Avea ma ni Paionia o Ona Po Nei
Na aoao mai i tatou e taitai o le Ekalesia e uiga i le taua o sao o loo tatou faia i le taimi nei.
O I Tatou Uma o Paionia
“E leai ni o’u tuaa i paionia o le seneturi lona sefuluiva. Ae peitai, mai lava i le taimi muamua na ou auai ai i le Ekalesia, ou te lagona lava lou latalata atu i na paionia anamua o e na sopoia laufanua valevalenoa. O i latou o ou tuaa faleagaga, e pei foi ona avea ai i latou ma tuaa faaleagaga o tagata taitoatasi uma o le Ekalesia, po o le a lava le atunuu, gagana, po o le aganuu. …
“E pei ona taliaina nei e le lalolagi atoa le savali o le talalelei toefuataiina a Iesu Keriso, o i tatou uma o paionia i o tatou lava eria ma tulaga.”
Peresitene Dieter F. Uchtdorf, Fesoasoani Lua i le Au Peresitene Sili, “Faalogo i Siufofoga o Perofeta,” Liahona, Iulai 2008, 3.
Ua Faamanuiaina Tagata Uma e le Uluai Augatupulaga
“Ona o oe o le tagata muamua o lou aiga ua taliaina le talalelei, o lea ua avea ai oe ma augatupulaga muamua, o se tupulaga filifilia e faamanuiaina ai augatupulaga ua mavae, o le taimi nei, ma le lumanai. …
“… I totonu o le Ekalesia, tatou te faitau ma talanoa soo e uiga i paionia i le uluai talafaasolopito o le Ekalesia. O i latou o tagata o augatupulaga muamua e faapei foi o outou. …
“O lo latou talatuu, e mafai foi ona avea ma a outou talatuu, o ni uso o le augatupulaga muamua. Ia faamaoni, tautuaina ou uso a tagata, faamanuia o outou aiga, ma faia faaiuga tonu. O oe o le augatupulaga muamua, o se augatupulaga filifilia e faamanuiaina ai augatupulaga ua mavae atu, ma le lumanai.”
Elder Paul B. Pieper o le Fitugafulu, “O Le Augatupulaga Muamua,” Liahona, Nov. 2006, 11, 13.
E Manaomia i Tatou Uma
E manaomia i tatou uma e faamaea le galuega na amataina e na Au Paia paionia i le silia ma le 175 tausaga ua mavae ma faaauauina mai i tausaga na sosoo ai e Au Paia faamaoni o augatupulaga uma lava. E tatau ona tatou talitonu e pei ona sa latou talitonu ai. E tatau ona tatou auauna atu e pei ona sa latou auauna ai. Ma e tatau ona tatou manumalo e pei ona sa latou manumalo ai. …
“… E le fetalai mai le Alii ina ia uta sa tatou taavaletoso; ua Ia fetalai mai ia i tatou ia malolosi o tatou faatuatua. E le fetalai mai o Ia ia tatou sopoia se konetineta; o loo Ia fetalai mai tatou te sopo atu i le isi ituala e asiasi atu i o tatou tuaoi. E le o fetalai mai o Ia e tuu atu uma a tatou mea o le olaga nei e fausia ai se malumalu; o loo Ia fetalai mai e tuu atu a tatou mea uma ma o tatou taimi e ui lava i faatosinaga o le olaga i le taimi nei, e faaauau ai ona fausia malumalu ma ia auai atu e le aunoa i malumalu ua uma ona fausia. E le o fetalai mai o Ia ia tatou oti faamaturo; o loo fetalai mai o Ia ia tatou ola i se olaga o se soo.
“O se taimi sili lenei e ola ai, uso e ma tuafafine, o i tatou lava e faaauauina le agaifanua matagofie o le tautino faamaoni lea na avea ma uiga mataina o augatupulaga ua mavae o le Au Paia o Aso e Gata Ai.”
Elder M. Russell Ballard o le Korama a Aposetolo e Toasefululua, “O Le a Agai i Luma le Upu Moni a le Atua,” Liahona, Nov. 2008, 83, 84.
Ata na tusia e Craig Dimond