Motu o le Afi ma le Faatuatua: O Galápagos
E tele atu isi mea e uiga i Atumotu o Galápagos nai lo maa mai le lava, manulele laiti, laumei, ma mataaga. O se taulaiga o le faatuatua, lea e avea ai le lotogatasi maoae ma le tautinoga maumaututu ma ni taunuuga o le auauna atu ma le ositaulaga.
O loo aliali ae i tua atu o malae maa uliuli o le lava se alā tele, o se mea e tatalia le pisi malulu ma le oona o le suasami. Pe a vaai latalata atu la i ai, e iloa ai e se tagata ia pito maamaai o ulu ia o le tele o ikuana vai, o loo faapupuu faatasi e pei o ni tarako e faatalitalia le vevela malosi o le la i le taeao. O nisi o ikuana fou e faatalitali ai taitoatasi i i ma o, i talaane o le pito maa, ma o latou lima maamaai e pei ni naifi e toeitiiti lava pei o le uumi o tamatamailima o se tamaitai, o loo pipiimau i le maa.
Ae o le tele lava e faapotopoto i ni vaega mo le mafanafana ma le saogalemu, e vave ona lagolagoina e o latou tino malolosi le tasi ma le isi e tetee atu i le malulu ma le pogisa, ma fesoasoani le tasi i le isi i o latou manaoga masani. O i, i Galápagos, o motu na fanau mai le afi, e maua ai e le olaga se uiga taua. O se laueleele e tuufaatasi ai le faasaenisi ma le faatuatua, ma oo ai ina tatou malamalama o i tatou uma lava o se vaega o tagata masani. Ma o i, e malamalama tagata o le Ekalesia, e pei lava o nei ikuana e ola i vai, o le a maua le malosi i le pipiimau i a latou feagaiga ao latou fausia se ala tuufaatasi e agai atu ai i le Alii i le faatuatua, auauna atu, ma le ositaulaga.
O Le Auala e Amata ai le Faapotopotoina
I le taeao po o se tasi aso, a o asiasi atu i Quito, Ekuatoa, sa alu ai se savaliga i le Aso Sa a André Degel, o se taitai malaga ma se tasi e suesue i le siosiomaga, i talaane o se falelotu o le Au Paia o Aso e Gata Ai. O le 1997 le tausaga, ma e ui o ia o se tagata o le Ekalesia, ae sa le’i toaga mo le tele o tausaga ina ua siitia atu i Atumotu o Galápagos. Sa manatua e André le lagona mafanafana i le auai i le lotu ma e tele lava ina faataga savalivali i talaane o se falelotu ao i ai o ia i Ekuatoa. Sa le masani ona alu i totonu. Na o lona fia faalatalata atu i le fale. “E lelei ai ou lagona,” o lana tala lea, “e pei o loo ou i ai i le aiga.”
O le aso lea faatoa amata lava le sauniga faamanatuga. Ina ua mavae sina taimi na le mautonu ai, na filifili loa André e alu i totonu. O se faaiuga o le a iu ina suia ai le taunuuga o le faitau selau o olaga.
Ina ua uma le sauniga na faafeiloai e faifeautalai ma tagata o le uarota ia André. Na te manatuaina ma le alofa le talanoaga, aemaise lava i lo latou maofa—ma le fiafia—ina ua latou iloaina o ia e sau mai Galápagos.
I lena taimi, sa le’i lelei le faatulagaina o le Ekalesia i le motu. O le mea moni lava, e le’i iloa e taitai perisitua i Ekuatoa na i ai ni tagata o le ekalesia o nonofo ai iina.
Sa le’i faamaumauina e faifeautalai se taimi. Sa latou faailoa atu André i le peresitene o le Misiona a Quito Ekuatoa ma faamautinoa ua ia i latou faamatalaga e faafesootai ai André.
