Paghimo sa Komperensya nga Kabahin sa Atong mga Kinabuhi

Hunahunaa ang paggamit sa pipila niini nga mga kalihokan ug mga pangutana isip pagsugod sa panaghisgutan sa pamilya o personal nga pagpamalandong samtang inyong himoon ang mga pagtulun-an sa kinatibuk-ang komperensya nga kabahin sa inyong kinabuhi.

Makita ninyo ang mga pakigpulong sa kinatibuk-ang komperensya diha sa online sa conference.lds.org.

Pahinumdom: Ang mga numero sa pahina nga gilista sa ubos nagpakita sa unang pahina sa pakigpulong nga gihisgutan.

Para sa mga Bata

Presidente Thomas S. Monson mipahibalo nga ang Simbahan motukod og bag-ong mga templo, nga ang total nga gidaghanon sa mga templo nga gigamit, gitukod pa, o gipahibalo ngadto sa 160. Tan-awa sa mapa aron makita ang Meridian, Idaho, USA; Fort Collins, Colorado, USA; Winnipeg, Manitoba, Canada; ug ang templo nga labing duol sa inyong balay. Basaha ug i-istorya pag-usab ang mga istorya ni Presidente Monson mahitungod sa matinud-anong mga miyembro kinsa misakripisyo og dako aron makaadto sa templo (pahina 90). Paghimo og mga tumong nga moadto sa templo kon makahimo ka na, o hisguti ang mga paagi nga magpabilin nga takus sa pagsulod sa templo.
Sa dihang si Adan ug Eva nagpuyo sa yuta, usa sa mga paagi nga sila misimba sa Langitnong Amahan mao ang pagsakripisyo sa mga hayop. Elder L. Tom Perry mitudlo nga ang Manluluwas mitudlo sa sakramento ngadto sa Iyang mga disipulo sa Igpapahulay nga adlaw isip bag-o nga matang sa pagsimba. Kita nagpadayon sa pagsimba pinaagi sa pag-ambit sa sakramento sa Igpapahulay. Ribyuha ang pakigpulong ni Elder Perry (pahina 6) isip pamilya aron makakat-on sa sakto nga sinina sa Dominggo ug laing mga paagi sa pagtahud sa sakramento ug sa Igpapahulay.
Elder D. Todd Christofferson mitudlo nga si Jesukristo mitudlo kanato nga kita kinahanglang maningkamot nga mahisama Kaniya ug sa atong Langitnong Amahan (pahina 97). Ang atong Langitnong Amahan usahay “mopanton” sa Iyang mga anak aron sa pagtabang nato nga mahimong sama Kaniya. Hisguti kon unsa ang gipasabut sa pagpanton. Basaha o i-istorya pag-usab ang nanobra og tubo nga currant bush. Hisguti nga ang mga problema o kapakyasan sa tinuod makatabang nato nga mas molig-on ug mas mabungahon.
Si Elder Richard J. Maynes mitudlo nga ang mga pamilya sama sa mga pisi (pahina 37). Ang pisi adunay daghang mga lanot nga huyang kon mao ra apan lig-on kon kini gilubid. Sa samang paagi, kon ang tanang mga miyembro sa pamilya mobuhat unsa ang matarung ug magtinabangay, ang kada usa sa pamilya malig-on ug mas makahimo og daghan kay sa kon siya lang. Hatagi ang kada sakop sa inyong pamilya og piraso sa lambo o yarn. Hisguti ang mga paagi nga ang kada sakop sa pamilya makaserbisyo ug makapakalig-on sa laing mga sakop sa pamilya. Dayon tan-awa kon unsa ka lig-on ang mga piraso sa pisi o yarn kon bugkuson og dungan.

