ni Jesukristo sa mga Santos sa Ulahing mga Adlaw. Ang ilang mga pangutana sa kasagaran maoy resulta sa tinuoray nga pagpangutana o kakuryuso. Tungod kay ang mga implikasyon makahuluganon kaayo ug seryuso alang sa matag usa kanato, ingon og tukma ang paghisgot kabahin sa atong mga pagpamatuod. Sa sitwasyon natong mga Santos sa Ulahing mga Adlaw, atong gisabut ang atong mga pagpamatuod isip sigurado nga pagsaksi sa katinuod sa ebanghelyo ni Jesukristo, nga maangkon pinaagi sa pagpadayag sa Espiritu Santo.
Samtang ang usa ka pagpamatuod yano ug klaro dinhi niining importante nga pahayag, motumaw gikan niini ang daghang kalagmitan nga mga pangutana, sama sa: Kinsa man ang may katungod sa pag-angkon og pagpamatuod? Unsaon man pag-angkon sa usa ka tawo sa gikinahanglan nga pagpadayag? Unsa ang mga lakang sa pag-angkon og pagpamatuod? Ang pag-angkon og pagpamatuod ba usa ka hitabo o padayon nga proseso? Ang matag usa niini nga mga pangutana ug uban pa may kaugalingon nga hugpong sa mga pangutana, apan ang mga sukaranan sa pag-angkon ug pagpatunhay sa pagpamatuod sa ebanghelyo ni Jesukristo mao ang walay liko-liko, klaro ug madala ra sa kapasidad sa matag tawo.
Patubaga ako kadali niining posible nga mga pagduha-duha ug dayon motandi ngadto sa mga ideya nga gipaambit bag-ohay lang pinaagi sa kasaligan nga mga higalang young adult kinsa adunay mga personal nga kasinatian sa pag-angkon sa ilang mga pagpamatuod. Sila usab adunay mga oportunidad sa pagpangalagad sa uban nga adunay mga hagit o mga kalisud sa pipila ka mga aspeto sa ilang pagtuo ug gituohan.
Una, kinsa ang may katungod sa pag-angkon og pagpamatuod? Ang tanan nga andam mobayad sa bugti—buot ipasabut nagsunod sa mga sugo—makaangkon og papamatuod. “Busa ang tingog sa Ginoo modangat ngadto sa mga lumulupyo sa yuta, nga ang tanan nga maminaw makadungog” (D&P 1:11). Usa ka sukaranan nga rason sa Pagpahiuli sa ebanghelyo mao nga “ang matag tawo unta mamulong sa ngalan sa Dios ang Ginoo, gani ang Manluluwas sa kalibutan; nga ang hugot nga pagtuo usab molambo sa yuta” (D&P 1:20–21).
Ikaduha, unsaon man pag-angkon sa usa ka tawo sa gikinahanglan nga pagpadayag, ug unsa ang sukaranang mga lakang sa pagkab-ot niini? Ang sumbanan klaro ug mao gihapon sa tanang mga panahon. Ang saad nga gihatag sa pag-angkon og usa ka pagpamatuod sa Basahon ni Mormon magamit usab sa tanan:
“Ug kon kamo makadawat niini nga mga butang”—pasabut nga kamo naminaw, nagbasa, nagtuon ug namalandong sa pangutana nga anaa—“pangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod”—nagpasabut nga kamo mag-ampo sa paagi nga mahunahunaon, piho, ug may balaang pagtahud uban sa lig-ong pasalig nga mosunod sa tubag sa inyong pag-ampo—“ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo.
“Ug pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang” (Moroni 10:4–5).
