Valaauina e Uunaia

Georgina Tilialo, Niu Sila

Ina ua valaauina a’u e galue o se faufautua o le Maea Meite i le faalapotopotoga a Tamaitai Talavou, sa ou le talitonu e mafai ona ou faataunuuina le valaauga. Ou te le’i manatu o le a fiafia ia tamaitai ia te a’u pe latou te aoaoina se mea mai ia te a’u, aemaise lava ina ua iloa le eseese o tulaga o i ai nei i latou nai lo taimi ao ou matua e pei o i latou.

Na suia lena lagona i ni nai vaiaso talu ona ou i ai i lo’u valaauga, ina ua ou auai atu i se gaoioiga a Tamaitai Talavou. I le gaoioiga sa faailoa atu ai e se tina lona agaga faafetai mo le polokalama a Tamaitai Talavou aua ua faamalosia ai lana tama teine e tetee atu i faaosoosoga. Na fesoasoani ia te au ana upu e iloa ai le taua tele o la’u matafaioi.

Sa ou iloaina o lo’u valaauga sa sili atu nai lo le aoaoina o lesona i Aso Sa ma le fesoasoani atu e fuafua ni gaoioiga. O se valaauga e fesoasoani ai i nei tamaitai talavou ina ia saunia mo le lumanai—e o i le malumalu, auauna atu i le Ekalesia, ma ia avea ma ni tina lelei. Sa manaomia ona ou fesoasoani e saunia i latou mo le olaga.

O valaauga i le Ekalesia e sau mai lo latou Tama Faalelagi alofa. Na te silafia o tatou manaoga ma manaoga o i latou o loo tatou auauna atu i ai. O le iloaina o lena mea e mafai ona fesoasoani ia i tatou ia maua le faatuatua ia te Ia ma talitonu ia i tatou lava, e tusa lava pe tatou te le malamalama pe aisea ua tuuina mai ai se tofiga faapitoa pe tatou te le lagonaina le faamautinoaga e uiga i lo tatou gafatia e faataunuu ai se valaauga. E mafai ona tatou faafetai mo o tatou avanoa e galulue ai ma ua tatou agavaa e maua se valaauga, ma e mafai ona tatou maua le avanoa e aoao atili ai mea tatou te mafaia ao tatou agai i luma i le talalelei.