Dinasig nga mga Pulong sa usa ka Dinasig nga Buhat: Unsa ang Gisulti sa mga Mamumulong mahitungod sa Welfare.

Daghang mga pakigpulong panahon sa ika-181 nga Tinuig nga Kinatibuk-ang Komperensya sa Simbahan gipahinungod sa pagsaulog sa programa sa welfare sa Simbahan, karon anaa sa iyang ika-75 nga tuig.

Sa ubos mao ang mga kinutlo gikan sa mga pakigpulong sa mga mamumulong sa programa sa welfare ug sa mga baruganan sa welfare nga gihan-ay sa Ginoo aron sa pagtabang sa Iyang mga anak sa pagtabang sa ilang mga kaugalingon.

Presidente Thomas S. Monson

“Ako mopadayag nga ang programa sa welfare sa Ang Simbahan ni Jesukristo sa mga Santos sa Ulahing mga Adlaw dinasig sa Makagagahum nga Dios.” (Tan-awa sa “ Ang Balaan nga Templo—Ang Suga sa Kalibutan” pahina 90.)

Presidente Henry B. Eyring, Unang Magtatambag sa Unang Kapangulohan.

“Ang dakong temporal nga mga panginahanglan sa mga anak sa Langitnong Amahan miabut na usab sa atong panahon karon sama nga kini anaa kaniadto ug sama nga maanaa kini sa tanang panahon” Ang mga baruganan sa pundasyon sa programa sa welfare sa Simbahan dili lamang alang sa usa ka panahon o sa usa ka dapit. Alang kini sa tanang panahon ug sa tanang dapit”

“[Ang Ginoo] midapit ug misugo kanato sa pag-apil diha sa Iyang buhat aron sa pagbayaw niadtong nanginahanglan. Naghimo kita og pakigsaad sa pagbuhat niana diha sa pagbunyag ug sa sulod sa balaan nga mga templo sa Dios. Bag-uhon nato ang pakigsaad ma-Dominggo sa higayon nga kita moambit sa sakrament.” (Tan-awa sa “Mga Oportunidad sa Paghimo og Maayo,” pahina 22.)

Bishop H. David Burton, Presiding Bishop sa Simbahan

“Ang propetikanhong plano sa welfare dili lamang kini ginagmay nga sugilanon sa kasaysayan sa Simbahan. Ang mga baruganan nga gibasihan niini nagpaila kon si kinsa kita isip mga katawhan. Lintunganay kini kon si kinsa kita isip indibidwal nga mga disipulo sa atong Manluluwas ug Ehemplo, si Jesus ang Kristo.”

“Kining sagrado nga buhat dili lamang makatabang ug makapanalangin niadtong mga nag-antus o nanginahanglan. Isip mga anak sa Dios, dili nato mapanunod sa hingpit ang kinabuhing dayon nga walay hingpit nga pagpamuhunan pinaagi sa pag-amuma sa usag usa samtang nia kita sa yuta. Pinaagi lamang sa mabinationg paagi sa pagsakripisyo ug pagtugyan sa atong kaugalingon ngadto sa uban kita makakat-on sa mga baruganang celestial sa sakripisyo ug pagpahinungod.”

“Kini ang sagradong buhat nga gipaabut sa Manluluwas gikan sa Iyang mga disipulo. Mao kini ang buhat nga Iyang gimahal dihang Siya dinhi pa sa yuta. Kini ang buhat diin ako nahibalo nga Siya atong makita nga mohimo kon Siya nia pa karon atong kauban. (Tan-awa sa “Ang Makapabalaan nga Buhat sa Welfare,” pahina 81.)

Silvia H. Allred, Unang Magtatambag sa Kinatibuk-ang Kapangulohan sa Relief Society.

“Ang mga kalalakin-an ug kababayen-an sa Simbahan nagtinabangay karon sa pagdala og kahupayan ngadto niadtong nanginahanglan. … Kon ang paghigugma nahimong giya nga baruganan sa atong pag-amuma sa uban, ang atong pag-alagad ngadto kanila nahimong ebanghelyo nga inubanan sa buhat. Kini mao ang ebanghelyo diha sa labing putli nga higayon. Kini lunsay nga relihiyon.” (Tan-awa sa “Ang Tinuod nga Kinaiya sa Pagka-disipulo,” pahina 84.)