Elder O. Vincent Haleck

Sa Seventy

Gikan pa sa pagkabata si Elder Otto Vincent Haleck mibayad og ikapulo, magpuasa, ug magtuon sa mga kasulatan—ug dayon iyang nahimamat ang mga misyonaryo ug nabunyagan.

Ang inahan ni Elder Haleck usa ka miyembro sa Simbahan apan wala na mosimba sulod sa daghang mga tuig. Ang iyang amahan dili miyembro sa Simbahan. Bisan pa ang pamilya mibayad og ikapulo, magpuasa kada semana, mobasa sa Biblia kada adlaw, ug mohatag unsay naa nila ngadto sa nanginahanglan. Si Elder Haleck nagagikan sa kabilin sa hugot nga pagtuon.

Si Elder Haleck natawo niadtong Enero 1949 sa American Samoa. Ang iyang mga ginikanan, nga sila si Otto ug Dorothy Haleck, mipaeskwela niya sa California, USA. Sa edad nga 17, nakamatikod siya nga ang ubang mga amigo sa gobyerno sa estudyante lahi gikan sa ubang mga estudyante. “Giimbitar ko nila sa Mutual, ug ang misunod usa na ka kasaysayan,” miingon si Elder Haleck.

Si Elder Haleck nakadawat og bachelor’s degree sa advertising ug marketing gikan sa Brigham Young University. Aduna siyay daghang mga negosyo sa American Samoa ug adunay pilantropiko nga buluhaton. Si Elder Haleck ug ang iyang asawa, nga si Peggy Ann Cameron, naminyo niadtong Hunyo 29, 1972, sa Templo sa Provo Utah. Mga ginikanan sila sa tulo ka mga anak.

Sa katapusan ang tibuok pamilya ni Elder Haleck nakakaplag sa ebanghelyo. Si Elder Haleck maoy nagbunyag sa iyang 80 anyos nga amahan ug nakakita sa iyang inahan nga mibalik ngadto sa Simbahan human sa 50 ka tuig sa kaminyoon.

Sa wala pa ang iyang tawag ngadto sa Ikaduhang Korum sa Seventy, si Elder Haleck nagserbisyo isip full-time nga misyonaryo didto sa Samoa Apia Mission, bishop, stake high councilor, patriarch, stake president, ug karong labing bag-o, presidente sa Samoa Apia Mission.

Si Elder Haleck nagtuo nga ang iyang tanang mga kasinatian sa kinabuhi migiya kaniya ngadto sa asa man siya karon. “Sa akong paghinumdom sa akong kinabuhi, ug ako makasulti nga ako nakakita sa kamot sa Ginoo, miingon si Elder Haleck. “Ako mapasalamaton ug napasidunggan sa pagsalig nga gihatag sa Ginoo kanako. Akong gihigugma ang Ginoo ug naglaum nga mahimong maayong instrumento. Ako nasayud nga ang Ginoo motabang kanato.”