O Se Pese ma se Tatalo
Ina ua le mafai e Dillon ona usu le nota maualuga, na ia aapa maualuga atu mo le fesoasoani na ia manaomia.
E i ai se faafitauli faigata a Dillon: o lana taleni sili o lona popolega sili foi lea. “Ou te fiafia e pese,” o le tala lea a le alii Toga e 16 tausaga, “ae le o luma o tagata. Ou te matuai fefe lava.”
Manatu i ona lagona le mautonu ina ua faasalalau e le Ekalesia i Toga ni faataitaiga e saili ai ni tagata e usuina i le gagana Toga ia pese o le lipine seminare o le Feagaiga Tuai. Sa fiafia ae sa fefe foi o ia.
E tolu pese o le lipine e manaomia ai se alii e usuina. Ina ua uma ona usu e Dillon le pese na ia faataitai ai, na te’i o ia i le fai atu o le taitai e pueina pese e toe usu se isi pese mai le lipine. E ui i lona popole sa i ai, ae sa ia usuina lava, ma na faapea atu le taitai, “Ua maua le tatou tama.”
E ui i le tele o lona fiafia—ma lona popole—ae na ofo atu ia Dillon le avanoa e pueina ai pese uma e tolu.
Taleni a Dillon, Popolega o Dillon
O Dillon, o se tasi o le Uarota a Ma‘ufanga, o le Siteki a Nuku‘alofa Toga, e lelei i le aoga. O ia o se tasi pe a ma le 10 pasene o tamaiti aoga Toga na filifilia e auai i le aoga a le malo. E fiafia foi o ia i le seminare. “Na te fafagu po i matou ina ia mafai ona alu i le seminare,” o le tala lea a lona tina o, Malenita Mahe.
Peitai o le pese o le mea lea e fiafia tele i ai—e ui e le’i iloa e lona aiga e lelei lana pese pe ana le fai atu ia te ia e pese toatasi i se polokalama a le Peraimeri i se tasi tausaga.
“O Dillon e matamuli lava,” o le tala lea a lona tina.
Na matuai lelei lava lana pese i le polokalama a le Peraimeri o lea na talosagaina ai o ia e pese i le konafesi a le Siteki a Nuku’alofa Toga. Ina ua mavae lena sa avea loa le pese ma ana vaisu.
Sa ia fai atu i lona tina, “E i ai se aso, ou te faaaogaina ai la’u taleni mo le Atua.” Ina ua filifilia o ia e pese i le lipine, sa fai atu o ia i lona tina, “Tina, na ou faaaogaina la’u taleni.”
Fai mai le uso matua o Dillon, o Sione, e na te taumafai lava e faamalosiau atu ia Dillon e pese. “Ou te matuai fia maua lava lana taleni,” o lana tala lea. “E mananao tagata uma ia ona faasoaina atu.”
“Ou te fiafia pe a pese o ia,” o le tala lea a lona tuafafine o Pea.
“Ou te fia pese pei o ia i se aso,” o le tala lea a lona uso e iva tausaga o Paula.
E faafetai Dillon i le lagolagosua a lona aiga. “Ou te alofa i lo’u aiga,” o lana tala lea. “Ou te mautinoa, o la latou fesoasoani, e mafai ai ona avea ou vaivaiga ma se malosiaga.
Pese Maualuga Atu
Ao galulue Dillon ma le aufaigaluega e pueina ia pese, sa tauivi o ia i se nota se tasi. “Sa le au i ai lo’u leo,” o lana tala lea. Sa matou faataitaia mo le tele o itula.”
Mulimuli ane, i le lē lavā ma le faavaivai, sa alu ai o ia i le fale i lena po, ma le iloaina e tatau ona ia pueina le pese i le taeao e sosoo ai.
“Sa ou alu sa’o lava i lo’u potu ma tatalo i lo’u Tama Faalelagi e fesoasoani mai ia te a’u,” o lana tala lea.
Pau lava le mea sa mafaufau i ai o ia, o le taua tele o le lipine i le pe a ma le 50,000 o tagata o le Ekalesia i Toga, faapea foi ma le faitau afe o isi o e tautatala i le gagana Toga i le lalolagi atoa.
“Sa avea ma se tasi o po sili ona umi i lo’u olaga,” o lana tala lea.
Ina ua mavae se po umi lava o le tatalo ma sina moe itiiti, sa savali atu Dillon i totonu o le potu e pue ai pese ma na au lona usuina o le nota.
“Aleluia,” na ia manatua o lana tala lea na fai. “Sa ou fiafia.”
Aua Le Fefe
O se tasi o mau e sili ona fiafia i ai Dillon o le Iosua 1:9: “Ia e faamalosi, ma loto tele; aua e te fefe, aua e te mata’u; aua o Ieova lou Atua o loo ia te oe i mea uma e te alu i ai.”
Sa tofotofo e Dillon lena folafolaga, ma na ia iloa ai e moni. “Sa ou taumafai i le mea sili na ou mafaia. Sa tuu i ai la’u taumafaiga sili ona lelei ma lo’u loto i pese, ina ia mafai ona lagona e tagata faalogologo le Agaga.”
Ao aluese mai Dillon mai lona fefe ma agai atu i ana taleni, sa ia iloaina sa ia mauaina le tele o fesoasoaniga—e le gata mai i lona aiga ae faapea foi mai lona Tama Faalelagi.
“Ou te iloa,” o lana tala lea, “sa taliina e le Atua a’u tatalo.”
Ata na pueina e Adam C. Olson; tua atu © PhotoSpin