Ikatulo, ang pag-angkon og pagpamatuod ba usa ra ka panghitabo o padayon nga proseso? Ang pagpamatuod sama ra sa usa ka buhi nga butang nga motubo ug molambo kon maayo ang pagkaatiman. Nagkinahanglan kini og padayon nga pag-alima, pag-atiman, ug pagpanalipod aron molig-on ug molambo. Sa samang paagi, ang pagpasagad o kapakyas sa pag-alima niana nga pagpamatuod mosangput sa pagkahanaw niini o pagkunhod. Nagpahimangno ang mga kasulatan nga ang paglapas o pagsupak sa mga sugo sa Dios mosangput sa pagkawala sa Espiritu ug gani ngadto sa paglimud sa pagpamatuod nga kausa iyang naangkon (tan-awa sa D&P 42:23).
Karon tuguti kong ipaambit ang 10 sa mga obserbasyon ug mga sugyot sa akong bililhon ug matinud-anong batan-on nga mga higala. Ang mga ideya nga ilang gipaambit komon sa ilang panghunahuna ug kasinatian; sa ingon, kini dili makapatingala ni bisan kinsa kanato. Sa walay palad ug ilabi na sa mga panahon sa kaugalingon natong panlimbasug ug kasub-anan, tingali temporaryo natong makalimtan o dili kini magamit sa atong kaugalingon.
Una, ang tanan adunay bili tungod kay kitang tanan mga anak sa Dios. Nakaila Siya kanato, nahigugma kanato, ug gusto nga molampus kita ug makabalik ngadto Kaniya. Kinahanglang makakat-on kita nga mosalig sa Iyang gugma ug sa Iyang saktong panahon kay sa atong kaugalingon nga usahay walay pailub ug dili hingpit nga mga tinguha.
Ikaduha, samtang hingpit kitang mituo sa dakong kausaban sa kasingkasing nga gihulagway diha sa mga kasulatan (tan-awa sa Mosiah 5:2; Alma 5:12–14, 26), angay kitang makasabut nga sagad kining mahitabo sa hinay-hinay, kay sa diha-diha dayon o naa dayon ang tanan, ug agig tubag sa piho nga mga pangutana, mga kasinatian, ug mga kabalaka ingon man pinaagi sa atong pagtuon ug pag-ampo.
Ikatulo, kinahanglan kitang mahinumdom nga ang sukaranan nga katuyoan sa kinabuhi mao ang pagasulayan ug pagahagiton, ug sa ingon kinahanglan kitang makakat-on sa paglambo gikan sa atong mga hagit ug magmapasalamaton sa mga lekyon nga nakat-unan nga dili nato maangkon sa mas sayon nga paagi.
Ikaupat, kinahanglan kitang makakat-on sa pagsalig sa mga butang nga atong gituohan o nahibaloan sa pagpatunhay kanato panahon sa pagduha-duha o sa mga problema diin kita nanlimbasug.
Ikalima, sama sa gitudlo ni Alma, ang pag-angkon og pagpamatuod kasagaran usa ka paglambo subay sa mga butang nga makahatag sa paglaum, pagtuo, ug hangtud ngadto sa kahibalo sa kamatuoran sa piho nga baruganan, doktrina o sa ebanghelyo mismo (tan-awa sa Alma 32).
Ikaunom, ang pagtudlo sa laing tawo sa unsay atong nahibaloan makapalig-on sa atong kaugalingong pagpamatuod samtang naglig-on kita sa lain. Kon kamo mohatag sa laing tawo og kwarta o pagkaon, dyutay nalang ang mabilin kaninyo. Hinoon, kon kamo mopaambit sa inyong pagpamatuod, mopalig-on kini ug mopalambo sa naghatag ug sa naminaw.
Ikapito, kinahanglang buhaton nato ang ginagmay apan kinahanglanong mga butang matag adlaw ug sa kanunay. Ang mga pag-ampo, pagtuon sa kasulatan ug sa ebanghelyo, pagtambong sa mga miting sa Simbahan, pagsimba diha sa templo, pagtuman sa visiting teaching, home teaching, ug sa ubang mga buluhaton kining tanan naglig-on sa atong pagtuo ug nagdapit sa Espiritu sa atong kinabuhi. Kon mapasagdan nato ang bisan unsa niini nga mga pribilehiyo, mamiligro ang atong mga pagpamatuod.