E lei leva ae toe foi André i le fale i Puerto Ayora, o le aai sili ona telē i Galápagos, i le motu o Santa Cruz. E le’i leva ae auina atu e le misiona ni pusa se lua o punaoa a le Ekalesia, e aofia ai ni tusi lesona e suesue ai. Ae atonu o le mea sili ona taua, na maua e le peresitene o le misiona se lisi o tagata o le ekalesia o loo nonofo ai i le atumotu, ma e mafai ona faaaoga e André e fesoasoani e faapotopoto faatasi ai le Au Paia. O se iloiloga faatopetope o le lisi na ofo ai André.
“Na i ai i le lisi ni tagata sa ou iloaina, ae ou te le’i iloa o i latou o ni tagata o le Ekalesia,” o lana tala lea.
I le taimi lava lea e tasi, na ootia loto o nisi o tagata o le ekalesia i Santa Cruz i le faatuina o le Ekalesia iina. Sa siitia uma i latou i le Atumotu o Galápagos e saili ni galuega. Ae o le taimi nei ua latou sailia ai le tasi ma le isi.
O Le Valaau ina ia Faapotopotoina
Mo Mariana Becerra, sa faigata le olaga ao le’i faavaeina le Ekalesia iina. Sa faatoa lua tausaga talu ona avea o ia ma se tagata o le Ekalesia i le taimi na sau ai o ia i le motu i le 1990.
“E le’i i ai se Ekalesia i le taimi na ou sau ai,” fai mai ai Mariana. “Sa na o i maua ma la’u tama tama. Sa fai a ma afiafi faaleaiga ma taumafai e ola i le talalelei. Peitai sa i ai ni nai tagata o le ekalesia sa ou iloa e le’i ola ai i tulaga faatonuina o le talalelei.”
Na faapena foi se aafiaga na oo ia David ma Jeanneth Palacios. Na liliu mai David i le Ekalesia ao talavou, ae na papatiso Jeanneth i le 1993, e na o le tasi le tausaga ae siitia atu loa le ulugalii i Galápagos.
“Ina ua ma siitia mai iinei, ma te le’i iloa nisi tagata o le ekalesia. Sa ou faapea sa na o i maua lava. Sa matuai faigata lava le ola ai e aunoa ma le Ekalesia,” o le tala lea a Jeanneth.
“Ona oo lea i se tasi aso i le 1997 sa sau André i le mea na ou faigaluega ai ma faapea mai, ‘O loo ou sailia ia Jeanneth de Palacios. O oe o se tagata o Le Ekalesia a Iesu Keriso o le Au Paia o Aso e Gata Ai, le Ekalesia Mamona?’
“Sa ou lagonaina le pei na faaloaloa mai e le Alii ia Lona aao ma faapotopotoina Ana mamoe,” o le tomanatu lea o Jeanneth. “Ma na ou fai atu, ‘Ioe, ioe!’ Sa ou lagona lea ituaiga fiafia aua sa le na o i maua sa i ai. E toatele atu i matou!”
Na faaopoopo mai Mariana “Sa matuai manaia lava le faalogoga ina ua faapotopoto i matou e André. Sa ia i matou se mea maoae—o se mea e sili atu nai lo le faauoga—o le avea ai ma tagata o le Ekalesia.”
O Le Lotogatasi i Totonu
O le taimi lava na faapotopoto ai e André se vaega autu, na amata loa ona latou feiloai soo. I le taimi muamua lava, e na o le toafa aiga ma ni uo.
“Matou te feiloai i le tele o taimi, o nisi taimi o aso uma, ae tele lava i lo’u fale, o le tala lea a André. “Sa matou suesue i tusi ia na auina mai e le misiona ia i matou faapea foi ma le Tusi Paia ma le Tusi a Mamona.”
“Sa avea ma se taimi matagofie,” o le fai mai lea a Araceli Duran. “Sa matou matuai lotogatasi. Matou te potopoto i vaiaso taitasi e suesue.”
“O se mea o le a le galo lava ia te a’u,” o le tala mai lea a Jeanneth, “ona sa matuai i ai lava le lotogatasi, o se lagona e alofa lo tatou Tama Faalelagi ia i matou ma sa silafia o le taimi lenei e manaomia ai ona matou potopoto faatasi.”
