Elder Larry Y. Wilson

Sa Seventy

Ang pagbalanse sa trabaho, Simbahan, ug mga responsibilidad sa pamilya usa ka hagit alang ni Elder Larry Young Wilson, apan siya misiguro sa mga sakop sa pamilya masayud kon unsa sila kaimportante ngadto kaniya.

“Ang labing makaimpluwensya nga kasinatian nga akong nasinati mao ang pagkabana ug pagkaamahan,” miingon si Elder Wilson. “Talagsa ra kaayo ko nga dili makatambong sa pasundayag sa usa ka anak sa atleta, musika, o laing kalihokan. Basahan nako sila og mga istorya sa dili pa matulog ug mag-ampo uban nila sa dili pa sila pakatulgon sa gabii. Importante kaayo nga naa diha.”

Si Elder Wilson nasayud sa mga buluhaton kinsa adunay tahas sa pagpangulo sa tanang mga speto sa kinabuhi. Siya natawo niadtong Disyembre 1949 sa Siyudad sa Salt Lake, Utah, USA, ngadto nila ni George ug Ida Wilson ug nagtubo didto sa Pocatello, Idaho, USA. Nakadawat siya og bachelor’s degree sa English ug American literature gikan sa Harvard University, ug dayon usa ka master’s degree sa business administration gikan sa Stanford Graduate School of Business.

Si Elder Wilson migahin sa iyang propesyon isip usa ka consultant ug executive sa industriya sa pag-atiman sa panglawas. Bisan og ang iyang trabaho malisud, gisiguro ni Elder Wilson nga dili kini mobabag sa iyang kinabuhi.

“Kinahanglan nga ikaw moestablisar og mga utlanan sa imong trabaho,” miingon siya. “Kon dili, ang tanan hakpon niini. Sa praktikal nga pagkasulti, ang mga dapit sa trabaho, simbahan, ug panahon sa pamilya magpuli-puli samtang maghulat ang uban. Pag-ampo nga magiyahan ug kamo makahibalo unsa ang unahon nianang adlaw.”

Si Elder Wilson nagkugi sa pagserbisyo isip usa ka misyonaryo sa Brazil Central Mission ug isip usa ka bishop, stake president, ug Area Seventy sa wala pa matawag ngadto sa Ikaduhang Korum sa Seventy.

Ang nagtabang ni Elder Wilson nga makakaplag nianang importante nga balanse sa iyang tanang pagserbisyo mao ang iyang asawa, nga si Lynda Mackey Wilson, nga iyang giminyoan niadtong Hulyo 10, 1974, sa Templo sa Logan Utah. Ang mga Wilson adunay upat ka mga anak.

“Kon siya mobiya alang sa mga miting sa Simbahan, siya moingon, ‘Bay, mahal. Alagari ang Ginoo,’” miingon si Elder Wilson. “Iyang gitudloana ang among mga anak sa lawom nga kahulugan sa akong pagserbisyo. Sa wala madugay sila moingon, “Bay, Papa. Alagari ang Ginoo!”