Ikawalo, kinahanglang dili kaayo taas ang atong sumbanan alang sa uban kay sa atong kaugalingon. Kasagaran gayud kita motugot nga ang mga sayop o mga kapakyasan sa uban, ilabi na sa mga lider o mga miyembro sa Simbahan, moimpluwensya kon unsay gibati nato sa atong kaugalingon o sa atong mga pagpamatuod. Ang mga kalisdanan sa uban dili usa ka katarungan sa atong kaugalingong mga pagkulang.
Ikasiyam, mas maayo ang paghinumdom nga ang paglisud-lisud sa inyong kaugalingon kon masayop kamo mahimong dili maayo sama sa pagbaliwala kon ang tinuoray nga paghinulsol gikinahanglan.
Ug ikanapulo, kinahanglan kita nga sigurado kanunay nga ang Pag-ula ni Kristo hingpit ug nagpadayong aktibo alang sa matag usa kanato kon kini atong tugutan. Dayon ang tanan mohaum ra sa iyang dapit bisan kon kita padayon nga manlimbasug sa ubang butang, sa mga kinaiya, o sa ingon og nawala nga mga bahin sa atong hugot nga pagtuo.
Mapasalamaton ko sa mga ideya, mga kalig-on, ug mga pagpamatuod sa daghan kaayo nakong dalaygon nga batan-ong mga higala ug kaubanan. Kon kauban ko nila, ako malig-on, ug kon ako mahibalo nga kauban sila sa lain, madasig ako nga mahibalo sa maayo nga ilang gibuhat ug sa serbisyo nga ilang gihatag sa ngalan sa Manluluwas nga ilang gisimba ug gipaningkamutan nga masunod.
Ang mga tawo maghimo sa maayo ug importanting mga butang tungod kay sila adunay mga pagpamatuod. Samtang tinuod kini, makaangkon usab kita og mga pagpamatuod tungod sa atong gibuhat. Si Jesus miingon:
“Ang gitudlo ko dili akong kaugalingon, kondili iya sa nagpadala kanako.
“Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios, o nagsulti ba lamang ako sa kinaugalingon kong pagbulot-an” (Juan 7:16–17).
“Kon nahigugma kamo kanako, inyong pagatumanon ang akong mga sugo” (Juan 14:15).
Sama kang Nephi ug kang Mormon sa karaan, “Ako wala masayud sa kahulugan sa tanang mga butang” (1 Nephi 11:17; tan-awa usab sa Mga Pulong ni Mormon 1:7), apan sultihan ko kamo unsa gayud ang akong nahibaloan.
Nasayud ko nga ang Dios nga atong Langitnong Amahan buhi ug nahigugma kanato. Nasayud ko nga ang Iyang talagsaong espesyal nga Anak, si Jesukristo, mao ang atong Manluluwas ug Manunubos ug ang pangulo sa Simbahan, nga nagdala sa Iyang pangalan. Nasayud ko nga si Joseph Smith nakasinati sa tanan nga iyang gisulti ug gitudlo mahitungod sa Pagpahiuli sa ebanghelyo sa atong panahon. Nasayud ko nga gigiyahan kita og mga apostoles ug mga propteta karon ug si Presidente Thomas S. Monson naghupot sa tanang mga yawe sa priesthood nga kinahanglanon aron sa pagpanalangin sa atong kinabuhi ug sa pagpadayon sa buhat sa Ginoo. Nasayud ko nga kitang tanan may katungod alang niini nga kahibalo, ug kon kamo nanlimbasug, makasalig kamo sa katinuod sa mga pagpamatuod nga inyong nabati gikan niini nga pulpito niini nga komperensya. Niini nga mga butang ako nasayud ug nagpamatuod sa pangalan ni Jesukristo, amen.