Sa faalagolago le tasi i le isi, ma aoao e le tasi le isi, ma fausia faatasi o latou faatuatua. E le’i leva ae faamanuiaina loa a latou taumafaiga, ma faatulagaina ai se paranesi aloaia i le amataga o le 1998.
Na tuputupu ae le paranesi i le aluga o taimi, ma na manaomia e tagata o le ekalesia se nofoaga tele atu. Sa latou totogiina se tamai fale ma siitia atu ai i se fale e tele atu lea sa avea muamua o se faletalimalo. O le fale lapoa lea sa tuputupu ae ai le auai i le toeitiiti 100 tagata o le ekalesia. E ui o le tuputupu ae o le paranesi na mafua i ni taumafaiga toe faatoagaina mai ma tagata na siitia mai, ae o le tele lava o le malosi na mafua ona o tagata na liliu mai.
O Oswaldo Villón ma lona faletua o, Rosario, o ni faataitaiga ia. Na papatiso ia Rosario i le 2000 ma galue ai o se peresitene o le Aualofa, peresitene o le Peraimeri, ma le peresitene o Tamaitai Talavou. Na papatiso Oswaldo, i le tausaga mulimuli ane, galue o se peresitene o le korama a toeaina. Na aumai e le Ekalesia se suiga atoa o le olaga, mo i laua uma.
“Na faasaoina a’u e le Ekalesia,” o le faamatalaga lea a Oswaldo. “Muamua, sa ou ola i le lalolagi. Ou te le inu ava malosi, ae sa ou inu e pei o se tagata inu ava. Ina ua ou auai i le Ekalesia, sa avea nei tagata e 25 ma o’u aiga. Sa lotogatasi i matou. Ma sa matou galulue malosi e fesoasoani e faatupulaia le paranesi.”
E ala i taumafaiga lē faavaivai a tagata o le ekalesia i Galápagos, na tele ai ina oo le auai o sauniga faamanatuga i le va o le 100 ma le 120 tagata. Ia Setema 2009 na tauia ai i latou i le faapaiaga o se falelotu.
O Le Mana o Auaunaga
O nisi o tagata o le paranesi ma o latou aiga e nonofo i mauga lanuvao o Santa Cruz. O i lea na fuafua e le taitai o le paranesi e faia ai se galuega fesoasoani i le aso 4 o Setema, 2010.
“I le avea ai o se korama a toeaina, matou te taumafai i masina taitasi e faatulaga se tasi po o le lua o mingas,” po o ni galuega fesoasoani, o le tala lea a Oswaldo. “Matou te faia mo le tagata o loo sili ona manaomia le auaunaga. O le taimi la lenei o le a matou fausia se fale mo se tuafafine.”
O le mea moni lava, o le afa o le fale. O le vaiaso pe a na muamua atu, na fausia ai e tagata o le ekalesia le afa muamua. O le aso la lenei e silia ma le 20 o i latou na faaalu le ono itula pe sili atu foi i le fausiaina o le isi afa, e aofia ai se umukuka, se mea e tali ai le vai, ma se auala savali e siomia ai le fale. O lenei fale faatauvaa ua maua ai se nofoaga e nonofo ai Elena Cedeño ma lana fanau, o e sa le auai i le Ekalesia i lena taimi. Na matua faafetai i latou uma i le taimi ma le taumafaiga na tuuina atu e tagata o le ekalesia. (Na papatiso Sister Cedeño ma lana tama tama o Sebastián ia Ianuari 2011.)
“E leai lava se isi mea e sili atu nai lo le auauna atu i tagata e manaomia le fesoasoani,” o le tala lea a Oswaldo. Ma o le vaaiga i ona fofoga, faapea foi ma isi tagata o le paranesi ma le tuafafine lea na latou auauna atu i ai, o loo molimau mai i le lotogatasi na aumaia e nei ituaiga auaunaga.
