Savali a le Au Peresitene Sili
Alofa i le AigaFautuaga mai lo Tatou Perofeta
Olaga Faaleaiga Faamanuiaina
“A oo ina tele naua mea tatou te iloa i le lalolagi ma ua mamao lo tatou o ese atu ma vaaia ai le televave ma le maoae ua i ai le lalolagi i nisi o taimi, ona faatupulaia ai lea o lo tatou lotofaafetai mo le avanoa ua avea ai i tatou o se vaega o se mea e mafai ona tatou toomaga i ai—o le aiga ma le auaiga ma le faamaoni a’ia’i o e pele ia i tatou. Ua tatou iloa le uia o le fusia faatasi i tiute, o le faaaloalo, ma le avea ma se vaega. Ua tatou aoaoina e leai lava se mea e mafai ona suitulaga atoatoa i le sootaga manuia o le olaga faaleaiga.”1
Fetufaai Atu Lo Tatou Alofa
“Faamalo atu i si au tama ma fusi atu ia te ia: fai i ai, ‘E sili atu lo’u alofa ia te oe; ia faaalia e le aunoa lou agaga faafetai. Aua nei sili atu le taua o se faafitauli e foia nai lo se tagata ina ia alofaina. E siitia ese atu ia uo, e tuputupu ae tamaiti, e maliliu e pele. E matuai faigofie lava le le amanaiaina o isi, seiloga ua oo i le aso latou te o ese atu ai ma o tatou olaga ma tuua i tatou ma ni lagona o le ‘pe ana faapea’ ma le ‘maimau pe ana.’ …
“Ia tatou fiafia i le olaga ao tatou ola ai, saili le olioli i le faigamalaga ma fetufaai atu lo tatou alofa i uo ma aiga. O le a oo mai se aso, o le a le toe i ai ni taeao mo i tatou uma. Aua nei o tatou toloina mea e sili ona taua.”2
Faaali Atu Lo Tatou Alofa
“Uso e, ia tatou taulimaina ma le mamalu ma le faaaloalo o tatou taitoalua. O i latou o a tatou soa e faavavau. Tuafafine, faamamalu i a outou tane. Latou te manaomia le faalogo mai i se upu lelei. Latou te manaomia se ataata faaleuō. Latou te manaomia se faailoa atu tausaafia o le alofa moni. …
“Ia te outou na o matua, ou te fai atu, ia faaali atu lo outou alolofa i a outou fanau. Ua outou iloa tou te alolofa ia i latou, ae ia faamautinoa ua latou iloaina foi. E taua tele i latou. Tuu atu ina ia latou iloa. Valaau atu i le Tama Faalelagi mo se fesoasoani, a o outou taulimaina mea latou te manaomia i aso taitasi, ma a o outou feagai ma luitau ia e oo mai ma le le mafuafuaina ma tulaga faamatua. Tou te manaomia isi mea e sili atu nai lo lou lava atamai e faafaileleina ai i latou.”3
Faailoa Atu Lo Tatou Alofa
“Ia te outou o matua, ta’u atu lo outou alolofa ia outou fanau. Tatalo mo i latou, ina ia mafai ai ona latou tetee atu i mea leaga o le lalolagi. Tatalo ina ia latou ola i le faatuatua ma molimau. Tatalo ina ia latou tulimataia ni olaga o le lelei ma le auauna atu i isi.
“Le fanau e, ia faailoa atu i o outou matua tou te alolofa ia te i latou. Faailoa atu ia i latou le tele o lo outou agaga faafetai i mea uma ua latou faia mo outou ma o loo latou faia pea mo outou.”4
O Le a le Mea e Aupito Sili Ona Taua
“O le mea e auptio sili ona taua, e toetoe o taimi uma e aofia ai tagata o loo siomia i tatou. E tele taimi tatou te faapea ai ua tatau ona latou iloa le tele o lo tatou alolofa ia i latou. Peitai ia aua lava nei o tatou manatu faapea lava; e ao ona tatou ta’u atu i ai ia latou iloa. Na tusia e Viliamu Siekisipia, ‘Latou te le alolofa pe a le faaalia mai lo latou alofa.’ O le a tatou le faanoanoa lava i upu agalelei e tautalagia po o le agaalofa foi e faaalia. Ae, o le a oo mai lo tatou faanoanoa pe afai e aveesea na mea mai a tatou fegalegaleaiga ma i latou e sili ona tatou alolofa i ai.”5
O Le Aumaia Faalatalata o le Lagi
“Ia faatumulia o tatou auaiga ma aiga i le alofa: alofa o le tasi i le isi, alofa i le talalelei, alofa i o tatou uso a tagata, ma le alofa i lo tatou Faaola. O se taunuuga la, o le a latalata atili mai ai iinei le lagi i le lalolagi.
“Ia avea o tatou aiga o ni maluapapa e toe fia foi mai i ai tagata o o tatou aiga.”6
O Se Tatalo mo Aiga
“O le tele o le osofaia e le lalolagi i nei ona po o le iunite o le aiga, ma le ulagia o le tele o mea ua leva ona taulimaina ma le paia, matou te ole atu ai ia te Oe, lo matou Tama, ina ia faatutusa i matou ma luitau o loo matou fetaiai, ina ia mafai ona matou tutu malosi mo le upumoni ma le amiotonu. Ia avea o tatou aiga ma sulufaiga o le filemu, o le alofa ma le faaleagaga.”7
Ata na saunia e John Luke