Elder José L. Alonso

Sa Seventy

Bisan sa wala pa siya magpasakop sa Simbahan, si José Luis Alonso Trejo adunay pagpamatuod sa gahum sa pag-ampo. “Sa dihang nag-edad pa ko og 11 anyos,” siya miingon, “Hapit ako mamatay. Ang mga doktor wala nay mahimo nako—nakadungog ko nila nga nag-istorya. Mao nga ako nag-ampo ug nag-ampo sa Ginoo, ug Siya miayo nako.

“Sa dihang nakadungog ko sa istorya ni Joseph Smith ug nakahibalo kon giuna sa usa ka batang lalaki nga nag-edad lamang og 14 nakigsulti sa Dios, ako nasayud nga kini tinuod. Ako nasayud nga ang Dios motubag sa atong mga pag-ampo, nga Siya nakaila kanato.”

Kanang mao nga pagbati sa kahupayan migiya ni Elder Alonso samtang nagtuon siya sa Basahon ni Mormon. “Tungod sa iyang pag-ampo ug niini nga libro, ako nasayud nga si Jesus mao ang Kristo,” siya miingon.

Si Elder Alonso natawo sa Siyudad sa Mexico, Mexico, niadtong Nobyembre 1958 ngadto nila ni Luis ug Luz Alonso. Pagkatin-edyer mibalhin siya ngadto sa Cuautla, Mexico, diin siya nagpasakop sa Simbahan. Ang pagtambong og Mutual nakahatag niya og kahigayunan nga makauban ang lig-ong kabatan-onan kinsa mipakigdait niya ug nakahatag niya og ikaduha nga panimalay. Didto usab sa Mutual nga iyang nahimamat si Rebecca Salazar, ang babaye kinsa mao ang mahimo niyang asawa.

Sa dihang si Elder Alonso nag-edad og 19, miserbisyo siya og full-time nga misyon didto sa Mexico Hermosillo Mission. Pagkahuman sa iyang misyon, si Elder Alonso ug Rebecca naminyo niadtong Pebrero 24, 1981, sa Templo sa Mesa Arizona. Mga ginikanan sila sa duha ka mga anak.

Dugang sa pag-alagad isip usa ka institute director alang sa Church Educational System, si Elder Alonso adunay medical degree sa pediatric development ug nagtrabaho isip usa ka homeopathic physician ug surgeon. Ang iyang panarbaho nagpakita sa iyang dugay na nga tinguha sa pagserbisyo ug sa pagpanalangin sa uban—sama nga ang Ginoo mipanalangin kaniya sa dihang siya nasakit sa bata pa. “Ang pagserbisyo sa uban makapahimo og panaghiusa ug panag-inigsoonay,” siya miingon, “ug midapit sa gahum sa Ginoo ngadto sa atong mga kinabuhi.”

Sa wala pa ang iyang tawag ngadto sa Unang Korum sa Seventy, si Elder Alonso nagserbisyo isip bishop, stake mission president, stake president, magtatambag sa mission president, presidente sa Mexico Tijuana Mission, ug Area Seventy.