O Mea e Sili ona Taua
O le auaunaga ma le felagolagoma’i o tagata o le ekalesia i Atumotu o Galápagos lea na foafoaina ai lea ituaiga lotogatasi, na taitai atu ai i le tele o faamanuiaga i le 2007. Na faafeao atu e David ma Jeanneth Palacios i lena tausaga ni aiga se toalima o le paranesi, na toeitiiti atoa le 25 o tagata, i le Malumalu o Guayaquil Ekuatoa.
“O le vaai atu i na aiga ua faamauina, sa ou lagona ai le pei ua aveina atu i matou i le lagi,” o le tala lea a Jeanneth. “Sa matou matuai lagonaina le faatasi mai o le Alii. O loo matua malolosi uma na aiga e toalima i le taimi nei.”
O le asiasiga lenei i le malumalu, sa faamau ai le peresitene o le paranesi o Daniel Calapucha ma lona faletua o Angela, sa faapea foi ona faamauina le la fanau e toatolu ia i laua. “E matua suia lava oe e le malumalu,” o le tala lea a Peresitene Calapucha. “E moni, o le fale o le Alii. O le faatasia o se aiga i le talalelei a le Alii e suia ai olaga. O le ala lea ou te tumau ai i lenei ekalesia. O le maea ai ona faamauina o se aiga, ou te le toe fefe ai i le oti. Ou te le toe popole foi pe a ou tuua lo’u aiga pe a ou oti.
“O le malumalu ua avea ma se faavae mo le lagonaina ma le iloaina lea o loo soifua lo tatou Tama Faalelagi—ma Lona Alo o Iesu Keriso, ma le Agaga Paia. O se molimau lea e le mafai ona aveesea e se tasi mai ia te au.”
O Mea ua Aoao Mai ia i Tatou e Galápagos
O tagata uma lava o le Ekalesia i Atumotu o Galápagos o se paionia lea o aso nei. Toeitiiti lava o tagata matutua uma o ni tagata liliu mai, o le toatele na liliu mai i nai tausaga ua mavae. Ma o loo fesoasoani i latou taitoatasi i le fausiaina o le malo o le Atua i se motu mamao e tau le maua ai ni punaoa. O le tele o meaai ma suauu uma ma oloa gaosi ma tekinolosi e tatau ona auina mai fafo. O le tamaoaiga i le lotoifale, e ui ina lelei, ae e faamoemoe e maua mai le tamaoaiga i na tagata tafafao fesuisuia’i e ta’ua o turisi.
Masalo o le mea e sili ona mautu i atumotu o le tautinoga lea a tagata o le ekalesia o le tasi i le isi ma le fausiaina o le malo. O lena tautinoga e mataina e pei o le faalagolago o atumotu i tulaga faanatura o loo latou ola ai. E faalagolago le tulaga faanatura o Atumotu o Galápagos i le ola maloloina o mea ola—o ni tagata ma ni ituaiga—e fesootai lelei lava ma lo latou siosiomaga faanatura.
I le avea ai ma se taitai malaga ma se tagata e suesue i tulaga faanatura, na faamatala mai ai e André faapea, “E aoao mai e Galápagos ia i matou o se tulaga faanatura e pei lava o se mea e ola. E pei o se tino. E i ai le uunaiga malosi, suavai, ma totoga. Afai e faaletonu se tasi o na mea, o le a pagatia isi vaega uma.”
E aoaoina foi i tatou e Atumotu o le Galápagos e uiga i le tulaga maoae o le foafoaga a le Atua. E leai ma se mea e maua i fanua i Galápagos. O mea ola uma, laau, meaola, ma tagata e aumai ma o mai mai isi atunuu.
“Pe a e mafaufau i ai,” o le faamalamalama mai lea a André, “o tulaga e amatalia ai se olaga iinei i Galápagos e faigata ona talitonuina. Muamua, e tatau ona pala ia maa mai le lava i se tulaga e mafai ai ona lagolagoina se ola. Ona tatau lea ona atiina ae ni punaoa o vai manino. Ona tatau lea ona oo fatu laau i se tulaga e mafai ai ona ola. Ma e tatau ona feusuai le tasi ma le isi.
