Savali a Faiaoga Asiasi
O Se Sosaiete o Tamaitai Paia
Suesue i mea nei, ma pe a talafeagai ai, ia talanoaina faatasi ai ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.
Faatuatua • Aiga • Toomaga
Na aoao mai le peresitene aoao lona lua o le Aualofa o Eliza R. Snow: “Sa saunoa le Aposetolo o Paulo i aso anamua e faatatau i tamaitai paia. O le tiute o i tatou taitoatasi ia avea ma se tamaitai paia. E tatau ona maualuluga ni o tatou faamoemoega, pe afai o i tatou o ni tamaitai paia. O le a tatou lagona ua valaauina i tatou ina ia faataunuuina ni tiute taua. E leai lava se tasi e ese mai ai. E leai se uso e faaesea, pe faapea ua pumoomoo tele lona lalolagi, a e o le mea taua o le mea e na te mafai aua e tele sona sao i le faavaeina o le Malo o le Atua i luga o le fogaeleele.”1
Uso e, e le o faaesea i tatou pe pumoomoo foi lo tatou lalolagi. O le taliaina o le meaalofa o le toaga i le Aualofa, e avea ai i tatou ma vaega o le mea sa faamatalaina e le Perofeta o Iosefa o se sosaiete “e ese mai i mea leaga uma o le lalolagi—filifiliga, amio mama, ma paia.”2
E fesoasoani le sosaiete lenei e faamalolosia o tatou faatuatua ma tuputupu ae faaleagaga i le tuuina mai ia i tatou o avanoa faaletaitai, auaunaga, ma aoaoga. I la tatou auaunaga e faaopoopo mai ai se tulaga fou i o tatou olaga. Ua tatou agaigai i luma faaleagaga, ma ua faateleina lo tatou lagona o i tatou o nisi o le sosaiete, faasinomaga, ma le taua faaletagata lava ia. Ua tatou iloaina o le faamoemoe atoa o le fuafuaga a le talalelei o le tuuina mai lea o le avanoa tatou te ausia ai mea uma tatou te gafatia.
E fesoasoani le Aualofa e saunia i tatou mo le mauaina o faamanuiaga o le malumalu, e faamamaluina feagaiga tatou te osia, ma ia punouai i le faamoemoega o Siona. E fesoasoani foi le Aualofa i le faateleina o lo tatou faatuatua ma le amiotonu patino, faamalolosia o aiga, ma saili ma fesoasoani ia i latou e i ai tulaga manaomia.
O le galuega a le Aualofa e paia, ma o le faia o galuega paia e faatupuina ai le paia i totonu o i tatou.
Silvia H. Allred, fesoasoani muamua i le au peresitene aoao o le Aualofa.
Mai Tusitusiga Paia
Esoto 19:5; Salamo 24:3–4; 1 Tesalonia 4:7; Tito 2:3–4; Mataupu Faavae ma Feagaiga 38:24; 46:33; 82:14; 87:8; Mose 7:18
Mai lo Tatou Talafaasolopito
I lana saunoaga i Tamaitai o le Aualofa i Navu, na faamamafa atu ai e le Perofeta o Iosefa le tulaga paia, ma faamalamalama atu ai, a mama ma paia tamaitai, o le a avea i latou ma faatosinaga iloga i le lalolagi. Na ia faamalamalamaina: “O le lotomaualalo, alofa, mama—o mea nei e tatau ona faalauteleina oe. … O Lenei Sosaiete … o le a i ai le mana e taitai ai masiofo i lo latou lotolotoi. … O le a o mai i Siona ia tupu ma masiofo o le lalolagi, ma tuuina atu la latou faaaloaloga.” O tuafafine o le Aualofa e ola i a latou feagaiga latou te maua mai le faaaloalo e le gata i tamalii mamalu, ae “afai tou te ola agavaa i o mamalu faapitoa,” o le folafolaga lea a Iosefa i tuafafine, “e le mafai ona taofia agelu i le avea ai ma a outou paaga.”3
A o auai tuafafine i le galuega o le auauna atu ma faasaoina mai isi, sa faapea ona faapaiaina patino i latou. Na faamatala e Lusi Maki Samita, le tina o le Perofeta, mea lelei e mafai ona ausia e le Aualofa: “E tatau ona tatou faapelepele e le tasi le isi, tausia e le tasi le isi, faamafanafana e le tasi le isi ma maua ai aoaoga, ina ia mafai ai ona tatou nonofo faatasi uma i le lagi.”4
Ata na tusia e Christina Smith