Para sa Kabatan-onan

Ang inyo bang klase o korum nagkahiusa kutob sa mahimo? Human makaribyu sa pakigpulong ni Presidente Henry B. Eyring mahitungod sa panaghiusa (phina 62), paghimo og lista sa unsay imong mabuhat nga magkasuod pa pag-ayo ang inyong grupo.
Si Elder Russell M. Nelson naghisgot mahitungod sa “pagkarinderiya” nga pagkamasulundon (pahina 34). Hisguti uban sa inyong pamilya, klase, korum unsay gipasabut niini ug ngano nga wala kini moepekto.
Si Elder M. Russell Ballard mihulagway sa putli nga gugma ni Kristo isip aktibo nga gugma (pahina 46) nga makita sa yanong mga buhat sa pagkamabination ug pagserbisyo. Pagplano og mga paagi nga ang inyong korum o klase makapakita og gugma ngadto sa usa ka tawo sa inyong ward, branch, o komunidad ug dayon buhata ang inyong plano.
Si Elder Quentin L. Cook miistorya mahitungod sa usa ka gamay nga bag nga nakita human sa sayaw sa kabatan-onan (pahina 18). Unsay nakit-an sa mga lider sa sulod sa gamay nga bag daghang mga butang nga nagsulti mahitungod sa batan-ong babaye nga nanag-iya niini. Unsay ikasulti sa mga sulod sa inyong gamay nga bag, pitaka, o bag sa eskwelahan mahitungod ninyo, ug unsa nga mga kausaban ang inyong gustong himoon sa mga butang nga gimahal ninyo?
Si Elder Lynn G. Robbins naghisgot mahitungod nga mas mahimong sama sa Manluluwas (pahina 103). Hunahunaa unsay gipasabut nga mahimong sama ni Jesukristo kay sa pagbuhat lamang unsay Iyang gisugo. Dayon hunahunaa unsa nga mga kausaban ang inyong mahimo sa inyong kinabuhi aron mahimong mas sama sa Manluluwas.

Para sa mga Hamtong

Si Presidente Dieter F. Uchtdorf (pahina 58) mipakigbahin og istorya mahitungod sa usa ka tawo kinsa nagpuyo nga ubos sa iyang mga pribelihiyo sa dihang wala siya makaapil sa daghang mga kalihokan ug lamian nga pagkaon nga gitanyag sa iyang cruise ship tungod kay wala siya makahibalo niining tanang mga butang nga nalakip na sa iyang tiket. Hisguti uban sa mga sakop sa pamilya kinsa naghupot sa priesthood ang mga paagi nga sila makapahimulos sa ilang “mga pribelihiyo mahitungod sa sagrado nga gahum, mga gasa, ug mga panalangin nga [ila] ang oportunidad ug katungod isip tighupot sa priesthood sa Dios.”
Si Presidente Boyd K. Packer mitudlo mahitungod sa gahum sa pagpasaylo (pahina 30). Aduna bay mga tawo nga kinahanglan nimong pasayloon, o aduna bay makapasamok nga mga kasinatian nga kinahanglan ninyong “biyaan … na lang”? Tinguhaa ang tabang sa Ginoo sa pagpangita og kalinaw ug gahum sa pagpasaylo.
Si Elder Richard G. Scott misulti kon sa unsa nga paagi siya ug ang iyang asawa nga si Jeanene, mopakita og pagmahal pinaagi sa pagsulat ngadto sa usag usa. (pahina 94). Hunahunaa ang pagsulat og mubo nga sulat nga mag-ingon nga kamo nahigugma ug nagpasalamat sa inyong kapikas. Ibutang kini diin makit-an sa inyong kapikas.
Si Elder David A. Bednar mikutlo sa kasinatian ni Presidente Joseph F. Smith sa pag-angkon og pagpamatuod (pahina 87). Ribyuha kini nga istorya ug hunahuna ang mahitungod kon unsa nga mga kasinatian ang nakaimpluwensya sa inyong pagpamatuod.

Ljubljana, Slovenia

Coatzacoalcos, Mexico