“Ona tatau ai lea ona oo mai meaola laiti, e tusa lava pe faaopeopea i le vai pe felelei po o le a lava. Ma e tatau foi ona taunuu ia ituaiga meaola o itupa taitasi i le taimi, i le nofoaga ma le tulaga e tasi ina ia mafai ona fanafanau ma maua ni meaai ma ni vai. E faitau afe ia ituaiga manu i le atu Galápagos.
“Ia manatua, o le laueleele pito i latalata e 600 maila [1,000 km] le mamao. Ina ia mafai ona tutupu nei tulaga uma o se vavega lea.”
Ma o le tulaga tonu lava lea na faia e le Alii, i Lona poto e le i’u.
E pei lava ona manuia le siosiomaga faanatura pe a galulue ma le lotogatasi ia tagata, ua fausia ai foi e tagata o le Ekalesia se ituaiga o siosiomaga faalevafealoai ma faaleagaga. O tagata o le ekalesia o ni tagata taitoatasi ma o loo avea ma se vaega o le siosiomaga faanatura ua taua o aiga ma uarota ma paranesi o le Ekalesia. E i ai se matafaioi taua a tagata taitoatasi e faatinoina, e saofaga atu ai i le faaolataga ma le faaeaina o i latou lava, o latou aiga, ma isi tagata o le paranesi.
O faaiuga a tagata taitoatasi, e pei o lea na faia e André e auai atu ai i le lotu i lena aso i le 1997, e mafai ona i ai sona aafiaga tumau. O faaiuga tuufaatasi a tagata o le ekalesia ina ia fausia le malo e ala i auaunaga lē manatu faapito e ono foliga mai ua na o se faaupuga masani i nisi. Ae mo tagata o le ekalesia i Atumotu o Galápagos, o nei ituaiga faaiuga e matuai tele lava se eseesega ua faia ai i le malosi o lo latou tuuto, le mana o lo latou lotogatasi, ma le faatuatua ia latou feagaiga.
Ata na pueina e Joshua J. Perkey, sei vagana ua faamatalaina
Agavale: O motu o Santa Cruz (agavale) ma Baltra (taumatau) i le Galápagos. Luga: O loo pipiimau ikuana vai i se papa i Tortuga Bay, Santa Cruz.
Luga: O le uafu ma le taulaga o Puerto Ayora, Santa Cruz. Lalo, mai le agavale: O Sandra ma André Degel ma lo la tei o Claudine; Mariana Becerra; o le aiga o Palacios; O Oswaldo ma Rosario Villón.
Lalo: O Daniel ma Angela Calapucha; Araceli Duran ma lana fanau; o tagata o le paranesi a Galápagos lea na fesoasoani e fausia le fale o Elena Cedeño; o le falelotu o le Paranesi a Atumotu o Galápagos.
Lalo: Na auai le aiga o Fueres i le Ekalesia i Otavalo, Ekuatoa, ma mulimuli ane siitia atu i Atumotu o Galápagos e saili galuega. Lalo taumatau: O Elena Cedeño (agavale) ma lona uso o, Maria; faatasi ai ma le fesoasoani a Maria, na auai ai Elena i le Ekalesia i le amataga o le tausaga lenei.
O Atumotu o Galápagos
Vasa Pasefika
Ekuatoa: 600 maila (1,000 km) sasae
0˚ Ekueta
90˚
Isapela
Fernandina
San Salvador
Baltra
Santa Cruz
Puerto Ayora
Santa María
San Cristóbal
Española
0 10 20 30 40 maila
0 10 20 30 40 50 60 kilomita
Marchena
Pinta
Agavale pito i luga: ata mai le faaaloaloga a Floyd ma Susan Baum
Faafanua na saunia e le Mountain High Maps © 1993 Digital Wisdom Inc.