O Le Mea Tatou Te Talitonu I Ai

Na Auina mai i Tatou e le Atua i le Lalolagi o se Tagata o seAiga

E i ai se fuafuaga a lo tatou Tama oi le Lagi mo i tatou, ma o le auina mai o i tatou i le lalolagi e avea o ni tagata o se aiga o le vaega lea o lena fuafuaga. O Atamu ma Eva o le uluai aiga lea i le lalolagi; na tuufaatasia i laua e lo tatou Tama Faalelagi i le faaipoipoga ma faatonuina i laua ina ia fanafanau (tagai i le Kenese 1:28). E finagalo le Atua ina ia maua e Lana fanau agaga se tino faaletino. A aumai e matua ia fanau i lenei lalolagi, ua latou fesoasoani i lo tatou Tama Faalelagi e faataunuu Lana fuafuaga o le faaolataga. Latou te talia lelei i o latou aiga fanau taitasi faatoa fananau mai o se atalii/afafine o le Atua.

Sa silafia e lo tatou Tama Faalelagi o le avea ma se tagata o se aiga o le a tuuina mai ai ia i tatou taitoatasi le avanoa sili e alofaina ai ma tausiaina ai ao i ai i le lalolagi. E galulue faatasi ia aiga e aoao le ola pulea o le tagata lava ia, ositaulaga, tuuto, ma le taua o le galue. Latou te taumafai foi e aoao le alofa, fefaasoaai, ma ia auauna le tasi i le isi (tagai i le Mosaea 4:14–15). E aoao fanau e faailoa atu le alofa mo o latou matua, ia usiusitai, ma ia taumafai e ola i le ituaiga olaga o le a aumai ai le mamalu i le faaiu o lo latou aiga.

Ao tuuina atu e tagata o le aiga se faamalosiauga ma le faamalo o le tasi i le isi, e tuputupu ae ia lagona o le mautinoa ma le alofa. E faaalia e aiga faamanuiaina le faamoemoe ma le naunautaiga e lagolagosua i tagata taitasi o le aiga i manaoga faaletagata ma le fesoasoani atu o le tasi i le isi e aoao ma galulue faatasi i le alofa. O la latou sini o le avea lea ma se iunite faaleaiga fiafia ma le faavavau.

O nisi nei o gaoioiga o le a fesoasoani ia i tatou ina ia maua ai ni aiga fiafia ma le faamanuiaina:

• Ia tatalo faatasi o le tane ma le ava.

  Ia faia tatalo faaleaiga i taeao ma afiafi uma (tagai i le 3 Nifae 18:21).

  Ia aoao i fanau le talalelei i vaiaso taitasi i afiafi faaleaiga.

  Suesue i tusitusiga paia i aso uma o se aiga.

  Ia auai i sauniga Lotu i Aso Sa taitasi (tagai i le MFF 59:9–10).

  Aoao ia agalelei, onosai, ma ia alofa moni (tagai i le Moronae 7:45–48).

  Ia faifai mea faatasi o se aiga, e pei o le aai faatasi, galulue faatasi, o i tafaoga, ma le faia o tonu faaleaiga.

Mo nisi faamatalaga, tagai i le Mataupu Faavae o le Talalelei (2009), 227–32; ma le M. Russell Ballard, “O Le Mea e Sili Ona Taua E Sili Atu Foi Ona Umi,” Liahona, Nov. 2005, 41–44.

“O le faaipoipoga i le va o le alii ma le tamaitai, ua faauuina e le Atua.… O le aiga o le totonugalemu lea o le fuafuaga a Le Foafoa, mo le taunuuga e faavavau o Lana fanau” (“O Le Aiga: O se Folafolaga i le Lalolagi,” Liahona, Nov. 2010, 129).

Ata na tusia e David Stoker, Craig Dimond, John Luke, Matthew Reier, Robert Casey, ma Frank Helmrich