Aumaia o le Peraimeri i le Fale
O Lo’u Tino o Se Malumalu o le Atua
E mafai ona e faaaogaina le lesona ma le gaoioiga lenei e aoao atili ai e uiga i le autu o le Peraimeri i le masina lenei.
“Tou te le iloa ea o le malumalu outou o le Atua, o loo nofo foi le Agaga o le Atua i totonu ia te outou? … E paia le malumalu o le Atua, o outou lava ia” (1 Korinito 3:16–17).
Moeiini ou mata ma mafaufau i se malumalu. O le a lona lanu? E i ai ni ona faamalama? E i ai ni ona tumutumu? E fia?
E eseese uma lava ia malumalu o Le Ekalesia a Iesu Keriso o le Au Paia o Aso e Gata Ai. O le Malumalu o Sate Leki i Iuta e lanu efuefu ona puipui ma e 6 ona tumutumu. E ese mai le Malumalu o Cardston Alberta i Kanata, lea e fai i maa ona puipui ae leai ni tumutumu. E ui lava e foliga eseese ia malumalu taitasi, ae matagofie uma lava ma ua fausia mo le faamoemoega lava e tasi. O ni nofoaga e faataunuu ai sauniga faapitoa e manaomia mo i tatou ina ia toe foi atu ai i le Tama Faalelagi.
E pei foi oe o se malumalu. E ese oe mai isi tagata uma, ae o oe foi o se fale mo le Agaga o le Atua—le Agaga Paia. Na fai mai le Aposetolo o Paulo: “Tou te le iloa ea o le malumalu outou o le Atua, o loo nofo foi le Agaga o le Atua i totonu ia te outou? … E paia le malumalu o le Atua, o outou lava ia” (1 Korinito 3:17). O lou tino o se malumalu mo lou agaga.
E pei lava foi ona e faaaloalo i malumalu, e tatau ona e faaaloalo i lou tino. E mafai ona e faia lenei mea e ala i le usiusitai i le Upu o le Poto (tagai i le MFF 89), e ala i le faia o lavalava talafeagai, ma le tausiaina ia mama o lou tino. E tatau foi ona e tausia ia mama lou loto ma lou mafaufau i le faitauina, faalogologo, ma matamata i na o “mea e fiafia i ai le Tama Faalelagi” (tagai i le O O’u Tulaga Faatonuina o le Talalelei).
Pe a mama lou mafaufau ma lou tino, o le a mafai ona e maua ni faamanuiaga sili.
Gaoioiga
Saili lou auala i le paso. Pe a e oo i se faailo, filifili le auala Ioe po o le Leai e fuafua lava po o fea o ia auala o le a fesoasoani ia te oe e tausia ai lou tino e pei o se malumalu o le Atua. O le filifilia o auala sa’o o le a oo atu ai i le malumalu.
Tusi ni ata o nisi mea se fa e lelei mo oe. Oti ma tuu au ata i luga o ata o filifiliga lelei o loo i le paso.
Fualaau Aina ma Fualaau Fai Sua
Alakaholo ma le Tapaa
Falaoa ma Sana
Suesue i Tusitusiga Paia
Televise Le Talafeagai
Lavalava Talafeagai
Ata na tusia e Scott Greer