Manatu mo Afiafi Faaleaiga
O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nai faataitaiga nei.
“Toatasi le Paionia Malosi, Toatele Augatupulaga ua Faamanuiaina,” itulau 16: A e faasoaina atu lenei tusiga i lou aiga, mafaufau e talanoaina le auala na faatosinaina ai e faataitaiga a Sara lona tama. Talanoaina pe mafai faapefea e au faataitaiga ona faatosinaina i latou o loo siomia oe mo le lelei po o le leaga. Faatu se sini ina ia avea ma se “paionia lototoa” i aso uma.
“Pe Na Fesili Moni Mai o Ia ia te A’u i Lena Mea?”, itulau 42: A o iloiloina le tusiga, faailoa ma faatusatusa ia popolega na lagona e tagata o le Ekalesia e tusa ma o latou valaauga. Faitau le upusii a Peresitene Monson ona talanoaina lea o ni auala e valaaulia ai le fesoasoani a le Tama Faalelagi i le faataunuuina o ou tiutetauave. Mafaufau e iloilo ia punaoa ua lisi atu i le “Mauaina o le Fesoasoani mai Isi Punaoa.”
“O Le Ekalesia Moni ma le Ola e Tasi,” itulau 48: Mafaufau e lisi i lalo ia vaega e tolu na ta’ua e Elder Oaks ua avea ai le Ekalesia a Iesu Keriso o le Au Paia o Aso e Gata Ai ma Ekalesia moni e tasi ma le ola i le lalolagi. Talanoaina vaega taitasi ma pe faapefea ona faamanuiaina ai lou aiga. E mafai ona e mafaufau e faia ni matafaioi i le auala e mafai ai e lou aiga ona molimau atu i nei vaega ia i latou o isi faatuatuaga.
“Ataāta,” itulau 60: Pe a maea ona faitauina faatasi le tusiga, tuu atu i tagata taitasi o le aiga e tilotilo i se faaata ma ta’u mai pe o le a se mea o ia vaaia. Fesoasoani i tagata taitoatasi ia iloaina o loo ia vaavaai atu i se atalii po o se afafine o le Tama Faalelagi. Atonu e te manao e talanoaina ma tuu atu lau molimau i le tele o Lona alofa ia i tatou taitoatasi ma le taua o le faalagolago atu ia te Ia. E mafai ona e mafaufau e faitau faatasi le Salamo 56:4 ma le 1 Korinito 2:9.
O Se Lesona o le Molimau
Ina ua ma faatoa faaipoipo ma lo’u toalua, sa ou popole faapea o se afiafi faaleaiga mo na o le toalua o i maua o le a faigata pe o le a avea o se mea e tau ina faataunuu. Sa ou manatu o le a uma ni mea e aoao atu e le tasi i le isi. Ae na faateia au e lo’u toalua i le ma po o le Aso Gafua muamua ina ua ia fai mai, “Ou te fia molimau atu.” Na ia faaauau i le faasoaina mai o lana molimau i le Faaola ma le faaipoipoga. Ina ua maea lana molimau, sa ou faasoa atu foi lau ia molimau. O se afiafi o le a ou faapelepele pea i ai. E ui lava na te lei iloaina lo’u popolega sa i ai e uiga i afiafi faaleaiga, ae sa ia taliina, ma ou iloa ai o afiafi faaleaiga taitasi uma o se aafiaga faaleagaga e tulimatai atu i ai.
Talu mai lena taimi ua avea pea le fefaasoaai o molimau o se tu masani i a matou afiafi faaleaiga. E ui lava ua i ai se ma pepe ma, ma te fetuunaia lesona mo ia, ae ma te le mafai lava ona misi le tuuina atu o ma molimau. Ou te fiafia mo le aso o le a mafai ai ona ou faalogo atu i molimau a la’u fanau ma le taimi o le a mafai ai ona ou aoaoina i latou i le mafuaaga e taua ai molimau.
Heidi Icleanu, Kentucky, ISA